പ്രേതകോട്ടയിലേക്കൊരു യാത്ര പോയാലോ? ഇന്ത്യയിലെ പാരനോര്മല് സ്പോട്ടുകള് പരിചയപ്പെടാം...
പ്രേതങ്ങളെ പിന്തുടര്ന്നൊരു യാത്ര പോയാലോ? ചുറ്റും രക്ഷസകോട്ടകളും നിശബ്ദതയും. നിഗൂഢമായ സ്ഥലങ്ങളും വിചിത്രമായ കഥകളും കേട്ടൊരു യാത്ര. ഇത്തരം അമാനുഷിക പ്രാധാന്യമുണ്ടെന്ന് വിശ്വസിക്കപ്പെടുന്ന സ്ഥലങ്ങളിലേക്കുള്ള യാത്രകളാണ് പാരനോര്മല് ടൂറിസം. പേര് സൂചിപ്പിക്കുന്നത് പോലെ, അജ്ഞാതമായ കാര്യങ്ങള് പരിക്ഷിക്കുന്നതിനായി നിഗൂഢമായ സ്ഥലങ്ങള് സന്ദര്ശിക്കുന്നതിനെയാണ് പാരനോര്മല് ടൂറിസം എന്ന് പറയുന്നത്.
വിദേശ സഞ്ചാരികളെ കൂടുതല് ആകര്ഷിക്കുന്ന പാരനോര്മല് ടൂറിസം ഇന്ത്യക്കാരെ അത്രകണ്ട് ആകര്ഷിച്ചിട്ടില്ല.
അന്ധവിശ്വാസങ്ങള് നീക്കം ചെയ്യുന്നതിലും അമാനുഷിക പ്രവര്ത്തനങ്ങള് ശാസ്ത്രീയമായി മനസ്സിലാക്കുന്നതിലും പാരനോമല് ടൂറുകള് സഹായിക്കുന്നു. അമേരിക്കയിലും യുകെയിലും ഇത്തരം ടൂറുകള് സ്ഥിരമായി കാണാറുണ്ട്. ഇത്തരം ഇടങ്ങളില് ഗൈഡഡ് ടൂറുകളും രാത്രികാല താമസവും പരിപാടികളും വരെ ആസൂത്രണം ചെയ്യാറുണ്ട്.
അമേരിക്കയിലെ ഒരു പ്രസിദ്ധമായ പാരനോര്മല് സ്പോട്ടാണ് കൊളറാഡോയിലെ എസ്റ്റസ് പാര്ക്കിലുള്ള സ്റ്റാന്ലി ഹോട്ടല്. 'പ്രേത' കാഴ്ചകള്ക്കും വിചിത്രമായ സംഭവങ്ങള്ക്കും പേരുകേട്ട സ്ഥലമാണിത്. 1977-ല് പുറത്തിറങ്ങിയ സ്റ്റീഫന് കിങ്ങിന്റെ ഹൊറര് നോവല് 'ദ ഷൈനിങ്ങിന്റെ' ഇതിവൃത്തമാണീ ഹോട്ടല്. പാരനോമല് ടൂറിസ്റ്റുകളുടെ മറ്റൊരു പ്രധാന സ്ഥലമാണ് യുകെയിലെ നോര്ത്തെബര്ലാന്ഡിലെ 'ചില്ലിങ്ഹാം കാസില്'. ബ്രിട്ടനിലെ ഏറ്റവും പ്രേതബാധയുള്ള ചരിത്ര കോട്ട' എന്ന പേരില് ഈ സ്ഥലം കുപ്രസിദ്ധമാണ്. ഏറ്റവും കൂടുതല് അമാനുഷിക പ്രവര്ത്തനങ്ങള് നടക്കുന്ന ഒരിടം കൂടിയാണിത്. വര്ഷം മുഴുവനും ഇവിടേക്ക് നിരവധി ആളുകളാണ് എത്തുന്നത്.
ഇന്ത്യക്കാരുടെ ബക്കറ്റ് ലിസ്റ്റിലും ഇത്തരം ചില പാരനോര്മല് സ്പോട്ടുകളുണ്ട്. വര്ഷങ്ങളായി ചില സ്ഥലങ്ങളെ ചുറ്റിപ്പറ്റിയുള്ള ഭയാനകമായ കഥകളാണ് ഇത്തരം യാത്രകളിലേക്ക് ആളുകളെ ആകര്ഷിക്കുന്നത്. പ്രത്യേകിച്ച് ഇന്ത്യയുടെ ഗ്രാമീണമേഖലകളില് പാദേശിക ഇതിഹാസങ്ങളും പുരാണങ്ങളും നൂറ്റാണ്ടുകളായി അഭിവൃദ്ധി പ്രാപിച്ചിട്ടുണ്ട്. അത്തരം ചില പ്രദേശങ്ങള് പരിചയപ്പെടാം...
1.രാജസ്ഥാനിലെ ഭാന്ഗഡ് കോട്ട
പതിനാറാം നൂറ്റാണ്ടില് രാജസ്ഥാനില് പണികഴിപ്പിച്ച കോട്ടയാണ് ഭാന്ഗഡ് കോട്ട. ആരവല്ലി നിരകളാല് ചുറ്റപ്പെട്ട ഈ കോട്ട ഇന്ത്യയിലെ ഏറ്റവും ഭയാനകമായ ഇടങ്ങളിലൊന്നാണ്. ഐതിഹ്യമനുസരിച്ച് ഈ കോട്ടയെയും ഗ്രാമവാസികളെയും ഒരു മന്ത്രവാദി ശപിച്ചെന്നാണ് പറയപ്പെടുന്നത്. സഞ്ചാരികളില് തീര്ച്ചയായും സന്ദര്ശിച്ചിരിക്കേണ്ട ഒന്നാണ് ഭാന്ഗഡ് കോട്ട. ഇവിടെ എത്തുന്നവര് ഭയാനകമായ അനുഭവങ്ങളും വിചിത്രമായ ധാരാളം ശബ്ദങ്ങളും കേള്ക്കുന്നുണ്ടെന്നും അഭിപ്രായപ്പെടുന്നു.
2. ഡൗ ഹില്, പശ്ചിമ ബംഗാള്
വിചിത്രമായ രഹസ്യങ്ങളാലും പ്രേതകഥകളാലും ചുറ്റപ്പെട്ട ഡൗ ഹില് പശ്ചിമ ബംഗാളിലെ കുര്സിയോങ്ങിലെ മൂടല്മഞ്ഞുള്ള വനങ്ങളാല് ചുറ്റപ്പെട്ടതാണ്. നിഴലുകളില് പതിയിരിക്കുന്ന പ്രേതശക്തികളുടെ അസ്വസ്ഥത ഉളവാക്കുന്ന ഓര്മ്മപ്പെടുത്തലാണ് ഡൗ ഹില്. അലഞ്ഞുതിരിയുന്ന ഒരു സ്പെക്ട്രല് രൂപത്തിന്റെ കാഴ്ചകളുടെയും കാടുകളില് പ്രതിധ്വനിക്കുന്ന ഭയാനകമായ ചിരിയുടെയും നിഗൂഡമായ കലവറയാണ് ഡൗ ഹില്.
3.ഫേണ്ഹില് ഹോട്ടല്, ഊട്ടി
ഊട്ടിയിലെ മൂടല്മഞ്ഞുള്ള കുന്നിന് മുകളില് സ്ഥിതി ചെയ്യുന്ന ഫേണ്ഹില് ഹോട്ടല് പ്രൗഡിയും നിശബ്ദതയും ചേര്ന്നതാണ്. ഒരുകാലത്ത് ബ്രിട്ടീഷുകാരുടെ ആഡംബര വിശ്രമ കേന്ദ്രമായിരുന്ന ഈ ഹോട്ടല് ഇന്ന് ഉപേക്ഷിക്കപ്പെട്ട നിലയിലാണ്. ഫേണ്ഹില്ലിന്റെ ഇടനാഴികള് അസ്വസ്ഥമായ ആത്മാക്കളുടെയും ശബ്ദങ്ങള് പ്രതിധ്വനിക്കുന്നുണ്ടെന്നും പറയപ്പെടുന്നു. കാല്പ്പാടുകളും മിന്നിമറയുന്ന വിളക്കുകളും, നിഗൂഡ രൂപങ്ങളും എന്നീ അനുഭവങ്ങള് സന്ദര്ശകര് വിവരിക്കുന്നു.
4. ശനിവാര്വാഡ കോട്ട, പൂണെെ
സ്പെക്ട്രല് കഥകള്ക്കും അമാനുഷിക പ്രവര്ത്തനങ്ങള്ക്കും പേരുകേട്ട പൂനെയിലെ ശനിവാര്വാഡ കോട്ട ചരിത്രത്തിലും പാരമ്പര്യത്തിലും മുന്നിലാണ്. പതിനെട്ടാം നൂറ്റാണ്ടില് പേഷ്വാകള് നിര്മ്മിച്ച ഈ കോട്ട, ചതിയും അക്രമവും നിറഞ്ഞ ഭയാനകമായ ചരിത്രത്തിന്റെ ഓര്മ്മപ്പെടുത്തലാണ്. രാത്രിയുടെ ഇരുട്ടില്, കോട്ടയുടെ ഇടനാഴികളിലൂടെ സഹായത്തിനായി നിലവിളിക്കുന്ന ഒരു രാജകുമാരന്റെ പ്രേതത്തെ കണ്ടതായുള്ള അനുഭവങ്ങള് സന്ദര്ശകര് പങ്കുവെക്കുന്നു. സാഹസികതയും ഡാര്ക്ക് ടൂറിസവും ഇഷ്ടപ്പെടുന്നവര്ക്ക് ശനിവാര്വാഡ കോട്ട നല്ലൊരു സ്ഥലമാണ്.
5.സാവോയ് ഹോട്ടല്, മസൂറി
മുസ്സൂറിയിലെ മൂടല്മഞ്ഞുള്ള കുന്നുകള്ക്കിടയില് ഒതുങ്ങി നില്ക്കുന്ന സാവോയ് ഹോട്ടലിനുള്ളില് പതിറ്റാണ്ടുകളായി വിനോദസഞ്ചാരികളെ ആകര്ഷിച്ച ഒരു ദുരൂഹത ഒളിഞ്ഞിരിപ്പുണ്ട്. ബ്രിട്ടീഷ് പ്രഭുക്കന്മാര് ഒരിക്കല് സന്ദര്ശിച്ചിരുന്ന ഈ ഹോട്ടലില്, മരിച്ച ലേഡി ഗാര്നെറ്റ് ഓര്മ്മിന്റെ പ്രേതം വേട്ടയാടുന്നതായി കിംവദന്തിയുണ്ട്. ഇടനാഴികളിലൂടെ നടക്കുന്ന മൂടുപടം ധരിച്ച ഒരു സ്ത്രീയുടെ സാന്നിധ്യം എന്നിവയുള്പ്പെടെ ഭയപ്പെടുത്തുന്ന അനുഭവങ്ങളുള്ളതിനാല് പാരാനോര്മല് യാത്രകള് ഇഷ്ടപ്പെടുന്നവര് തീര്ച്ചയായും സന്ദര്ശിക്കേണ്ട ഒന്നാണ് സാവോയ് ഹോട്ടല്.
6.റാമോജി ഫിലിം സിറ്റി, ഹൈദരാബാദ്
ലോകത്തിലെ ഏറ്റവും വലിയ ഫിലിം സ്റ്റുഡിയോകളില് ഒന്നാണ് ഹൈദരാബാദിലെ റാമോജി ഫിലിം സിറ്റി. അതിമനോഹരമായ സെറ്റുകള്ക്ക് പേരുകേട്ട ഇവിടെ മരിച്ചുപോയ കലാകാരന്മാരുടെയും സ്റ്റാഫ് അംഗങ്ങളുടെയും പ്രേതങ്ങള് വേട്ടയാടുന്നുവെന്ന് പറയപ്പെടുന്നു. സിനിമാ സെറ്റുകളില് പ്രത്യക്ഷപ്പെടുന്ന പ്രേതങ്ങളുടെ ഭയാനക കഥകള്, ശരീരമില്ലാത്ത ശബ്ദങ്ങള്, നിഗൂഢമായ സാങ്കേതിക പ്രശ്നങ്ങള് എന്നീ അനുഭവങ്ങള് ഇവിടം സന്ദര്ശിക്കുന്നവര്
പറയുന്നു.
കൂടുതല് ഫീച്ചറുകള് വായിക്കാന് ഗൃഹലക്ഷ്മി വാട്സാപ്പ് ഗ്രൂപ്പില് അംഗമാകൂ:https://mbi.page.link/grihalakshmi
Content Highlights: India's Haunted Heritage: A Guide to Paranormal Tourism