ഒരുകാലത്ത് ലഹരിക്ക് അടിമയായവരെ പാർപ്പിച്ചിരുന്ന കേന്ദ്രം; ഇനി സുബീൻ ഗാർഗിന്റെ പേരിൽ അറിയപ്പെടും

ഗായകൻ സുബീൻ ഗാർഗിനോടുള്ള ആദരസൂചകമായി സിംഗപ്പൂരിലെ ഒരുസ്ഥലത്തിന് സുബീൻ ഗാർഡ് ഐലന്റ് എന്നു പേരിടുന്നു. സെന്റ് ജോൺസ് ഐലന്റിനാണ് ഈ പേരുമാറ്റം. സെപ്റ്റംബർ 19-ന് നോർത്ത് ഈസ്റ്റ് ഇന്ത്യ ഫെസ്റ്റിവലിനായി സിംഗപ്പൂരിലെത്തിയപ്പോഴായിരുന്നു സുബീൻ ഗാർഗിന് അപകടമുണ്ടാവുന്നത്. സെന്റ് ജോൺസ് ദ്വീപിനടുത്തുവെച്ച് നീന്തുന്നതിനിടെ അദ്ദേഹത്തിന് ബോധം നഷ്ടപ്പെട്ടു. പിന്നീട് ആസ്പത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.

സിംഗപ്പൂർ സർക്കാരിന്റെ ഈ തീരുമാനത്തെ ആരാധകർ ഏറെ സ്‌നേഹത്തോടെയാണ് ഏറ്റെടുക്കുന്നത്. രാഷ്ട്രീയപരമായും സാമൂഹ്യപരമായും ഏറെ പ്രാധാന്യമുള്ള സ്ഥലം കൂടിയാണിവിടം.

1874-ൽ ദ്വീപൊരു ക്വാറന്റൈൻ സ്റ്റേഷനായി പ്രവർത്തിച്ചിരുന്നു. ഈസ്റ്റ് ഇന്ത്യാ കമ്പനിയാണ് ക്വാറന്റൈൻ സ്റ്റേഷൻ സ്ഥാപിച്ചത്. ആ സമയത്ത്, കോളറ, പ്ലേഗ്, വസൂരി, ക്ഷയം എന്നിവയുൾപ്പെടെയുള്ള പകർച്ചവ്യാധികൾ പടർന്നുപിടിച്ചിരുന്നു. അത്തരം രോഗം ബാധിക്കുന്നവരെ ഇങ്ങോട്ടേക്കായിരുന്നു മാറ്റിത്താമസിപ്പിച്ചിരുന്നത്. അന്നിവിടെ ആശുപത്രികളും മോർച്ചറികളുമൊക്കെയുണ്ടായിരുന്നു. സമീപത്തുള്ള ലസാറസ് ദ്വീപിലൊരു ശ്മശാനവും. 1930-കളിൽ ലോകത്തിലെ ഏറ്റവും വലിയ ഐസൊലേഷൻ കേന്ദ്രങ്ങളിലൊന്നായി.

1948-ൽ രാഷ്ട്രീയ തടവുകാരെ പാർപ്പിക്കുന്ന തടങ്കൽകേന്ദ്രമായും സെന്റ് ജോൺസ് ദ്വീപ് മാറി. അന്നത്തെ ജയിൽ സെല്ലുകൾ ഇപ്പോഴും സ്മാരകങ്ങളായി ഇവിടെ നിലനിൽക്കുന്നു.

രണ്ടാം ലോകമഹായുദ്ധകാലത്ത് ഒട്ടേറെ പേരാണ് ലഹരിമരുന്ന് ഉപയോഗിക്കുന്നവരായുണ്ടായിരുന്നത്. 1955-ൽ ഇവിടൊരു ഓപിയം ഹീലിങ് ക്ലിനിക്ക് തുടങ്ങി. കാലക്രമേണ അത് ഡ്രഗ് റീഹാബിലിറ്റേഷൻ സെന്ററായി മാറിയെങ്കിലും, 1975-ൽ അത് അടച്ചുപൂട്ടി.

കടൽത്തീരങ്ങളിലൂടെ 

മനോഹരമായ കടലും കടൽത്തീരവുമാണ് സെന്റ് ജോൺസ് ദ്വീപിന്റെ പ്രത്യേകത. ജൈവവൈവിധ്യങ്ങളാൽ സമ്പന്നമാണിവിടം. ചെറിയ ബീച്ചായതുകൊണ്ടുതന്നെ നീന്താനും അനുയോജ്യമാണ്. അതിനൊപ്പം ഈ പ്രദേശത്തൂടെ സൈക്ലിങ്, ഹൈക്കിങ് എന്നിവയും ചെയ്യാം.

കൂടുതല്‍ ഫീച്ചറുകള്‍ വായിക്കാന്‍ ഗൃഹലക്ഷ്മി വാട്സാപ്പ് ഗ്രൂപ്പില്‍ അംഗമാകൂ:https://mbiurl.in/grihalakshmi

Content Highlights: A former drug rehabilitation center in Singapore is now named Subin Garg Island, honoring the late singer