ടോക്സിക്ക് അമ്മ? വിക്ടോറിയ ബെക്കാമിന്റെ സ്പൈസ് ഗേൾ ജീവിതവും ഫാഷൻ പ്രൊഫഷനും
ഫുട്ബോളർ ഡേവിഡ് ബെക്കാമിന്റെ ഭാര്യയും നാലു മക്കളുടെ അമ്മയുമായ വിക്ടോറിയ ബെക്കാം കുടുംബവഴക്കിന്റെ പേരിൽ ചർച്ചയിലിടം പിടിക്കുകയാണ്. മൂത്ത മകൻ ബ്രൂക്ക്ലിൻ മാതാപിതാക്കൾക്കെതിരേ നടത്തിയ രൂക്ഷമായ വെളിപ്പെടുത്തലുകളാണ് ഇതിന് കാരണമായത്. ബ്രൂക്ക്ലിന്റെ ഭാര്യ നിക്കോള പെൽറ്റ്‌സിനെ വിക്ടോറിയ നിരന്തരം അപമാനിച്ചുവെന്നും പബ്ലിസിറ്റിക്കുവേണ്ടി ടോക്സിക് ആയി പെരുമാറുന്നുവെന്നുമാണ് പ്രധാന ആരോപണം. സ്വന്തം വിവാഹത്തിന് ഭാര്യക്കൊപ്പം നൃത്തം ചെയ്യാൻ പോലും അമ്മ തന്നെ അനുവദിച്ചില്ലെന്നും ബ്രൂക്ക്ലിൻ പറഞ്ഞിരുന്നു.
സ്പൈസ് ഗേൾ
വ്യക്തിജീവിതം പരിശോധിച്ചാൽ, ഫാഷൻ ഡിസൈനർ, ബ്യൂട്ടി മൊഗുൾ, എഴുത്തുകാരി, മോഡൽ, എഡിറ്റർ, നിർമ്മാതാവ് എന്നിങ്ങനെ വിവിധ മേഖലകളിൽ കഴിവു തെളിയിച്ചയാളാണ് വിക്ടോറിയയെന്നു കാണാം. എക്കാലത്തെയും ഏറ്റവുമധികം ചർച്ച ചെയ്യപ്പെട്ട ഗേൾ ട്രൂപ്പുകളിലൊന്നായ സ്പൈസ് ഗേൾസിലെ മിന്നും താരമായിരുന്നു വിക്ടോറിയ. ജീവിതത്തിന്റെ ഭൂരിഭാഗവും പൊതുശ്രദ്ധയിലാണവർ ജീവിച്ചത്. പോപ്പ് സ്റ്റാർഡം മുതൽ ഹൈ ഫാഷൻ വരെ, വിവാഹം മുതൽ മാതൃത്വം വരെ, അവരുടെ വ്യക്തിപരവും ഔദ്യോഗികവുമായ ലോകങ്ങൾ പൊതു ശ്രദ്ധയിലുണ്ടായിരുന്നു.
1974-ൽ എസ്സെക്സിൽ വിക്ടോറിയ കരോലിൻ ആഡംസ് എന്ന പേരിൽ ജനനം. സാമ്പത്തിക സ്ഥിരതയുള്ള വീട്ടിലാണ് വളർന്നത്. നൃത്തത്തിലും സംഗീതത്തിലുമുള്ള താൽപ്പര്യം മാതാപിതാക്കൾ പ്രോത്സാഹിപ്പിച്ചു, ചെറുപ്പത്തിലേ ഒരു തിയേറ്റർ സ്കൂളിൽ ചേർത്തു, പിന്നീടുള്ള തന്റെ ജീവിതത്തിന് അവിടെനിന്ന് അവർ അടിത്തറയിട്ടു.
1990-കളുടെ മധ്യത്തിൽ സ്പൈസ് ഗേൾസിലെ അംഗമെന്ന നിലയിൽ വിക്ടോറിയ പ്രശസ്തിയിലേക്ക് ഉയർന്നു. എപ്പോഴും സുന്ദരിയും സ്റ്റൈലിഷുമായിരിക്കാൻ ശ്രദ്ധിച്ച വിക്ടോറിയ സ്പൈസ് ഗേൾസിലെ "പോഷ് സ്പൈസ്" എന്ന പേരിലാണ് അറിയപ്പെട്ടത്.
1999 ൽ ഫുട്ബോളർ ഡേവിഡ് ബെക്കാമിനെ വിവാഹം ചെയ്തു. ലോകം ഏറ്റവുമധികം ചിത്രം പകർത്തിയ ദമ്പതികളിലൊന്നായിരുന്നു ഇരുവരും. ഭർത്താവിന്റെ കരിയറിനൊത്ത് രാജ്യങ്ങളിൽ നിന്ന് രാജ്യങ്ങളിലേക്കവർ കൂടുമാറി. ഇരുവരുമൊന്നിച്ച് ഒരു കുടുംബത്തെ വളർത്തിയെടുക്കുമ്പോഴും തീവ്രമായ മാധ്യമ ശ്രദ്ധ അവർക്ക് കിട്ടി. വിവാഹിതരായ അതേ വർഷം അവർക്ക് ആദ്യത്തെ മകൻ, ബ്രൂക്ക്ലിൻ ജനിച്ചു, മാതൃത്വത്തിലായി പിന്നീടുള്ള ശ്രദ്ധ.
സ്പൈസ് ഗേൾസ് പിരിച്ചുവിട്ടതിന് ശേഷം, പ്രൊഫഷണൽ ജീവിതത്തിൽ വിക്ടോറിയ പ്രതിസന്ധികൾ നേരിട്ടിരുന്നു. സോളോ ഗാനങ്ങളും പുറത്തിറക്കി.
പതിയെ അവർ ഫാഷനിലേക്ക് തിരിഞ്ഞു, രാപ്പകൽ അധ്വാനിച്ചിട്ടും ആദ്യമൊന്നും ബിസിനസ് പച്ചപിടിപ്പിക്കാനായില്ല. പക്ഷേ സ്ഥിരോത്സാഹം ഫലം കണ്ടു. വിക്ടോറിയ ബെക്കാം എന്ന ആഡംബര ബ്രാൻഡ് ഇന്ന് ആഡംബര വസ്ത്രങ്ങളും പാദരക്ഷകളും ആക്സസറീസും വിൽക്കുന്നുണ്ട്. ലണ്ടനാണ് ആസ്ഥാനം. ഫാഷൻ ലോകത്ത് ഏവരും ബഹുമാനിക്കുന്ന വ്യക്തിയായും സ്റ്റൈൽ ഐക്കണായും അവർ മാറി. ദൃഢനിശ്ചയത്തോടെ വളർന്നുവന്നൊരു സ്ത്രീയായിരുന്നു അവർ. ഏഴോളം ഡോക്യുമെന്ററി സിനിമകളിൽ വേഷമിട്ടു. വിക്ടോറിയക്കും ഡേവിഡിനും നാല് മക്കളാണ്, ബ്രൂക്ക്ലിൻ, റോമിയോ, ക്രൂസ്, ഹാർപ്പർ. 2019-ലെ കണക്കുപ്രകാരം 355 മില്യൺ പൗണ്ടാണ് ദമ്പതികളുടെ ആസ്തി.
കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi
Content Highlights: Explore Victoria Beckham`s journey from pop star to fashion icon. Discover the discipline, determination, and private resolve behind her carefully crafted public image.