അന്നത്തെ അഗ്നിപര്വ്വതസ്ഫോടനത്തില് ഇന്ത്യയുടെ ആകാശം ചുവന്നു, മൂടല്മഞ്ഞ് കാഴ്ച മറച്ചു
നവംബര് 23-ന് എത്യോപ്യയിലെ ഹെയ്ലി ഗുബ്ബി അഗ്നിപര്വ്വതത്തിന്റെ പൊട്ടിത്തെറിയിലുണ്ടായ ചാരപടലം കിഴക്കോട്ട് വ്യാപിച്ച് ഇന്ത്യയിലെത്തിയിരുന്നു. നവംബര് 24-നാണ് പുക ഡല്ഹിയുടെ അന്തരീക്ഷത്തിലേക്ക് കടന്നത്. ചാരമേഘങ്ങള് പല ഇന്ത്യന് സംസ്ഥാനങ്ങള്ക്കു മുകളിലൂടെയും വ്യാപിച്ചെങ്കിലും, ഉയര്ന്ന തലത്തില് തന്നെ നിലനിന്നതിനാല് ഭൂനിരപ്പിലെ വായുവിന്റെ ഗുണനിലവാരത്തില് സ്വാധീനമൊന്നും ചെലുത്തിയില്ല. നവംബര് 25 രാത്രിയോടെ, ചാരമേഘങ്ങള് പൂര്ണ്ണമായും ഇന്ത്യന് വ്യോമാതിര്ത്തി വിട്ടുപോയതായി സാറ്റലൈറ്റ് റിപ്പോര്ട്ടുകള് സ്ഥിരീകരിച്ചു.
ഒറ്റ സജീവ അഗ്നിപര്വതമേ ഇന്ത്യയിലുള്ളൂ. ഇന്നോളം അഗ്നിപര്വ്വതസ്ഫോടനങ്ങള് ഇന്ത്യന് ജനത നേരിട്ടനുഭവിച്ചിട്ടില്ല. പക്ഷേ ഇതിനുമുന്പും അന്യരാജ്യങ്ങളിലുണ്ടായ ദുരന്തത്തിന്റെ പ്രത്യാഘാതങ്ങള് ഇന്ത്യയിലേക്ക് കടന്നെത്തിയിട്ടുണ്ട്.
1991-ല് ഫിലിപ്പീന്സിലുണ്ടായ പിനാറ്റുബോ പര്വ്വത സ്ഫോടനം ദശലക്ഷക്കണക്കിന് ടണ് സള്ഫര് ഡയോക്സൈഡാണ് സ്ട്രാറ്റോസ്ഫിയറിലേക്ക് അയച്ചത്. അത് തെക്കുകിഴക്കന് ഏഷ്യയിലുടനീളം അതിവേഗം വ്യാപിക്കുകയും പടിഞ്ഞാറോട്ട് നീങ്ങി ഇന്ത്യയിലേക്ക് പ്രവേശിക്കുകയും ചെയ്തു. 1991-92 കാലഘട്ടത്തിലെ സാറ്റലൈറ്റ് റിപ്പോര്ട്ടുകള് ഇന്ത്യന് ഉപഭൂഖണ്ഡത്തിന് മുകളില് പിനാറ്റുബോയുടെ ചാരമേഘത്തിന്റെ സാന്നിധ്യം സ്ഥിരീകരിക്കുന്നു. ഇത് ഇന്ത്യയില് കാര്യമായ മൂടല്മഞ്ഞിനും തണുപ്പിനും കാരണമായി. ഈ അന്തരീക്ഷസാഹചര്യങ്ങള് മണ്സൂണിന്റെ ഗതിയെയും സ്വാധീനിച്ചു. അങ്ങനെ ചില പ്രദേശങ്ങളില് മഴ വൈകുകയോ ദുര്ബലമാവുകയോ ചെയ്തതായി റിപ്പോര്ട്ട് ചെയ്യപ്പെട്ടു.
ഇന്തോനേഷ്യയിലെ ക്രാകറ്റോവ അഗ്നിപര്വതത്തില് 1883-ലുണ്ടായ സ്ഫോടനം ഇന്ത്യയിലെ ആകാശത്തെ ചുവപ്പിച്ചു. ക്രാകറ്റോവ സ്ഫോടനം വന്തോതില് ചാരവും സള്ഫര് ഡയോക്സൈഡും സ്ട്രാറ്റോസ്ഫിയറിലേക്ക് പുറന്തള്ളി. അവിടെ നിന്ന് കാറ്റ് അവയെ ഇന്ത്യന് മഹാസമുദ്രം കടന്ന് ഇന്ത്യന് ഉപഭൂഖണ്ഡത്തിന് മുകളിലെത്തിച്ചു. മുംബൈ, ചെന്നൈ പോലുള്ള നഗരങ്ങളില് ആഴ്ചകളോളം അസാധാരണമാംവിധം ചുവന്ന സൂര്യാസ്തമയങ്ങള്, മങ്ങിയ പകല് വെളിച്ചം, മൂടല്മഞ്ഞ് എന്നീ അവസ്ഥകള് നീണ്ടുനിന്നു. ഇന്ത്യയില് ചാരം നേരിട്ട് പതിച്ചില്ലെങ്കിലും ഈ മാറ്റങ്ങള് സാധാരണക്കാരും കാലാവസ്ഥാ നിരീക്ഷകരും ഒരുപോലെ ആശങ്കയോടെ നിരീക്ഷിച്ചിരുന്നു.
ഇന്തോനേഷ്യയിലെ തന്നെ ടാംബോറ പര്വ്വതം 1815-ല് പൊട്ടിത്തെറിച്ചുണ്ടായ എയറോസോളുകളുടെ വ്യാപനം ഏഷ്യയിലുടനീളം കാലാവസ്ഥയെ മാറ്റിമറിച്ചു. തുടര്ന്നുള്ള വര്ഷങ്ങളില് ഇന്ത്യയില് മണ്സൂണ് ക്രമരഹിതമായി. ഉപഭൂഖണ്ഡത്തിന്റെ പല ഭാഗങ്ങളിലും അസാധാരണമാം വിധം കുറഞ്ഞ താപനിലയും താളംതെറ്റിയ മഴയും കാര്ഷിക പ്രതിസന്ധിയുണ്ടാക്കി. ലോകത്താകമാനം 'വേനലില്ലാത്ത വര്ഷം' സൃഷ്ടിച്ച അഗ്നിപര്വ്വതസ്ഫോടനമായിരുന്നു ടാംബോറയിലുണ്ടായത്.
ഏകദേശം 74,000 വര്ഷങ്ങള്ക്ക് മുന്പുണ്ടായ ടോബ മഹാസ്ഫോടനം ഇന്ത്യന് ഉപഭൂഖണ്ഡത്തില് കാര്യമായ സ്വാധീനം ചെലുത്തി. ആന്ധ്രാപ്രദേശ്, മധ്യ ഇന്ത്യ എന്നിവയുള്പ്പെടെ ഇന്ത്യയിലെ പല പ്രദേശങ്ങളിലും ബംഗാള് ഉള്ക്കടലിലെയും അറബിക്കടലിലെയും സമുദ്രഅടിത്തട്ടുകളിലും ടോബ ടെഫ്ര എന്നറിയപ്പെടുന്ന അഗ്നിപര്വത ചാരത്തിന്റെ കനത്ത പാളി ഭൗമശാസ്ത്ര പഠനങ്ങള് കണ്ടെത്തിയിട്ടുണ്ട്. സ്ഫോടനത്തിനുശേഷം കാറ്റിന്റെ ഗതി ഇന്ത്യയുടെ നേര്ക്കായിരുന്നു എന്ന് ഇത് സ്ഥിരീകരിക്കുന്നു. ഈ ചാരവര്ഷം പ്രാദേശിക ആവാസവ്യവസ്ഥകളെ തടസ്സപ്പെടുത്തുകയും സൂര്യപ്രകാശം കുറയ്ക്കുകയും കാര്യമായ തണുപ്പിന് കാരണമാവുകയും ചെയ്തിരിക്കാം. ചരിത്രാതീത കാലത്തെ ഇന്ത്യയിലെ സസ്യങ്ങളുടെ ഘടനയെയും മനുഷ്യവാസത്തിന്റെ വഴികളെയും ടോബ സ്ഫോടനം താല്ക്കാലികമായി മാറ്റിമറിച്ചിരിക്കാമെന്ന് ചില ഗവേഷകര് അഭിപ്രായപ്പെടുന്നു.
കൂടുതല് ഫീച്ചറുകള് വായിക്കാന് ഗൃഹലക്ഷ്മി വാട്സാപ്പ് ഗ്രൂപ്പില് അംഗമാകൂ:https://mbi.page.link/grihalakshmi
Content Highlights: Ethiopia`s volcanic eruption sent ash to India, turning skies red and hazy. Learn about past volcanic impacts on India and how they affected climate and monsoons.