കൈയിലുണ്ട്, പക്ഷേ കാണാറില്ല; മറഞ്ഞിരിക്കുന്ന ആസ്തികളെ വരുമാനമാക്കാം

നമ്മുടെ വീട്ടിൽ എത്ര പണമുണ്ടെന്ന് ചോദിച്ചാൽ മിക്കവർക്കും ഏകദേശമെങ്കിലും പറയാനാകും. ബാങ്കിൽ എത്രയുണ്ടെന്നും നിക്ഷേപങ്ങളിൽ എത്രയുണ്ടെന്നും അറിയാം. പക്ഷേ ''എന്റെ വീട്ടിലെ എല്ലാ സാമ്പത്തിക ആസ്തികളും എനിക്ക് അറിയാമോ?'' എന്ന് ചോദിച്ചാൽ പലർക്കും ഉത്തരം പറയാൻ കുറച്ച് സമയമെടുക്കും.

അലമാരയിലെ സ്വർണം, വർഷങ്ങളായി ഓർക്കാത്ത ഇൻഷുറൻസ് പോളിസി, ഉപയോഗിക്കാതെ കിടക്കുന്ന ബാങ്ക് അക്കൗണ്ട്, പഴയ സ്ഥിരനിക്ഷേപം, ഉപയോഗിക്കാത്ത ഒരു മുറി, അതിലും പ്രധാനമായി വർഷങ്ങളായി ഉപയോഗിക്കാതെ കിടക്കുന്ന സ്വന്തം കഴിവ്- ഇവയെല്ലാം ഒരു തരത്തിൽ മറഞ്ഞിരിക്കുന്ന സമ്പത്താണ്. സാമ്പത്തിക സ്വാതന്ത്ര്യം നേടാൻ പുതിയതായി പണം കണ്ടെത്തുന്നതിന് മുമ്പ്, നമ്മുടെ കൈവശമുള്ള സമ്പത്ത് എത്രയുണ്ടെന്ന് കണ്ടെത്തുന്നതാണ് ബുദ്ധി.