'ശ്രീദേവി ബോധരഹിതയായി വീണ് തല ഇടിച്ചു, പല്ല് നഷ്ടപ്പെട്ടു; ശരീരഭാരം കുറയ്ക്കാൻ സമ്മർദമുണ്ടായിരുന്നു'

ഇന്ത്യൻ സിനിമയിലെ ഏറ്റവും ആഘോഷിക്കപ്പെട്ട താരങ്ങളിലൊരാളായിരുന്നു അന്തരിച്ച നടി ശ്രീദേവി. താരപദവിയിലേക്കുള്ള യാത്രയിൽ അവർ നേടിയ ഗ്ലാമർ ഇമേജിന് പിന്നിൽ ആരോഗ്യത്തെ ബാധിച്ച ചില കഠിനമായ അനുഭവങ്ങളും ഉണ്ടായിരുന്നുവെന്നാണ് അവരോടൊപ്പം പ്രവർത്തിച്ചവർ പിന്നീട് വെളിപ്പെടുത്തിയത്.

ശ്രീദേവിയെ നായികയാക്കി 'ചാൽബാസ്' സംവിധാനം ചെയ്ത സംവിധായകൻ പങ്കജ് പരാശർ, 'മേരീ ബീവി കാ ജവാബ് നഹി'യുടെ ചിത്രീകരണത്തിനിടെ നടന്നതായി പറയുന്ന ഒരു സംഭവമാണ് പഴയ അഭിമുഖത്തിൽ ഓർത്തെടുത്തത്. അക്ഷയ് കുമാറും പ്രധാന വേഷത്തിലെത്തിയ ചിത്രമായിരുന്നു ഇത്. ഫ്രൈഡേ ടോക്കീസിന് നൽകിയ പഴയ അഭിമുഖത്തിലാണ് പരാശർ ഇക്കാര്യം പറഞ്ഞത്. ശരീരഭാരം കുറയ്ക്കണമെന്ന സമ്മർദത്തെ തുടർന്ന് ശ്രീദേവി കടുത്ത ഡയറ്റ് പിന്തുടർന്നുവെന്നും അത് പിന്നീട് ആരോഗ്യത്തെ ബാധിച്ചുവെന്നുമാണ് അദ്ദേഹത്തിന്റെ അവകാശവാദം. ചിത്രീകരണത്തിനിടെ നടി കുഴഞ്ഞുവീണ് പരുക്കേറ്റതായും അദ്ദേഹം പറഞ്ഞു.

1991-ൽ രാം ഗോപാൽ വർമ സംവിധാനം ചെയ്ത തെലുങ്ക് ചിത്രം 'ക്ഷണ ക്ഷണം' എന്ന സിനിമയിൽ അഭിനയിക്കുന്ന സമയത്ത് ശ്രീദേവിക്ക് ശരീരഭാരം കുറയ്ക്കാൻ സമ്മർദമുണ്ടായിരുന്നുവെന്നാണ് പരാശർ പറഞ്ഞത്. വർമ പലതവണ ശരീരഭാരം കുറയ്ക്കാൻ ആവശ്യപ്പെട്ടിരുന്നുവെന്നും അദ്ദേഹം ആരോപിച്ചു. തുടർന്ന് ശ്രീദേവി വളരെ നിയന്ത്രിതമായ ഭക്ഷണക്രമത്തിലേക്ക് മാറിയെന്നും ഉപ്പ് പൂർണമായും ഒഴിവാക്കിയെന്നും പരാശർ പറഞ്ഞു. ഇതിനെ തുടർന്ന് അവരുടെ രക്തസമ്മർദം ഗണ്യമായി കുറഞ്ഞുവെന്നും അദ്ദേഹം അവകാശപ്പെട്ടു.

'മേരീ ബീവി കാ ജവാബ് നഹി'യുടെ ചിത്രീകരണത്തിനിടെയാണ് ശ്രീദേവി പെട്ടെന്ന് ബോധരഹിതയായി വീണതെന്നാണ് പരാശറിന്റെ ഓർമ. വീഴുന്നതിനിടെ മേശയിൽ തല ഇടിച്ചുവെന്നും ഏകദേശം 20 മിനിറ്റോളം ബോധരഹിതയായി കിടന്നുവെന്നും അദ്ദേഹം പറഞ്ഞു. മുഖത്ത് പരുക്കേറ്റതായും ഒരു പല്ല് നഷ്ടപ്പെട്ടതായും പരാശർ അവകാശപ്പെട്ടു. സംഭവത്തെ തുടർന്ന് ശ്രീദേവി ചിത്രീകരണത്തിൽ നിന്ന് ഇടവേള എടുത്തതോടെ സിനിമയുടെ ഷെഡ്യൂളിനെയും അത് ബാധിച്ചു. എന്നാൽ പല കാരണങ്ങളാൽ പിന്നീട് ചിത്രം പൂർത്തിയാക്കാൻ കഴിഞ്ഞില്ല. സാമ്പത്തിക പ്രശ്‌നങ്ങളും മറ്റ് പ്രതിസന്ധികളും ചിത്രത്തിന്റെ നിർമാണത്തെ ബാധിച്ചുവെന്നാണ് പരാശർ പറഞ്ഞത്. നിർമാതാവ് പിന്നീട് മരിക്കുകയും ചെയ്തു. ഇതോടെ ചിത്രം പൂർത്തിയാക്കുന്നത് കൂടുതൽ ബുദ്ധിമുട്ടായി. വർഷങ്ങൾക്കുശേഷം, നേരത്തെ ചിത്രീകരിച്ച ഭാഗങ്ങൾ ഉൾപ്പെടുത്തി ചിത്രം 2004ൽ പുറത്തിറങ്ങി.

അക്ഷയ് കുമാറും ഈ പൂർത്തിയാകാത്ത ചിത്രത്തെക്കുറിച്ച് നേരത്തെ 'കോഫി വിത്ത് കരൺ' പരിപാടിയിൽ സംസാരിച്ചിരുന്നു. ചിത്രത്തിന്റെ ക്ലൈമാക്‌സ് ചിത്രീകരിച്ചിരുന്നില്ലെന്നും പിന്നീട് പുറത്തിറങ്ങിയ പതിപ്പിൽ കഥാപാത്രങ്ങൾ ഒടുവിൽ പ്രതികാരം ചെയ്തുവെന്ന് അറിയിക്കുന്ന എഴുത്ത് ഉൾപ്പെടുത്തുകയായിരുന്നുവെന്നും അക്ഷയ് പറഞ്ഞിരുന്നു.

'ദ ന്യൂ ഇന്ത്യൻ എക്‌സ്പ്രസി'ന്‌ നൽകിയ പഴയ അഭിമുഖത്തിൽ ശ്രീദേവി ശരീരഭാരം നിയന്ത്രിക്കാനായി ചിലപ്പോഴൊക്കെ ഭക്ഷണം കഴിക്കാതെ ഇരിക്കുന്ന തരത്തിലുള്ള കർശന ഡയറ്റുകൾ പിന്തുടർന്നിരുന്നുവെന്ന് ബോണി കപൂർ പറഞ്ഞിരുന്നു. കുറഞ്ഞ രക്തസമ്മർദത്തെ തുടർന്ന് അവർക്ക് ബോധക്ഷയം സംഭവിച്ചിട്ടുണ്ടെന്നും ഇത്തരം രീതികൾ ഒഴിവാക്കണമെന്ന് ഡോക്ടർമാർ മുന്നറിയിപ്പ് നൽകിയിരുന്നുവെന്നും അദ്ദേഹം പറഞ്ഞിരുന്നു.

നടൻ നാഗാർജുന തന്നോട് പറഞ്ഞ മറ്റൊരു സംഭവവും ബോണി കപൂർ ഓർത്തെടുത്തു. മറ്റൊരു ക്രാഷ് ഡയറ്റ് പിന്തുടരുന്നതിനിടെ ശ്രീദേവി ഒരിക്കൽ കുളിമുറിയിൽ ബോധരഹിതയായി വീണെന്നും വീഴ്ചയിൽ ഒരു പല്ല് പൊട്ടിയെന്നും നാഗാർജുന പറഞ്ഞതായാണ് കപൂറിന്റെ വെളിപ്പെടുത്തൽ.

ഇന്ത്യൻ സിനിമയിലെ നിരവധി അവിസ്മരണീയ കഥാപാത്രങ്ങളിലൂടെ ശ്രീദേവിയുടെ കരിയർ ഇന്നും ഓർമിക്കപ്പെടുന്നു. എന്നാൽ അവരോടൊപ്പം പ്രവർത്തിച്ചവരുടെ ഇത്തരം പഴയ വെളിപ്പെടുത്തലുകൾ, ഒരു താരത്തിന്റെ ഗ്ലാമർ ഇമേജിന് പിന്നിൽ ശരീരത്തെക്കുറിച്ചുള്ള സമ്മർദങ്ങളും കർശനമായ ഭക്ഷണനിയന്ത്രണങ്ങളും എത്രത്തോളം ഉണ്ടായിരുന്നുവെന്നതുകൂടിയാണ് വെളിപ്പെടുന്നത്. 

കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi