‘ഞാൻ ഒരു അത്ഭുത നടനാണെന്ന് എനിക്ക് തോന്നുന്നില്ല’, ട്രോളുകൾക്ക് സൽമാന്റെ മറുപടി

കഴിഞ്ഞ കുറച്ചു വർഷങ്ങളായി ബോക്സ് ഓഫീസിൽ വലിയ ചലനമുണ്ടാക്കാൻ കഴിയാതിരുന്ന സൽമാൻ ഖാൻ, 'ബാറ്റിൽ ഓഫ് ഗാൽവാൻ' എന്ന സിനിമയിലൂടെ ശക്തമായ തിരിച്ചുവരവിന് ഒരുങ്ങുകയാണ്. ഏപ്രിൽ മാസത്തിൽ പുറത്തിറങ്ങുന്ന ഈ ചിത്രത്തിന്റെ ടീസർ സൽമാന്റെ 60-ാം ജന്മദിനത്തിലാണ് റിലീസ് ചെയ്തത്. എന്നാൽ സമ്മിശ്ര പ്രതികരണങ്ങളാണ് ടീസറിന് ലഭിച്ചത്. യുദ്ധചിത്രത്തിലെ ഒരു സൈനികന് വേണ്ട ഊർജ്ജം സൽമാന്റെ പ്രകടനത്തിൽ ഇല്ലെന്ന് പറഞ്ഞ് സോഷ്യൽ മീഡിയയിൽ വലിയ രീതിയിലുള്ള പരിഹാസങ്ങളും ട്രോളുകളുമുയർന്നിരുന്നു.

ശത്രുക്കൾക്കും തന്റെ സൈനികർക്കും ഇടയിൽ ഒരു തടിക്കഷ്ണം കൈയ്യിലേന്തി നിൽക്കുന്ന സൽമാന്റെ ടീസറിലെ രംഗമായിരുന്നു പ്രധാനമായും പരിഹസിക്കപ്പെട്ടത്. അടുത്തിടെ ഐ.എസ്.പി.എൽ പരിപാടിക്കിടെ മുൻ ക്രിക്കറ്റ് താരം മുഹമ്മദ് കൈഫുമായുള്ള സംഭാഷണത്തിൽ സൽമാൻ ട്രോളുകൾക്ക് മറുപടി നൽകി.

സിനിമയിലെ ആ രംഗം ഒന്ന് അനുകരിക്കാൻ കൈഫ് ആവശ്യപ്പെട്ടപ്പോൾ, സൽമാൻ അതേ പോസ് വീണ്ടും ചെയ്യുകയും ഇപ്രകാരം പറയുകയും ചെയ്തു: "ഇത് കണ്ടാൽ ചിലർക്ക് ഒരു റൊമാന്റിക് ലുക്ക് ആണെന്ന് തോന്നിയേക്കാം. പക്ഷേ ഞാൻ ഒരു കേണൽ ആണ് ഭയ്യാ. സ്വന്തം സൈനികർക്ക് എങ്ങനെ ആവേശം നൽകണമെന്ന് അറിയാവുന്ന ഒരു കേണലിന്റെ ഭാവമാണത്."

തുടർന്ന് ഒരു സൈനികനെപ്പോലെ അലറിക്കൊണ്ട് അദ്ദേഹം പറഞ്ഞു, ഈ വിമർശനങ്ങൾക്കൊന്നും വലിയ അർത്ഥമില്ലെന്നും തന്റെ ശൈലി എന്നും ഇങ്ങനെ തന്നെയായിരിക്കുമെന്നും അദ്ദേഹം വ്യക്തമാക്കി.

"അഭിനയം ഈ തലമുറയെ വിട്ടുപോയിരിക്കുന്നു. അതുകൊണ്ട് തന്നെ ഞാൻ ഒരു അത്ഭുത നടനാണെന്ന് എനിക്ക് തോന്നുന്നില്ല. എനിക്ക് അഭിനയിക്കാൻ അറിയില്ല, ആ നിമിഷം എന്ത് തോന്നുന്നുവോ അത് ഞാൻ ചെയ്യുന്നു, അത്രമാത്രം" റെഡ് സീ ഫിലിം ഫെസ്റ്റിവലിൽ വെച്ച് തന്റെ അഭിനയത്തെക്കുറിച്ച് അദ്ദേഹം പറഞ്ഞു.

താൻ സിനിമയിൽ കരയുന്ന രംഗങ്ങൾ കണ്ട് ആളുകൾ ചിരിക്കാറുണ്ടെന്നും അദ്ദേഹം തമാശയായി പറഞ്ഞു. എന്നാൽ "ഞങ്ങൾ താങ്കളോടൊപ്പം കരയാറാണ് പതിവ്" എന്ന് ആരാധകരും പറഞ്ഞു.

കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi

Content Highlights: Salman Khan addresses trolls regarding his acting skills and the `Battle of Galwan` teaser. Discover his candid response and what he said about his performance.