'ആറുമാസത്തിനുള്ളിൽ മരിക്കുമെന്ന് ഡോക്ടർ പറഞ്ഞു, മദ്യപിച്ച് ആളുകളോട് മോശമായി പെരുമാറി'

ഇന്ത്യൻ ടെലിവിഷനിലെ തന്നെ പ്രശസ്തരായ താരങ്ങളിലൊരാളാണ് റാം കപൂർ. ഒരുകാലത്ത് ഏറ്റവും കൂടുതൽ പ്രതിഫലം പറ്റുന്ന താരങ്ങളിലൊരാൾ കൂടിയായിരുന്നു. ഘർ ഏക് മന്ദിർ, കസം സെ, ബഡേ അഛേ ലഗ്‌തേ ഹെ, ക്യോംകി സാസ് ഭീ കഭി ബഹു ഥീ തുടങ്ങിയവയാണ് അദ്ദേഹത്തിന്റെ പ്രധാനസീരിയലുകൾ. 'ബഡേ അഛേ ലഗ്‌തേ ഹെ' എന്ന സീരിയലിൽ അദ്ദേഹത്തിന്റെ സഹതാരം സാക്ഷി തൻവർ ആയിരുന്നു. വളരെ പെട്ടെന്നാണ് റാം-സാക്ഷി ജോഡി പ്രേക്ഷകരുടെ ഇഷ്ടതാരങ്ങളായി മാറിയത്.

അതിനൊപ്പം ഒട്ടേറെ സിനിമകളിലും അഭിനയിച്ചിട്ടുണ്ട്. നെറ്റ്ഫ്‌ളിക്‌സ് സീരീസായ 'ലോക്ക് അപ്പ് 2: സച്ച് യാ സസാ' (Lock Upp: Sach Ya Sazaa) എന്ന റിയാലിറ്റി ഷോയിലെ മത്സരാർഥിയാണിപ്പോൾ റാം കപൂർ. താനേറെക്കാലം വിഷാദരോഗവുമായുള്ള പോരാട്ടത്തിലായിരുന്നുവെന്ന് പറയുകയാണ് താരം. ''ഞാൻ 27 വർഷമായി ഈ രംഗത്ത് പ്രവർത്തിക്കുന്നു. നിരവധി സിനിമകളിലും മറ്റ് പല പരിപാടികളിലും ഞാൻ അഭിനയിച്ചിട്ടുണ്ട്. എന്നിട്ടും 'ബഡേ അച്ചേ ലഗ്‌തേ ഹേൻ' എന്ന ഷോയിലൂടെയാണ് ഞാൻ കൂടുതലും അറിയപ്പെട്ടത്. അന്ന് ലോകത്തോട് ഞാൻ ഒരു രഹസ്യം മറച്ചുവെച്ചിരുന്നു; എന്റെ ഭാര്യയ്ക്ക് പോലും അത് അറിയില്ലായിരുന്നു. ആ ഷോയുടെ സമയത്ത്, എന്റെ ജീവിതത്തിലെ ഏറ്റവും കടുത്ത വിഷാദരോഗത്തിലൂടെയാണ് ഞാൻ കടന്നുപോയത്. എന്റെ ശരീരപ്രകൃതിയും അമിതഭാരവും കാരണം എനിക്ക് വലിയ തോതിലുള്ള സ്‌നേഹം ലഭിച്ചു; അതേക്കുറിച്ച് ധാരാളം ചർച്ചകൾ നടന്നതോടെ കുറച്ചുകാലത്തേക്ക് ഞാൻ ഏറ്റവും ജനപ്രിയനായ ടിവി താരമായി മാറി'', അദ്ദേഹം ഓർക്കുന്നു.

''എന്റെ ഭാരം കൂടിക്കൊണ്ടേയിരുന്നു. ആരോഗ്യം വല്ലാതെ മോശമായെന്നും ആറു മാസത്തിനുള്ളിൽ മരണം വരെ സംഭവിക്കാമെന്നും ഡോക്ടർമാർ മുന്നറിയിപ്പ് നൽകി. ദിവസവും മൂന്നുനേരം ഇൻസുലിൻ എടുത്തിരുന്നതിനാൽ പ്രമേഹം മൂലമുള്ള പക്ഷാഘാതം (diabetic stroke) ഉണ്ടാകാൻ സാധ്യതയുണ്ടായിരുന്നു. രക്തത്തിലെ പഞ്ചസാരയുടെ അളവ് 400-നും 600-നും ഇടയിലായിരുന്നു. ഒപ്പം ദിവസവും 14 മണിക്കൂർ ജോലി ചെയ്യുകയും ചെയ്തിരുന്നു. അമിതമായ സ്‌നേഹവും മികച്ച വരുമാനവും ലഭിച്ചിരുന്നതുകൊണ്ട് ഇതിനെക്കുറിച്ച് ഒന്നും ചെയ്യാൻ എനിക്ക് തോന്നിയില്ല. അതെല്ലാം ഉപേക്ഷിച്ച് എങ്ങനെ മാറിനിൽക്കാൻ കഴിയും? ഒടുവിൽ ഞാൻ ശാരീരികമായി വളരെ മോശമായ അവസ്ഥയിലായി''.

തന്റെ സ്വഭാവം തന്നെ അക്കാലത്ത് മാറിപ്പോയെന്നും അദ്ദേഹം പറയുന്നു. ''പലപ്പോഴും ഷൂട്ടിങ്ങിനെത്താൻ വൈകി. ചില ദിവസങ്ങളിൽ ആറുമണിക്കൂർ വരെ വൈകിയാണ് സെറ്റിലെത്തിയത്. സെറ്റിൽ വെച്ച് മദ്യപിക്കുകയും ആളുകളോട് വളരെ മോശമായി പെരുമാറുകയും ചെയ്തു. ഞാനൊരു രാക്ഷസനെപ്പോലെയായി മാറി. ഒടുവിൽ, എന്റെ കാരണത്താൽ ആ ഷോ അവസാനിച്ചു. സ്വയം ഓർക്കുമ്പോൾ ലജ്ജ തോന്നുന്ന തരത്തിലുള്ള ഒരാളായി ഞാൻ മാറിയിരുന്നു''. കുറച്ചുനാളെടുത്താണ് പിന്നീട് അദ്ദേഹത്തിന്റെ മാനസികാരോഗ്യം നേരെയായത്.

നടി ഗൗതമി കപൂറാണ് റാമിന്റെ പങ്കാളി. ഘർ ഏക് മന്ദിർ എന്ന സീരിയൽ സെറ്റിൽവെച്ചാണ് ഇരുവരും ആദ്യമായി കണ്ടുമുട്ടുന്നത്. ആ പരിചയം പ്രണയമായി. മൂന്നുവർഷത്തിനുള്ളിൽ അവർ വിവാഹം കഴിച്ചു.

കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi

Content Highlights: Ram Kapoor discusses his 27-year career and hidden struggle with depression. The actor reveals a severe health crisis where doctors predicted a six-month survival window.