മരണത്തിന് മുൻപ് മാർപ്പാപ്പ നൽകിയ ഈസ്റ്റർ സന്ദേശം

2025 ഏപ്രിൽ 21 ഈസ്റ്റർ തിങ്കളാഴ്ചയായിരുന്നു ഫ്രാൻസിസ് മാർപ്പാപ്പയുടെ വിയോഗം. പ്രത്യാശ, പുനരുജ്ജീവനം, ഉയിർപ്പ് എന്നിവയുടെ പ്രതീകമാണ് വിശ്വാസികൾക്ക് ഈസ്റ്റർ. എന്നാൽ കഴിഞ്ഞ വർഷത്തെ ഈസ്റ്റർ വിശ്വാസികളിൽ വേദന നിറച്ചാണ് കടന്നുപോയത്. 88 കാരനായ മാർപ്പാപ്പയുടെ നിര്യാണം വത്തിക്കാൻ സിറ്റിയിലെ ഡൊമസ് സാങ്ടേ മാർത്തയിലെ വസതിയിൽ വെച്ചായിരുന്നു. പാർശ്വവൽക്കരിക്കപ്പെട്ടവരുടെ ശബ്ദമായി പന്ത്രണ്ട് വർഷത്തോളം വിശ്വാസികളെ നയിച്ച ഒരു മാർപ്പാപ്പ. ഈസ്റ്റർ തിങ്കളാഴ്ച സംഭവിച്ച മാർപ്പാപ്പയുടെ വിയോഗത്തിന് പ്രതീകാത്മക മാനങ്ങളുണ്ട്.

മരണത്തിന് കേവലം മണിക്കൂറുകൾക്ക് മുൻപായിരുന്നു മാർപ്പാപ്പ ഈസ്റ്റർ സന്ദേശം നൽകിയത്. തന്റെ അവസാന ഈസ്റ്റർ സന്ദേശത്തിൽ, വിദ്വേഷത്തിനുമേലുള്ള സ്‌നേഹത്തിന്റെ വിജയവും നിരാശയുടെമേലുള്ള പ്രത്യാശയുടെ വിജയവുമായിരുന്നു മാർപാപ്പയുടെ വിഷയം. ക്രിസ്തുവിന്റെ വിജയം മാനവ ജീവിതത്തിന് അർത്ഥവും ശക്തിയും നൽകുന്നുവെന്ന് അദ്ദേഹം വിശ്വാസികളെ ഓർമ്മിപ്പിച്ചു. ദുരിതമനുഭവിക്കുന്നവരെ അദ്ദേഹം സാന്ത്വനിപ്പിച്ചു. അവരുടെ വേദന ദൈവം കാണുന്നുവെന്നും ഉയിർത്ത ക്രിസ്തുവിൽ അടിയുറച്ച പ്രത്യാശ ഒരിക്കലും നിരാശപ്പെടുത്തില്ലെന്നും മാർപ്പാപ്പ ഊന്നിപ്പറഞ്ഞു. ഗർഭസ്ഥ ശിശുക്കൾ മുതൽ വൃദ്ധരും ദുർബലരുമായ എല്ലാവരുടെയും അന്തസ്സ് ഉയർത്തിപ്പിടിക്കാൻ മനുഷ്യരാശിയോട് അഭ്യർത്ഥിച്ചുകൊണ്ടാണ് അദ്ദേഹം അവസാനിപ്പിച്ചത്. സ്‌നേഹത്തിന്റെയും സാഹോദര്യത്തിന്റെയും കാരുണ്യത്തിന്റെയും വാക്കുകൾ. 

പൊടുന്നനെയുണ്ടായ ഗുരുതര തളർച്ചയോടെയാണ് അദ്ദേഹം അവസാന മണിക്കൂറുകൾ പിന്നിട്ടത്. രാവിലെ ഏകദേശം 05:30-ന്, മാർപ്പാപ്പയുടെ ആരോഗ്യം വഷളായി. അദ്ദേഹത്തിന്റെ ഡോക്ടർ, ഡോ. സെർജിയോ അൽഫിയേരി, മാർപ്പാപ്പയ്ക്ക് പക്ഷാഘാതം സംഭവിച്ചതായി സ്ഥിരീകരിച്ചു. തുടർചികിത്സ ഫലപ്രദമല്ലാത്തതിനാൽ അദ്ദേഹത്തെ ആശുപത്രിയിലേക്ക് മാറ്റേണ്ടതില്ലെന്ന് തീരുമാനിച്ചു. ഏതാനും മണിക്കൂറുകൾക്കുള്ളിൽ, യാതൊരു ശാരീരിക വേദനയും പ്രകടമാക്കാതെ സമാധാനപരമായ മരണം സംഭവിച്ചു. രാവിലെ 09:45-ന് കാമർലെംഗോയായ കാർഡിനൽ കെവിൻ ഫാരെൽ വത്തിക്കാൻ മീഡിയ വഴി അദ്ദേഹത്തിന്റെ മരണത്തെക്കുറിച്ചുള്ള ഔദ്യോഗിക പ്രഖ്യാപനം നടത്തി.

സ്‌ട്രോക്ക് കോമയിലേക്കും ഹൃദയസ്തംഭനത്തിലേക്കും നയിച്ചതാണ് മരണകാരണമെന്ന് പിന്നീട് വത്തിക്കാൻ സ്ഥിരീകരിച്ചു. ടൈപ്പ് 2 പ്രമേഹം, ഉയർന്ന രക്തസമ്മർദ്ദം എന്നിവ ഉൾപ്പെടെയുള്ള ആരോഗ്യ പ്രശ്‌നങ്ങൾ അദ്ദേഹത്തിനുണ്ടായിരുന്നെന്ന് അദ്ദേഹത്തിന്റെ മെഡിക്കൽ ചരിത്രം സാക്ഷ്യപ്പെടുത്തുന്നു. വർഷത്തിന്റെ തുടക്കത്തിൽ ശ്വാസകോശ അണുബാധ കാരണം അദ്ദേഹം 38 ദിവസം നീണ്ട ആശുപത്രിവാസത്തിന് വിധേയനായിരുന്നു. സുഖം പ്രാപിച്ച ശേഷം മാർച്ച് മാസത്തിൽ വത്തിക്കാനിലേക്ക് തിരിച്ചെത്തിയെങ്കിലും അവശത വിട്ടുമാറിയിരുന്നില്ല.

കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi

Content Highlights: Final Easter message focused on the triumph of love over hate and hope over despair., Advocated for the dignity of all, from the unborn to the elderly., Details on his medical history including stroke, diabetes, and hypertension., Official announcement of his passing by Cardinal Kevin Farrell on Easter Monday.