പാകിസ്താനില് പാലസ്തീനി ഭീകരര് വിമാനം റാഞ്ചാന് ശ്രമിച്ചപ്പോള് ഇന്ത്യക്കാരി നീരജ രക്തസാക്ഷിയായി
ധൈര്യത്തെ ഭയം മറികടക്കുന്ന ലോകത്ത്, നിസ്വാര്ഥമായ ധീരതയുടെ മുഖമാണ് നീരജ ഭാനോട്ട്. 1986 സെപ്റ്റംബര് 5-ന് പാകിസ്താനിലെ കറാച്ചി വിമാനത്താവളത്തില് ഭീകരര് വിമാനം ഹൈജാക്ക് ചെയ്യാന് ശ്രമിച്ചപ്പോള് നൂറുകണക്കിന് യാത്രക്കാരെ രക്ഷിക്കാനായി ജീവന് ബലിയര്പ്പിച്ച വനിത. ഇന്ത്യക്കാരിയായ നീരജ 23-ാം പിറന്നാള് ആഘോഷിക്കാന് ദിവസങ്ങള് ബാക്കിനില്ക്കെയായിരുന്നു ദാരുണമായ സംഭവം.
അതിരാവിലെയാണ് എല്ലാത്തിനും തുടക്കം. 379 യാത്രക്കാരും ജീവനക്കാരുമായി അമേരിക്കന് വിമാനമായ പാന് ആം ഫ്ലൈറ്റ് 73 മുംബൈയില് നിന്ന് ന്യൂയോര്ക്കിലേക്ക് പുറപ്പെട്ടു. പാകിസ്താനിലെ കറാച്ചിയിലും ഫ്രാങ്ക്ഫര്ട്ടിലും സ്റ്റോപ്പുണ്ടായിരുന്നു. കറാച്ചിയില് വിമാനമിറക്കിയപ്പോള് ആയുധധാരികളായ നാലു ഭീകരര് അതില് കയറി. അബു നിഡാല് ഓര്ഗനൈസേഷന് എന്ന പാലസ്തീനി ഭീകരസംഘടനയിലെ നാല് സായുധ തീവ്രവാദികളായിരുന്നു അത്. വിമാനം റാഞ്ചുകയായിരുന്നു ഉദ്ദേശം.
സാഹചര്യത്തിന്റെ ഗൗരവമുള്ക്കൊണ്ട നീരജ ഉടനെ കോക്ക്പിറ്റ് ക്രൂവിനെ വിവരമറിയിച്ചു. മൂന്നംഗ അമേരിക്കന് കോക്ക്പിറ്റ് ക്രൂ (പൈലറ്റ്, സഹപൈലറ്റ്, ഫ്ലൈറ്റ് എഞ്ചിനീയര്) സംഘം തങ്ങള്ക്കു പരിശീലനം ലഭിച്ചതുപ്രകാരം വിമാനത്തില് നിന്ന് രക്ഷപ്പെട്ടു. കോക്ക്പിറ്റ് ക്രൂ ഇല്ലാതെ വന്നതോടെ ഭീകരരുടെ ഇച്ഛയ്ക്കൊത്ത് വിമാനം മറ്റെവിടേക്കെങ്കിലും കൊണ്ടുപോവാനുള്ള ശ്രമം പൊളിഞ്ഞു. വിമാനത്തില് അവശേഷിച്ചവരില് ഏറ്റവും മുതിര്ന്ന ഉദ്യോഗസ്ഥ നീരജയായിരുന്നു.
അടുത്ത 17 മണിക്കൂര് ബന്ധിയാക്കപ്പെട്ടവരെ മോചിപ്പിക്കാനുള്ള ചര്ച്ചകളായിരുന്നു. ഇതിനിടെ, നീരജ യാത്രക്കാരുടെ ജീവനാഡിയായി മാറി. പ്രതിസന്ധിയെ ശാന്തമായി കൈകാര്യം ചെയ്തു, അമേരിക്കന് യാത്രക്കാരെ ലക്ഷ്യമിട്ടാണ് ഭീകരര് വിമാനം റാഞ്ചിയത്. എന്നാല് യാത്രക്കാരെ സംരക്ഷിക്കാന് 41-ഓളം അമേരിക്കന് യാത്രക്കാരുടെ പാസ്പോര്ട്ടുകള് അവര് മറച്ചുവച്ചു, ഭയന്നുപോയ കുട്ടികള്ക്ക് ആശ്വാസമേകി. ഭക്ഷണവും വെള്ളവും വിതരണം ചെയ്തുവെന്ന് ഉറപ്പാക്കി. പക്ഷേ, ചര്ച്ചകള് പരാജയപ്പെട്ടതോടെ ഭീകരര് യാത്രക്കാര്ക്കുനേരെ വെടിയുതിര്ത്തു. സ്ഫോടകവസ്തുക്കള് പ്രയോഗിക്കുകയും ചെയ്തു. അപ്പോഴും നീരജ മനസ്സു കൈവിട്ടില്ല. എമര്ജന്സി എക്സിറ്റ് തുറന്ന് യാത്രക്കാരെ പുറത്തേക്ക് നയിച്ചു. ജീവന് കൈയിലെടുത്ത് മൂന്ന് കുട്ടികളെ വെടിയുണ്ടകളില് നിന്ന് രക്ഷിക്കുന്നതിനിടെ അവര്ക്കും വെടിയേറ്റു.
നീരജയെ മറ്റുള്ളവര് കാണുമ്പോള് അവരുടെ പുറകുഭാഗത്ത് വെടിയേറ്റിരുന്നു. രക്തം ഒഴുകിക്കൊണ്ടിരുന്നു. കറാച്ചിയിലെ ജിന്ന ആശുപത്രിയിലെത്തിച്ചപ്പോഴും നീരജയ്ക്ക് ജീവനുണ്ട്. പക്ഷേ, ചികിത്സകിട്ടാന് വൈകിയതുകാരണം മരണത്തിനു കീഴടങ്ങി. വിമാനത്താവളത്തില് ചികിത്സാസൗകര്യങ്ങളൊന്നും തന്നെ അന്നുണ്ടായിരുന്നില്ല. ഒരു സ്ട്രക്ച്ചര് പോലുമില്ലാതെയാണ് കിലോമീറ്ററുകള്ക്ക് അപ്പുറമുള്ള ആശുപത്രിയിലേക്ക് നീരജയെ കൊണ്ടുപോയതെന്ന് ഒപ്പമുണ്ടായിരുന്ന ജീവനക്കാര് ആരോപിച്ചിരുന്നു.
നീരജയടക്കം 20 പേരാണ് അന്ന് വെടിവെപ്പില് കൊല്ലപ്പെട്ടത്. ഒട്ടേറെപ്പേര്ക്ക് പരിക്കേല്ക്കുകയും ചെയ്തു. 1963-ല് ചണ്ഡീഗഡിലെ പുരോഗമനവാദികളായ പഞ്ചാബി കുടുംബത്തിലാണ് നീരജ ജനിച്ചത്. നീരജ പിന്നീട് മുംബൈയിലേക്ക് താമസം മാറി, അവിടെ മോഡലിങ് പഠിച്ചു, പരസ്യചിത്രങ്ങളിലെല്ലാം സജീവമായിരുന്നു. പിന്നീട് 'പാന് അമേരിക്കന് വേള്ഡ് എയര്വേസി'ല് ഫ്ലൈറ്റ് പേഴ്സറായി ചേരുകയായിരുന്നു. ബുദ്ധിശക്തി, അനുകമ്പ, കര്ത്തവ്യബോധവും അവരെ നല്ലൊരു പ്രൊഫഷണലാക്കി.
ഇന്ത്യയുടെ ഏറ്റവും ഉയര്ന്ന ധീരതാ പുരസ്കാരമായ അശോക ചക്രയ്ക്ക് മരണാനന്തരം നീരജ ഭാനോട്ട് അര്ഹയായി, പുരസ്കാരം നേടുന്ന ഏറ്റവും പ്രായം കുറഞ്ഞ വ്യക്തിയായിരുന്നു അവര്. അമേരിക്കയും പാകിസ്താനും അന്നവരുടെ ധീരതയെ ആദരിച്ചു. 2004-ല് ഇന്ത്യന് പോസ്റ്റല് സര്വീസ് അവരുടെ സ്മരണയ്ക്കായി ഒരു സ്റ്റാമ്പ് പുറത്തിറക്കി.
ആരാണ് അബു നിഡാല് ഓര്ഗനൈസേഷന് എന്ന ഭീകരസംഘടന?
പാലസ്തീന്റെ പ്രതിനിധികളായി അന്താരാഷ്ട്രതലത്തില് അംഗീകരിക്കപ്പെട്ട ദേശീയസഖ്യമാണ് പാലസ്തീന് ലിബറേഷന് ഓര്ഗനൈസേഷന് (പിഎല്ഒ). പാലസ്തീന് പ്രസിഡന്റായിരുന്ന യാസര് അറഫാത്തായിരുന്നു ദീര്ഘകാലം പിഎല്ഓയുടെയും തലവന്. എന്നാല് പിഎല്ഒ നേതൃത്വത്തിന്റെ മിതവാദത്തോട് എതിര്പ്പുള്ളവര് സംഘടനയ്ക്കുള്ളിലുണ്ടായിരുന്നു. അങ്ങനെ യാസര് അറഫാത്തിന്റെ ഫതഹ് പ്രസ്ഥാനത്തില് നിന്ന് വേര്പിരിഞ്ഞുപോന്ന തീവ്രസ്വഭാവമുള്ള അബു നിഡാലും സംഘവുമാണ് 1974-ല് അബു നിഡാല് ഓര്ഗനൈസേഷന് എന്ന ഭീകരസംഘടനയ്ക്ക് രൂപംനല്കിയത്. ഇസ്രായേലുമായുള്ള ചര്ച്ചയെയും സമാധാന പ്രക്രിയയെയും കാലങ്ങളായി എതിര്ത്ത സംഘടനയുടെ മുഖമുദ്ര അക്രമം തന്നെയായിരുന്നു. 20 രാജ്യങ്ങളിലായി 90 ലധികം ആക്രമണങ്ങള് ഈ സംഘം നടത്തിയിട്ടുണ്ട്. പലപ്പോഴും സിവിലിയന്മാരെയും നയതന്ത്രജ്ഞരെയും വിമാനത്താവളങ്ങളെയും ലക്ഷ്യം വച്ചായിരുന്നു ഇത്.
ഇസ്രായേല് വിരുദ്ധതയുടെ പേരില് ലോകത്തുടനീളം ആക്രമണം നടത്തിയ സംഘടനയാണിത്. യുഎസ്., യൂറോപ്യന് യൂണിയന് ഇസ്രായേല് അടക്കമുള്ള രാജ്യങ്ങള് തീവ്രവാദ സംഘടനയായി പ്രഖ്യാപിച്ചു.
റോമിലെയും വിയന്നയിലെയും വിമാനത്താവളങ്ങളില് 1985-ല് തോക്കുധാരികള് നടത്തിയ വെടിവെപ്പില് 19 പേര് കൊല്ലപ്പെട്ടിരുന്നു. സമാധാന ചര്ച്ചകളെ പിന്തുണച്ച മിതവാദികളായ പലസ്തീന് നേതാക്കള്ക്കും നയതന്ത്രജ്ഞര്ക്കും നേരെ വധശ്രമങ്ങളുണ്ടായി. പലയിടത്തും ബോംബാക്രമണങ്ങള് നടത്തി. കൊലപാതകങ്ങള്, ബോംബാക്രമണങ്ങള്, ബന്ദികളാക്കല് എന്നിവയുള്പ്പെടെ സംഘടനയുടെ തന്ത്രങ്ങള് അങ്ങേയറ്റം ക്രൂരവും വിവേചനരഹിതവുമായിരുന്നു.
അതേസമയം, നീരജയുടെ കുടുംബം സ്ഥാപിച്ച നീരജ ഭാനോട്ട് ഫൗണ്ടേഷന്, സാമൂഹിക അനീതിയെ ധൈര്യത്തോടെയും ദൃഢനിശ്ചയത്തോടെയും നേരിടുന്ന സ്ത്രീകളെ അംഗീകരിച്ചുപോരുന്നു. 2016 ല്, 'നീരജ' എന്നപേരില് അവരുടെ ജീവിതം സിനിമയായി. സോനം കപൂര് ആയിരുന്നു നായിക. പദവിയും ശക്തിയും കൊണ്ടല്ല, മറിച്ച് ഇരുട്ടിനെ നേരിടുമ്പോള് നാം എടുക്കുന്ന തിരഞ്ഞെടുപ്പുകളിലൂടെയാണ് വീരത്വം അളക്കുന്നതെന്ന് ഭാനോട്ടിന്റെ കഥ നമ്മെ ഓര്മ്മിപ്പിക്കുന്നു.
തയ്യാറാക്കിയത്: ഷിനില മാത്തോട്ടത്തില്
Content Highlights: neerja bhanot indian flight purser who lost life while saving passengers in a terrorist attack