ഒറ്റയ്ക്ക് ജീവിക്കുന്ന സ്ത്രീകൾക്ക് ചില സാമ്പത്തിക തന്ത്രങ്ങൾ

സോഷ്യൽ മീഡിയയിൽ 'സോളോ ട്രിപ്പ്' ചിത്രങ്ങൾ പോസ്റ്റ് ചെയ്യുമ്പോഴും കഫേകളിൽ ഇരുന്ന് ഒറ്റയ്ക്ക് കോഫി സിപ്പ് ചെയ്യുമ്പോഴും ലഭിക്കുന്ന ആ ഒരു മാസ് ഫീൽ ഉണ്ടല്ലോ, അത് തന്നെയാണ് പുതിയ കാലത്തെ സിംഗിൾ ലൈഫ്! എന്നാൽ ആ റീലുകൾക്കും ഇൻസ്റ്റാ സ്റ്റോറികൾക്കും അപ്പുറം, ഒറ്റയ്ക്ക് ജീവിക്കുന്ന ഒരു സ്ത്രീയുടെ യഥാർത്ഥ കരുത്ത് അവളുടെ ബാങ്ക് ബാലൻസിലാണ് ഒളിഞ്ഞിരിക്കുന്നത്. വിവാഹം കഴിക്കാതെ സ്വന്തം വഴി തിരഞ്ഞെടുക്കുന്നവരും, സാഹചര്യങ്ങൾ കൊണ്ട് ഒറ്റയ്ക്ക് ജീവിക്കേണ്ടി വരുന്നവരുമായ പെൺകുട്ടികളുടെ എണ്ണം നമ്മുടെ നാട്ടിലും ഉയരുകയാണ്. പ്രത്യേകിച്ച് ജെൻസി (Gen Z), മില്ലെനിയൽ തലമുറയിൽ പെട്ടവർ 'മൈ ലൈഫ് മൈ ചോയ്‌സ്' എന്ന് ഉറക്കെ പറയുമ്പോൾ, അതിന് പിന്നിൽ ഉറപ്പുള്ള ഒരു ഫിനാൻഷ്യൽ ബാക്കപ്പ് ആവശ്യമുണ്ട്. അല്ലെങ്കിൽ കാര്യങ്ങൾ ഇത്തിരി പണിയാകും! ആരും പറഞ്ഞുതരാത്ത, എന്നാൽ നമ്മൾ അറിഞ്ഞിരിക്കേണ്ട ആ സിംഗിൾ ഫിനാൻസ് തന്ത്രങ്ങളെക്കുറിച്ച് സംസാരിക്കാം.

1. ഒറ്റയ്ക്ക് ജീവിക്കുന്നതിനെ ഒരു ഡിജിറ്റൽ സബ്‌സ്‌ക്രിപ്ഷൻ പ്ലാൻ പോലെ കാണുക. ഡ്യുവൽ ഇൻകം ഉള്ള കുടുംബങ്ങളിൽ ചെലവുകൾ പങ്കുവെക്കപ്പെടും. അവിടെ ഒരാൾക്ക് പ്രഷർ വന്നാൽ മറ്റേയാൾ ഒരു സാമ്പത്തിക 'ഹോട്ട്‌സ്‌പോട്ട്' ആയി മാറും. എന്നാൽ സിംഗിൾ ലൈഫിൽ നിങ്ങളാണ് വൈഫൈയും നിങ്ങളാണ് ഡാറ്റയും! ഇവിടെ 'പ്ലാൻ ബി' എന്നൊരു ആളില്ല, നിങ്ങൾ തന്നെയാണ് പ്ലാൻ എ-യും പ്ലാൻ ബി-യും. ഈ ഒരു തിരിച്ചറിവാണ് നിങ്ങളുടെ സാമ്പത്തിക അടിത്തറ പണിയാനുള്ള ആദ്യ പടി.