‘ഭാര്യ വിമർശിക്കാറുണ്ടായിരുന്നു; വിവാഹബന്ധം പരിഹരിക്കാനാവാത്ത വിധം തകർന്നു'

തമിഴ് സൂപ്പർസ്റ്റാറും തമിഴക വെട്രി കഴകം (TVK) തലവനുമായ വിജയ്‌യുടെ ദാമ്പത്യ ജീവിതം വലിയ പ്രതിസന്ധിഘട്ടത്തിലൂടെയാണ് കടന്നുപോകുന്നത്. തന്റെ ഭർത്താവായ വിജയ്‌ക്കെതിരെ അവിഹിത ബന്ധം ആരോപിച്ചുകൊണ്ട് ഭാര്യ സംഗീത, ചെങ്കൽപട്ട് ജില്ലാ കോടതിയിൽ വിവാഹമോചന ഹർജി നൽകിയതായി വാർത്തകൾ പുറത്തുവന്നിരുന്നു.

വിജയ്‌യുടെ പഴയൊരു അഭിമുഖം ഇപ്പോൾ സോഷ്യൽ മീഡിയയിൽ വൈറലായിക്കൊണ്ടിരിക്കുകയാണ്. 2022-ൽ സൺ ടിവിയിൽ സംവിധായകൻ നെൽസൺ ദിലീപ് കുമാറുമായുള്ള സംഭാഷണത്തിനിടെ, തന്റെ സിനിമ തിരഞ്ഞെടുപ്പുകളെ സൂക്ഷ്മമായി നിരീക്ഷിക്കുന്ന 'കർക്കശക്കാരിയായ വിമർശക'യാണ് (strict critic) സംഗീതയെന്ന് വിജയ് പറഞ്ഞിരുന്നു. വിജയ്‌യുടെ പിതാവും സംവിധായകനുമായ എസ്.എ. ചന്ദ്രശേഖറും മുൻപ് ഒരു അഭിമുഖത്തിൽ, വിജയ് പലരുടെയും വാക്കുകൾ കേൾക്കാറില്ലെങ്കിലും സംഗീതയുടെ അഭിപ്രായങ്ങളെ വളരെയധികം വിലമതിക്കാറുണ്ടെന്നും, അവർ അവനെ 'കർശനമായി' നിരീക്ഷിക്കാറുണ്ടെന്നും പറഞ്ഞിരുന്നു.

2021 ഏപ്രിലിൽ ഒരു നടിയുമായി വിജയ്‌ക്ക് അവിഹിത ബന്ധമുള്ളതായി സംഗീത കണ്ടെത്തിയെന്ന് വിവാഹമോചന ഹർജിയിൽ പറയുന്നു. ഈ സംഭവം തനിക്ക് വലിയ മാനസിക വേദന ഉണ്ടാക്കിയതായി അവർ ആരോപിക്കുന്നു. വിജയ് ഈ ബന്ധം അവസാനിപ്പിക്കാമെന്ന് ആദ്യം ഉറപ്പ് നൽകിയിരുന്നെങ്കിലും അത് തുടർന്നു എന്നാണ് ആരോപണം. ഇത് മാനസിക ക്രൂരതയായും, സോഷ്യൽ മീഡിയ പോസ്റ്റുകളിലൂടെയുണ്ടായ പൊതുജനമധ്യത്തിലുള്ള അപമാനമായും, അവഗണനയായും അവർ ചൂണ്ടിക്കാട്ടുന്നു.

2021 സെപ്റ്റംബർ മുതൽ 2022 ഫെബ്രുവരി വരെയും, പിന്നീട് 2024 ഓഗസ്റ്റ് മുതൽ 2025 ഫെബ്രുവരി വരെയും നിയമപരമായ മാർഗ്ഗങ്ങളിലൂടെയും വ്യക്തിപരമായ ചർച്ചകളിലൂടെയും അനുരഞ്ജനത്തിന് ശ്രമിച്ചെങ്കിലും ഫലമുണ്ടായില്ലെന്നും ഹർജിയിൽ പറയുന്നു.

വിവാഹബന്ധം 'പരിഹരിക്കാനാവാത്ത വിധം തകർന്നു' (irretrievably broken down) എന്ന് ഹർജിയിൽ വ്യക്തമാക്കുന്നു. വിവാഹമോചനത്തിന് പുറമെ, വിജയ്‌യുടെ വരുമാനത്തിനും സാമൂഹിക പദവിക്കും അനുസരിച്ചുള്ള സ്ഥിരമായ ജീവനാംശം (permanent alimony) വേണമെന്നും, നീലങ്കരയിലുള്ള ഭവനത്തിൽ തുടർന്നും താമസിക്കാൻ അനുവദിക്കണമെന്നും, അല്ലെങ്കിൽ അതിന് തുല്യമായ താമസസൗകര്യം ഒരുക്കി നൽകണമെന്നും അവർ ആവശ്യപ്പെട്ടിട്ടുണ്ട്. കൂടാതെ, കേസിന്റെ നടപടികൾ മാന്യതയും സ്വകാര്യതയും കണക്കിലെടുത്ത് അടച്ചിട്ട കോടതിമുറിയിൽ നടത്തണമെന്നും അവർ ആവശ്യപ്പെട്ടു.

ഏകദേശം മൂന്ന് പതിറ്റാണ്ടോളം നീണ്ട ദാമ്പത്യ ബന്ധമാണ് ഇപ്പോൾ തകർച്ചയിലേക്ക് നീങ്ങുന്നത്. 'പൂവേ ഉനക്കാഗ' എന്ന സിനിമയുടെ വിജയത്തിന് ശേഷം 1996-ലാണ് ഇവർ കണ്ടുമുട്ടുന്നത്. ലണ്ടനിലെ ഒരു ശ്രീലങ്കൻ തമിഴ് വ്യവസായിയുടെ മകളായ സംഗീത, വിജയ്‌യുടെ അഭിനയം കണ്ട് ആരാധികയായി മാറുകയും ചെന്നൈയിൽ വെച്ച് അദ്ദേഹത്തെ കാണുകയുമായിരുന്നു. ഇത് പിന്നീട് പ്രണയമായി മാറി.

വിജയ്‌യുടെ മാതാപിതാക്കളുടെ സമ്മതത്തോടെ 1998 ജൂലൈ 10-ന് യുകെയിൽ വെച്ച് രജിസ്റ്റർ ചെയ്ത ഇവർ, 1999 ഓഗസ്റ്റ് 25-ന് ചെന്നൈയിൽ വെച്ച് പരമ്പരാഗത ഹൈന്ദവ ആചാരപ്രകാരം വിവാഹിതരായി. ജേസൺ സഞ്ജയ്, ദിവ്യ എന്നിങ്ങനെ രണ്ട് മക്കളുണ്ട്. ഇക്കഴിഞ്ഞ രണ്ട് വർഷമായി ഇവർ വേർപിരിഞ്ഞാണ് താമസിക്കുന്നതെന്നാണ് റിപ്പോർട്ടുകൾ.

2026-ലെ തമിഴ്‌നാട് നിയമസഭാ തിരഞ്ഞെടുപ്പിലേക്ക് തന്റെ പാർട്ടിയെ നയിക്കാൻ തയ്യാറെടുക്കുന്ന വിജയ്‌യെ സംബന്ധിച്ചിടത്തോളം, വ്യക്തിജീവിതത്തിലെ ഈ തിരിച്ചടി വളരെ നിർണ്ണായകമായ ഒരു ഘട്ടത്തിലാണ് ഉണ്ടായിരിക്കുന്നത്.

കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi

Content Highlights: Sangeetha files for divorce in Chengalpattu court., Alleges an extramarital affair by Vijay since 2021., Claims the marriage is 'irretrievably broken down.', Seeks permanent alimony and right to residence., The couple has reportedly been separated for two years.