വിഷക്കൂൺ ഉള്ളിൽച്ചെന്നാൽ മരണം സംഭവിച്ചേക്കാം; നല്ല കൂൺ തിരഞ്ഞെടുക്കാൻ വഴികൾ
കൂണുകള് പച്ചക്കറിയല്ല, വിത്തുകളോ വേരുകളോ സൂര്യപ്രകാശമോ ഇല്ലാതെ വളരുന്ന ഫംഗസാണ്. നിരവധി ആരോഗ്യഗുണങ്ങളാണ് കൂണുകള്ക്കുള്ളത്. കൂണില് കലോറി കുറവാണ്. നാരുകളാലും ആന്റിഓക്സിഡന്റുകളാലും കൂണുകള് സമ്പുഷ്ടമാണ്. കൂടാതെ, ബി വിറ്റാമിനുകള്, സെലിനിയം, പൊട്ടാസ്യം, വിറ്റാമിന് ഡി തുടങ്ങിയ അവശ്യ വിറ്റാമിനുകളും ധാതുക്കളും കൂണില് അടങ്ങിയിരിക്കുന്നു. കൂണുകള് പതിവായി കഴിക്കുന്നത് രോഗപ്രതിരോധ ശേഷി വര്ധിപ്പിക്കാനും ദഹനവ്യവസ്ഥയുടെ ആരോഗ്യം മെച്ചപ്പെടുത്താനും ശരീരത്തിലെ വീക്കം കുറയ്ക്കാനും സഹായിക്കും.
വിഷക്കൂണുകള്
ഭക്ഷ്യയോഗ്യമായ ഇനങ്ങളോടൊപ്പം, ഗുരുതരമായ വിഷാംശമുള്ളതും മാരകവുമായ കൂണുകളും പ്രകൃതിയിലുണ്ട്. വിഷക്കൂണുകള് കാഴ്ചയില് തിരിച്ചറിയാന് ബുദ്ധിമുട്ടാണ്. 'മൃഗങ്ങള്ക്ക് കഴിക്കാമെങ്കില് അവ സുരക്ഷിതമായിരിക്കും അല്ലെങ്കില് തൊലി കളഞ്ഞാല് ശരിയാകും’ തുടങ്ങിയ മിഥ്യാധാരണകള് വേണ്ട്. അമാനിറ്റാസ് പോലുള്ള മാരകമായ ഇനങ്ങള് കാഴ്ചയില് നിരുപദ്രവകരമായി തോന്നാമെങ്കിലും, ചെറിയ അളവില് പോലും മാരകമായേക്കാം. ഇക്കാരണത്താല്, വിഷക്കൂണുകള് തിരിച്ചറിഞ്ഞ് ഒഴിവാക്കാനറിയണം. വിഷക്കൂണ് കഴിച്ചാല് ഗുരുതരമായ വിഷബാധ, അവയവങ്ങളുടെ പ്രവര്ത്തനം നിലയ്ക്കല്, മരണം എന്നിവയ്ക്ക് കാരണമായേക്കും.
വിഷരഹിതവുമായ കൂണുകള് എങ്ങനെ തിരഞ്ഞെടുക്കാം
- വെളുത്ത ചെകിളകളുള്ള കൂണുകള് പറിക്കുന്നത് ഒഴിവാക്കുക. മാരകമായ പല അമാനിറ്റാ ഇനങ്ങള്ക്കും ഈ സ്വഭാവമുണ്ട്.
- തണ്ടില് തള്ളിനില്ക്കുന്നതോ മോതിരം പോലുള്ളതോ ആയ ഭാഗവും, ചുവട്ടില് ഉരുണ്ടതോ സഞ്ചിപോലുള്ളതോ ആയ ഭാഗവും ഉള്ള കൂണുകള് ഒഴിവാക്കാം. ഇവ കടുത്ത വിഷമുള്ള ഇനങ്ങളുടെ സാധാരണ ലക്ഷണങ്ങളാണ്.
- കുടയിലോ തണ്ടിലോ ചുവപ്പ് നിറമുള്ള കൂണുകള് ഒഴിവാക്കണം. വിഷമുള്ള പല ഇനങ്ങള്ക്കും ചുവപ്പ് നിറമുണ്ട്.
- ഉറപ്പുള്ളതും, ചതവുകളോ വഴുവഴുപ്പോ ദുര്ഗന്ധമോ ഇല്ലാത്തതുമായ കൂണുകള് തിരഞ്ഞെടുക്കുക.
- വെള്ള, തവിട്ട്, അല്ലെങ്കില് ക്രീം നിറമുള്ള കൂണുകള് നോക്കി വാങ്ങുക.
- കുടകള് തണ്ടിനോട് ചേര്ന്ന് അടഞ്ഞതോ ചെറുതായി മാത്രം തുറന്നതോ ആയിരിക്കണം. ചെകിളകള് ഇറുകിയതും ഇളം നിറമുള്ളതും ആയിരിക്കണം.
- വൃത്തിയായി മുറിച്ച തണ്ടുകളുള്ളതും അഴുകലിന്റെ ലക്ഷണങ്ങള് ഇല്ലാത്തതുമായ കൂണുകള് തിരഞ്ഞെടുക്കുക.
കൂടുതല് ഫീച്ചറുകള് വായിക്കാന് ഗൃഹലക്ഷ്മി വാട്സാപ്പ് ഗ്രൂപ്പില് അംഗമാകൂ:https://mbi.page.link/grihalakshmi
Content Highlights: Discover the amazing health benefits of edible mushrooms. Learn how to safely identify them and avoid dangerous poisonous varieties with our expert tips.