അക്ഷയ് ഖന്നയുടെ അച്ഛൻ വിനോദ് ഖന്ന ഓഷോയുടെ തോട്ടക്കാരനായിരുന്നു

കരിയറിൽ ഏറ്റവും ഉയർന്നുനിൽക്കുമ്പോൾ, ബോളിവുഡിൽ നിന്ന് അവധിയെടുത്ത് ഒറിഗണിലെ ഓഷോയുടെ കമ്മ്യൂണിൽ ചേർന്ന നടനാണ് വിനോദ് ഖന്ന. ഓഷോയ്ക്കൊപ്പം ചേരുന്നതിന് വളരെ മുമ്പുതന്നെ ആത്മീയ ചായ്‌വുള്ള വ്യക്തിയായിരുന്നു വിനോദ് ഖന്നയെന്ന് പറയുകയാണ് അദ്ദേഹത്തിന്റെ രണ്ടാം ഭാര്യ കവിത. ജീവിതത്തിൽ കുറച്ച് നഷ്ടങ്ങൾ സംഭവിച്ചപ്പോഴാണ് അദ്ദേഹത്തിന്റെ ആത്മീയ യാത്ര ആരംഭിച്ചതെന്നും അവർ പറയുന്നു.

"അദ്ദേഹം എപ്പോഴും ആത്മീയമായി ചായ്‌വുള്ളയാളായിരുന്നു. പതിനേഴ് വയസ്സുള്ളപ്പോൾ, ബോംബെയിലെ സ്ട്രാൻഡ് ബുക്ക് സ്റ്റോറിൽ നിന്ന് 'ഓട്ടോബയോഗ്രഫി ഓഫ് എ യോഗി' എന്ന പുസ്തകം അദ്ദേഹം വായിക്കാൻ തുടങ്ങി, അത് മുഴുവൻ വായിക്കാതെ അദ്ദേഹം പുസ്തകം മടക്കിവെച്ചില്ല. കരിയറിന്റെ ഉച്ചസ്ഥായിയിൽ പോലും, ജെ. കൃഷ്ണമൂർത്തി (ആത്മീയ വ്യക്തി) പട്ടണത്തിൽ എത്തുമ്പോഴെല്ലാം, ഷൂട്ടിങ് ഉണ്ടെങ്കിൽ പോലും, ഒരു ദിവസം അവധിയെടുത്ത് അദ്ദേഹത്തിന്റെ പ്രഭാഷണങ്ങളിൽ പങ്കെടുക്കാൻ പോകുമായിരുന്നു."-ലോവീന ടണ്ടനോട് സംസാരിക്കവേ, കവിത പറഞ്ഞു.

വിനോദിന്റെ ഓഷോയുമായുള്ള അടുത്ത ബന്ധം ജീവിതത്തിലെ ഒരു പ്രത്യേക വിഷമഘട്ടത്തിലാണ് ആരംഭിച്ചതെന്നും കവിത വെളിപ്പെടുത്തി. "അദ്ദേഹം ജീവിതത്തിൽ വളരെ മോശം ഘട്ടത്തിലൂടെ കടന്നുപോയിരുന്നു. അമ്മയടക്കം വളരെ അടുപ്പമുള്ള അഞ്ച് കുടുംബാംഗങ്ങളുടെ മരണം സംഭവിച്ച സമയം, അപ്പോഴാണ് ഓഷോയുടെ പ്രഭാഷണങ്ങൾ അദ്ദേഹം കേൾക്കാൻ തുടങ്ങിയതെന്ന് എനിക്ക് തോന്നുന്നു. അമ്മ മരിച്ചപ്പോൾ, അദ്ദേഹം ആശ്രമത്തിൽ പോയി സന്യാസം സ്വീകരിച്ചു. അങ്ങനെയാണ് ആ യാത്ര ആരംഭിച്ചത്."

"അദ്ദേഹത്തിന്റെ പ്രധാന സ്ഥലം പൂനെയായിരുന്നു. ആശ്രമത്തിൽ അദ്ദേഹം താമസിച്ചത് വളരെ ചെറിയ ഒരു മുറിയിലാണ്. ഓഷോ പോലും തന്റെ പ്രഭാഷണങ്ങളിൽ അതിനെക്കുറിച്ച് തമാശയായി പറയുമായിരുന്നു, ആ മുറി വളരെ ചെറുതായിരുന്നു എന്നും, കിടക്കയുടെ മുകളിലൂടെ ചാടിക്കടന്നാണ് അദ്ദേഹം ഉറങ്ങാൻ പോയിരുന്നതെന്നും. ക്യാമറയ്ക്ക് മുന്നിൽ അദ്ദേഹം സിനിമകളിൽ അഭിനയിക്കുകയായിരുന്നു, ക്യാമറയ്ക്ക് പുറത്ത് ധ്യാനം ചെയ്യുകയും. ആശ്രമത്തിൽ ഓഷോയുടെ തോട്ടക്കാരനായിരുന്നു. അതിനുശേഷം അദ്ദേഹം ഒറിഗണിലേക്ക് പോയി."

ഒറിഗണിലെ കമ്മ്യൂണിലേക്കുള്ള അദ്ദേഹത്തിന്റെ നീക്കത്തിന് പിന്നിലെ കാരണം വിശദീകരിച്ച് അവർ പറഞ്ഞു: "അദ്ദേഹം തിരഞ്ഞുകൊണ്ടിരുന്ന ഒന്ന് കണ്ടെത്തിയെന്ന് ഞാൻ കരുതുന്നു. ഇനി ആശ്രമത്തിൽ ഇരിക്കേണ്ട കാര്യമില്ലെന്ന് അദ്ദേഹത്തിന് തോന്നി. നിങ്ങൾ ഒരു ആത്മീയ പാതയിലാണെങ്കിൽ, ഒരേ കാര്യം അനന്തമായി ചെയ്തുകൊണ്ടിരിക്കുക എന്നതല്ല ലക്ഷ്യം. ചിലർ അത് തിരഞ്ഞെടുക്കുന്നു, പക്ഷെ മറ്റുള്ളവർ അതിനെ പ്രായോഗികമാക്കുന്നു’’-അവർ പറഞ്ഞു.

കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi

Content Highlights: Discover Vinod Khanna`s early spiritual path, his time as Osho`s gardener in the ashram, and his unique balance between Bollywood and inner peace.