മേക്കപ്പിട്ട് ജഗതിച്ചേട്ടന്റെ കാലിൽ തൊട്ടുതൊഴുതു. സെറ്റിൽ ചെന്നപ്പോഴാണ് ഞെട്ടിക്കുന്ന കാര്യമറിഞ്ഞത്

ചെറുപ്പംമുതലേ സിനിമയായിരുന്നു സഞ്ജു ശിവ്റാമിന്റെ (Sanju Sivram) മനസ്സിൽ. എം.ബി.എ. പഠിച്ച് ബാങ്കിൽ ജോലിക്ക് കയറിയപ്പോഴും ആ മോഹത്തിന് തിളക്കമേറി. ഒടുവിലൊരുനാൾ രണ്ടുംകല്പിച്ച് ബാങ്കിലെ ജോലി ഉപേക്ഷിച്ചു, സിനിമ എന്ന സ്വപ്നത്തിനായി. 'നി കൊ ഞാ ചാ' എന്ന സിനിമയിലൂടെയാണ് അരങ്ങേറ്റം. അവിടന്നങ്ങോട്ട് ചെറുതും വലുതുമായ ഒട്ടേറെ സിനിമകളുടെ ഭാഗമായി സഞ്ജു. 1983, മൺസൂൺ മാംഗോസ്, അച്ചായൻസ്, റോഷാക്ക്, എ.ആർ.എം...അതിനിടെ ഹോട്ട്‌സ്റ്റാറിൽ റിലീസ് ചെയ്ത '1000 ബേബീസ്' എന്ന സീരീസിലൂടെ സഞ്ജുവിന്റെ മറ്റൊരു ശക്തമായ കഥാപാത്രവും പ്രേക്ഷകർക്ക് മുന്നിലെത്തി. ഏറ്റവുമൊടുവിൽ വൈശാഖിന്റെ സംവിധാനത്തിലൊരുങ്ങിയ 'ഖലീഫ'യിലൂടെ (Khalifa) തന്റെ ഇടം ഭദ്രമാക്കുകയാണ് സഞ്ജു. പൃഥ്വിരാജിന്റെ സുഹൃത്തായുള്ള കഥാപാത്രമാണ് സഞ്ജുവിന്റേത്. സിനിമയിലേക്കുള്ള തന്റെ വരവിനെക്കുറിച്ചും സ്വപ്‌നങ്ങളെക്കുറിച്ചും സംസാരിക്കുകയാണ് താരം ഇവിടെ.

മനസ്സിൽ കയറിക്കൂടിയ സിനിമ
''ചെറുപ്പത്തിൽ ഞായറാഴ്ചകളിൽ ദൂരദർശനിൽ വരുന്ന സിനിമയ്ക്കായി കാത്തിരിക്കും. അഥവാ കാണാൻ പറ്റിയില്ലെങ്കിൽ, ചേച്ചി അതിന്റെ കഥ പറഞ്ഞുതരും. ഓരോ സീനുകളായി, വിഷ്വലുകൾ ഉൾപ്പെടെയാണ് പറഞ്ഞുതരുന്നത്. അന്നുമുതൽ തന്നെ മോഹൻലാലും മമ്മൂട്ടിയുമൊക്കെ ജീവിതത്തിന്റെ ഭാഗമായിരുന്നു. അവരോടുള്ള ഇഷ്ടം കൂടിക്കൂടി അത് സിനിമയോടുള്ള ഇഷ്ടമായി. തൃശ്ശൂർ ചിൻമയ വിദ്യാലയത്തിലാണ് പഠിച്ചത്. പത്തുവർഷത്തോളം അവിടത്തെ ഹോസ്റ്റലിലായിരുന്നു. എല്ലാ വെള്ളിയാഴ്ചയും ശനിയാഴ്ചയും നമുക്ക് സിനിമ കാണിച്ചുതരും. പുതിയ സിനിമയുടെ കാസറ്റില്ലെങ്കിൽ പഴയ സിനിമകളായിരിക്കും ചിലപ്പോൾ. കൂട്ടുകാർക്കിടയിൽ മമ്മൂട്ടി ഫാൻസും മോഹൻലാൽ ഫാൻസുമുണ്ട്. ഏത് നടനാണ് കൂടുതൽ ഹിറ്റുപാട്ടുകളുള്ളതെന്ന് നമ്മളിരുന്ന് എണ്ണും. അന്ന് സിദ്ദിഖ്-ലാൽ ടീം ഭയങ്കര ഹിറ്റാണ്. 'മാന്നാർ മത്തായി സ്പീക്കിങ്' ഇറങ്ങിയ സമയമാണെന്ന് തോന്നുന്നു. അതുകണ്ട് എനിക്കും ഒരു കൂട്ടുകാരനും ആവേശംകയറി. വലുതായാൽ നമുക്കും ഇതുപോലെ പടം ചെയ്യണമെന്ന് പറഞ്ഞു.

Content Highlights: Sanju Sivram left his stable banking career to pursue his passion for acting. He started his journey with short films and made his debut in 'Ni Ko Nja Cha'. He discusses his recent role alongside Prithviraj in Vysakh's 'Khalifa'