കാന്താര ഇഫക്ട്; റിലീസ് മാറ്റിവെക്കൽ കോമഡിവീഡിയോയാക്കി 'നെല്ലിക്കാംപൊയില്‍ നൈറ്റ് റൈഡേഴ്സ്'
മാത്യു തോമസ് നായകനാകുന്ന 'നെല്ലിക്കാംപൊയില്‍ നൈറ്റ് റൈഡേഴ്സ്' എന്ന ചിത്രത്തിന്റെ റിലീസ് തീയതി മാറ്റി. കാന്താര: ചാപ്റ്റര്‍ 1' കേരളത്തിലുടനീളം ഹിറ്റായി തുടരുന്നതിനാലാണ് ഇങ്ങനെയൊരു തീരുമാനം. ഒക്ടോബര്‍ 10 ന് പ്രീമിയര്‍ ചെയ്യാന്‍ തീരുമാനിച്ചിരുന്ന ഈ റൊമാന്റിക് സസ്പെന്‍സ് ത്രില്ലര്‍ ഒക്ടോബര്‍ 24 ലേക്കാണ് മാറ്റിയിരിക്കുന്നത്.
വളരെ തന്ത്രപരമായ ഒരു തീരുമാനമാണ് ചിത്രത്തിന്റെ പ്രവര്‍ത്തകരില്‍ നിന്നു വന്നിരിക്കുന്നത്. സ്‌ക്രീനുകളില്‍ ആധിപത്യം പുലര്‍ത്തുന്ന കാന്താര എന്ന ചിത്രവുമായി ബോക്സ് ഓഫീസ് ഏറ്റുമുട്ടല്‍ ഒഴിവാക്കാനുള്ള ഒരു പ്രായോഗിക നടപടിയായി ഈ നീക്കത്തെ കാണാം. മാറ്റം പ്രഖ്യാപിക്കുന്നതിനായി, നിര്‍മ്മാതാക്കള്‍ ഹാസ്യരൂപത്തിലുള്ള ഒരു വീഡിയോ പുറത്തിറക്കി.
ക്ലിപ്പില്‍, മാത്യു തോമസും ശരത് സഭയും മീനാക്ഷി ഉണ്ണികൃഷ്ണനും ചേര്‍ന്ന് 'ഒക്ടോബര്‍ 10' എന്ന് എഴുതിയ ഒരു പോസ്റ്റര്‍ രാത്രിയില്‍ ഒട്ടിക്കുന്നത് കാണാം. അവര്‍ ഓരോതവണയും അത് പൂര്‍ത്തിയാക്കാനൊരുങ്ങുമ്പോള്‍, കാന്താരയിലെ തെയ്യക്കോലത്തിന്റെ ശബ്ദം പശ്ചാത്തലത്തില്‍ പ്രതിധ്വനിക്കുന്നു. ഇത് മാത്യുവിനെയും സംഘത്തെയും അമ്പരപ്പിക്കുന്നു. തുടര്‍ന്ന് പുതിയ തീയതിയായ ഒക്ടോബര്‍ 24 കാണിക്കുന്ന പോസ്റ്റര്‍ വേഗത്തില്‍ മാറ്റിസ്ഥാപിക്കുന്നു.
ഒരു തെയ്യക്കോലത്തിന്റെ ദൃശ്യത്തോടെയാണ് ഈ കോമഡിവീഡിയോ അവസാനിക്കുന്നത്. വീഡിയോ ഓണ്‍ലൈനില്‍ ചിരി പടര്‍ത്തി. 'സത്യം പറയാന്‍ കാണിച്ച ധൈര്യം എന്ന് ഒരാള്‍ അഭിപ്രായപ്പെട്ടു. 'അതേ ഞാനും കേട്ടതായിരുന്നു ആ ശബ്ദം' എന്ന് തമാശയായി മറ്റൊരാളും കുറിച്ചു. 'ആ സൗണ്ട് അങ്ങനെ മറക്കാന്‍ പറ്റില്ല', 'പ്രൊഡ്യൂസറുടെ അലര്‍ച്ച അല്ലെ ആ കേള്‍ക്കുന്നത്, ' ഇപ്പൊ കറക്റ്റ് ഇല്ലേ പിള്ളേച്ചന്‍ കള്ളം പറയുന്നേ ആണെന്ന് കരുതും' എന്നു തുടങ്ങി നർമംനിറഞ്ഞ കമന്റുകളായിരുന്നു എല്ലാം.
പ്രശസ്ത എഡിറ്റര്‍ നൗഫല്‍ അബ്ദുള്ള ആദ്യമായി സംവിധാനം ചെയ്യുന്ന ചിത്രമാണ് 'നെല്ലിക്കാംപൊയില്‍ നൈറ്റ് റൈഡേഴ്സ്'. പ്രണയ വിലാസം എന്ന സൂപ്പര്‍ഹിറ്റ് ചിത്രത്തിന്റെ പിന്നണി ഗായകരായ ജ്യോതിഷ് എം, സുനു എ വിഎന്നിവര്‍ ചേര്‍ന്നാണ് കഥയും തിരക്കഥയും എഴുതിയിരിക്കുന്നത്.
കൂടുതല്‍ ഫീച്ചറുകള്‍ വായിക്കാന്‍ ഗൃഹലക്ഷ്മി വാട്സാപ്പ് ഗ്രൂപ്പില്‍ അംഗമാകൂ:https://mbi.page.link/grihalakshmi
Content Highlights: nellikkampoyil night riders, starring mathew thomas, postpones its release to october 24 to avoid a box office clash with the hit film `kantara: chapter 1`.