ലോക എമ്പുരാനെയും മറികടന്നേക്കും, ഏറ്റവും കൂടുതൽ കളക്ഷൻ നേടിയ രണ്ടാമത്തെ മലയാള സിനിമ

കല്യാണി പ്രിയദർശന്റെ സൂപ്പർഹീറോ ചിത്രമായ 'ലോക-ചാപ്റ്റർ 1; ചന്ദ്ര' റിലീസ് ചെയ്ത് മൂന്നാഴ്ച പിന്നിട്ടപ്പോഴും ബോക്സ് ഓഫീസിൽ കുതിപ്പുതുടരുകയാണ്. എക്കാലത്തെയും ഏറ്റവും കൂടുതൽ കളക്ഷൻ നേടുന്ന രണ്ടാമത്തെ മലയാള സിനിമയെന്ന നേട്ടത്തിലേക്ക് ചിത്രമെത്തിക്കഴിഞ്ഞു. ഡൊമിനിക് അരുൺ സംവിധാനം ചെയ്ത ചിത്രത്തിന്റെ കളക്ഷൻ 250 കോടി രൂപയെന്ന നാഴികക്കല്ലിലേക്ക് അടുക്കുകയാണ്.

19 ദിവസം കൊണ്ട് ചിത്രത്തിന്റെ ആഗോള ഗ്രോസ് കളക്ഷൻ 249 കോടി രൂപയായി. ചിത്രം ഇതുവരെ ഇന്ത്യയിൽ നിന്ന് 122 കോടി രൂപ നെറ്റ് കളക്ഷൻ നേടി (139.6 കോടി രൂപ ഗ്രോസ്). എന്നാൽ അത്ഭുതപ്പെടുത്തിയത് അന്താരാഷ്ട്ര കളക്ഷനാണ്. ലോക വിദേശത്തുനിന്ന് 109.4 കോടി രൂപയാണ് ഇതുവരെ നേടിയത്. ഒരു മലയാള സിനിമ നേടുന്ന ഏറ്റവും ഉയർന്ന വിദേശ കളക്ഷനാണിത്.

വമ്പന്മാരെ മറികടന്ന്

മൂന്നാം വാരത്തിൽ, ഇന്ത്യയിൽ നിന്ന് 17.70 കോടി രൂപ നെറ്റ് കളക്ഷനാണ് ലോക നേടിയത്. ഇതോടെ മോഹൻലാലിന്റെ 'തുടരും' (234 കോടി രൂപ), പൃഥ്വിരാജ് സുകുമാരന്റെ 'ദി ഗോട്ട് ലൈഫ്' (160 കോടി രൂപ), ഫഹദ് ഫാസിലിന്റെ 'ആവേശം' (156 കോടി രൂപ) എന്നിവയുടെ ആകെ കളക്ഷനുകളെ മറികടന്നു.

മമ്മൂട്ടിയുടെ എക്കാലത്തെയും വലിയ ഹിറ്റായ 'ഭീഷ്മ പർവ്വ'ത്തിന്റെ (89 കോടി രൂപ) കളക്ഷൻ ചിത്രം നേരത്തെ തന്നെ മറികടന്നിരുന്നു. തിങ്കളാഴ്ച, 'മഞ്ഞുമ്മൽ ബോയ്സി'ന്റെ 243 കോടി രൂപ എന്ന നേട്ടവും പിന്നിട്ട് മലയാള സിനിമാ ചരിത്രത്തിലെ ഏറ്റവും കൂടുതൽ കളക്ഷൻ നേടുന്ന രണ്ടാമത്തെ ചിത്രമായി ലോക മാറി.

ഇനി ലോകയ്ക്കു മുമ്പിലുള്ള ഒരേയൊരു ചിത്രം ഈ വർഷം ആദ്യം 268 കോടി രൂപ നേടിയ മോഹൻലാലിന്റെ ബ്ലോക്ക്ബസ്റ്റർ 'എമ്പുരാൻ' ആണ്. ലോക ഇപ്പോഴും ദിവസേന 4-5 കോടി രൂപ ആഗോളതലത്തിൽ നേടുന്നതുകൊണ്ട് ഈ ആഴ്ച തന്നെ എമ്പുരാനെ മറികടക്കാൻ സാധ്യതയുണ്ട്. ദുൽഖർ സൽമാൻ നിർമ്മിച്ച ലോകയുടെ ദൃശ്യങ്ങൾക്കും ആഖ്യാനത്തിനും നിരൂപകരിൽ നിന്ന് പ്രശംസ ലഭിച്ചിരുന്നു. 

കൂടുതല്‍ ഫീച്ചറുകള്‍ വായിക്കാന്‍ ഗൃഹലക്ഷ്മി വാട്സാപ്പ് ഗ്രൂപ്പില്‍ അംഗമാകൂ:https://mbi.page.link/grihalakshmi

Content Highlights: Kalyani Priyadarshan`s Lokah Chapter 1 crosses ₹249 crore globally, becoming the 2nd highest-grossing Malayalam film. Will it beat L2: Empuraan?