'ഹൃദയം നിറയെ സ്നേഹം... ഞങ്ങൾ വീണ്ടും അനുഗ്രഹിക്കപ്പെട്ടിരിക്കുന്നു'

ദമ്പതികളായ കിയാര അദ്വാനിയും സിദ്ധാർഥ് മൽഹോത്രയും തങ്ങളുടെ ജീവിതത്തിലേക്ക് രണ്ടാമത്തെ കുഞ്ഞതിഥി എത്താൻ പോകുന്ന സന്തോഷവാർത്ത അറിയിച്ചിരിക്കുകയാണ്. സോഷ്യൽ മീഡിയയിലൂടെ ഇരുവരും പങ്കുവെച്ച മനോഹരമായ ചിത്രത്തിലൂടെയാണ് ആരാധകരുമായി ഈ സന്തോഷവാർത്ത പങ്കുവെച്ചത്.

"ഏറ്റവും വലിയ സമ്മാനത്താൽ ഞങ്ങൾ വീണ്ടും അനുഗ്രഹിക്കപ്പെട്ടിരിക്കുന്നു. ഞങ്ങളുടെ ഹൃദയം സ്നേഹത്താലും നന്ദിയാലും നിറഞ്ഞിരിക്കുന്നു..." - ദമ്പതികൾ ഇൻസ്റ്റഗ്രാമിൽ കുറിച്ചു. ഇരുവരുടെയും കൈകൾക്കിടയിൽ ഇളം നിറത്തിലുള്ള ഒരു ജോഡി കുഞ്ഞു ഷൂസ് ചേർത്തുപിടിച്ചിരിക്കുന്ന ആദ്യത്തെ മകൾ സാരായയുടെ കൊച്ചുകൈകളുടെ ചിത്രമാണ് പോസ്റ്റിലുള്ളത്. വാർത്ത പുറത്തുവന്നതിന് പിന്നാലെ കരൺ ജോഹർ, അതിയ ഷെട്ടി തുടങ്ങി ബോളിവുഡിലെ പ്രമുഖ താരങ്ങളും ആയിരക്കണക്കിന് ആരാധകരുമാണ് ആശംസകളുമായി കമന്റ് ബോക്സിലെത്തിയത്.

തങ്ങളുടെ ജീവിതത്തിലെ ഓരോ വലിയ സന്തോഷങ്ങളും അറിയിക്കാൻ ഒരു ജോഡി കുഞ്ഞുഷൂസിന്റെ ചിത്രം പങ്കുവെക്കുന്ന പതിവ് ദമ്പതികൾക്കുണ്ട്. ആദ്യം ഗർഭിണിയായപ്പോഴും പിന്നീട് മകളുടെ പേര് വെളിപ്പെടുത്തിയപ്പോഴും ഇതേ രീതി തന്നെയാണ് സ്വീകരിച്ചത്.

2025 ജൂലൈ 15-നായിരുന്നു ആദ്യത്തെ കൺമണിയായ സാരായ മൽഹോത്രയുടെ ജനനം. ഓഗസ്റ്റിൽ പ്രതീക്ഷിച്ചിരുന്ന പ്രസവം കുറച്ചുദിവസങ്ങൾ മുൻപേയാവുകയായിരുന്നു. മുംബൈയിലെ എച്ച്.എൻ. റിലയൻസ് ആശുപത്രിയിലായിരുന്നു കിയാര കുഞ്ഞിന് ജന്മം നൽകിയത്. കഴിഞ്ഞ വർഷത്തെ മെറ്റ് ഗാല (Met Gala) റെഡ് കാർപ്പറ്റിൽ ഫാഷൻ ഡിസൈനർ ഗൗരവ് ഗുപ്ത രൂപകല്പന ചെയ്ത വസ്ത്രമണിഞ്ഞ് ഗർഭിണിയായിരിക്കെ കിയാര എത്തിയത് വലിയ വാർത്തയായിരുന്നു.

2021-ൽ പുറത്തിറങ്ങിയ 'ഷേർഷാ' (Shershaah) എന്ന ചിത്രത്തിന്റെ ചിത്രീകരണത്തിനിടെയാണ് കിയാരയും സിദ്ധാർഥും പ്രണയത്തിലാകുന്നത്. എന്നാൽ ഈ വിഷയം മാധ്യമങ്ങളിൽ നിന്നും ആരാധകരിൽ നിന്നും തികച്ചും രഹസ്യമായി സൂക്ഷിക്കാൻ ഇരുവരും ശ്രദ്ധിച്ചിരുന്നു. പിന്നീട് 2023 ഫെബ്രുവരി 7-ന് രാജസ്ഥാനിലെ ജയ്സാൽമീറിലുള്ള സൂര്യഗഢ് കൊട്ടാരത്തിൽ വെച്ച് പ്രൗഢഗംഭീരമായ ചടങ്ങുകളോടെയായിരുന്നു ഇവരുടെ വിവാഹം. ഇറ്റലിയിലെ റോമിൽ വെച്ചാണ് സിദ്ധാർത്ഥ് തന്നോട് പ്രണയാഭ്യർത്ഥന നടത്തിയതെന്ന് 'കോഫി വിത്ത് കരൺ' ഷോയിൽ കിയാര വെളിപ്പെടുത്തിയിരുന്നു. 'ഷേർഷാ' സിനിമയിലെ ഡയലോഗുകൾ പറഞ്ഞുകൊണ്ടുള്ള സിദ്ധാർഥിന്റെ പ്രൊപ്പോസൽ തനിക്ക് മറക്കാനാവാത്ത അനുഭവമായിരുന്നുവെന്ന് കിയാര പറഞ്ഞിരുന്നു.

അഭിനയരംഗത്തും സജീവമാണ് ഇരുതാരങ്ങളും. ഫോക്ലോർ ഫാന്റസി ചിത്രമായ 'ദ വാൺ' (The Vvaan) ആണ് സിദ്ധാർഥിന്റേതായി ഏറ്റവും ഒടുവിൽ പുറത്തിറങ്ങിയ ചിത്രം. കന്നഡ താരം യഷ് കേന്ദ്രകഥാപാത്രമായ 'ടോക്സിക്' (Toxic) ആണ് കിയാരയുടേത്.

കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi