മോണയിലെ അണുബാധ ശ്രദ്ധിക്കാതെ പോകരുത്

മോണവേദന, അല്ലെങ്കില്‍ പല്ലുതേക്കുമ്പോഴും മറ്റും മോണയില്‍നിന്ന് രക്തം വരുന്നത്...ഇതൊന്നും നിസ്സാരമായി തള്ളിക്കളയാനാവില്ല. പല്ലിന് ചുറ്റുമുള്ള മൃദുവായ മോണകളിലും അടിയിലുള്ള അസ്ഥികളിലും അണുബാധയുണ്ടാകുമ്പോഴാണ് മോണരോഗം ഉണ്ടാകുന്നത്. ബാക്ടീരിയയാണ് ഇതിനുകാരണം. പല്ലിന്റെ ഉപരിതലത്തില്‍ ബാക്ടീരിയകള്‍ ഡെന്റല്‍ പ്ലാക്ക് എന്ന പാളി രൂപപ്പെടുത്തുന്നു, ഇത് വൃത്തിയാക്കിയില്ലെങ്കില്‍ മോണയ്ക്കുള്ളിലേക്ക് നീങ്ങും. തുടര്‍ന്ന് തടിപ്പ്, വീക്കം, മോണയില്‍ രക്തസ്രാവം എന്നിവയ്ക്ക് കാരണമാകും. ചികിത്സിച്ചില്ലെങ്കില്‍ ഇത് പെരിയോഡോണ്‍ഡൈറ്റിസ് എന്നറിയപ്പെടുന്ന ആഴത്തിലുള്ള അണുബാധയിലേക്ക് നയിക്കുകയും ചെയ്യും.
ചികിത്സ നിര്‍ബന്ധം
കൃത്യമായ ചികിത്സ ലഭ്യമായില്ലെങ്കില്‍ മോണരോഗം ഗുരുതരമാകാനിടയുണ്ട്. ഇത് അയഞ്ഞ പല്ലുകള്‍ക്കും, പല്ലുകള്‍ നഷ്ടപ്പെടുന്നതിനും കാരണമാകുന്നു. പെരിയോഡോണ്‍ഡൈറ്റിസ് വായയെ മാത്രമല്ല, പൊതുവായ ആരോഗ്യത്തെയും ബാധിക്കും. ബാക്ടീരിയയും അതിന്റെ രാസവസ്തുക്കളും ബാധിച്ച മോണയില്‍ നിന്ന് രക്തപ്രവാഹത്തിലൂടെ പ്രവേശിച്ച് ശരീരത്തിന്റെ മറ്റ് ഭാഗങ്ങളിലേക്ക് സഞ്ചരിക്കുമ്പോഴാണ് ഇത് സംഭവിക്കുന്നത്. മോണരോഗം പ്രമേഹം, ഹൃദയ സംബന്ധമായ രോഗങ്ങള്‍, സന്ധിവാതം എന്നിവയെ ഗുരുതരമാക്കുമെന്നും കുഞ്ഞുങ്ങളില്‍ അകാല ജനനം, കുറഞ്ഞ ജനന ഭാരം തുടങ്ങിയ പ്രതികൂല ഗര്‍ഭധാരണ ഫലങ്ങള്‍ക്ക് കാരണമാകുമെന്നും പഠനങ്ങള്‍ തെളിയിച്ചിട്ടുണ്ട്.

മോണരോഗമുണ്ടോ എന്ന് എങ്ങനെ അറിയാം?
മോണയില്‍ നിന്ന് രക്തസ്രാവം, ബ്രഷ് ചെയ്യുമ്പോഴോ കട്ടിയുള്ള സാധനങ്ങള്‍ കഴിക്കുമ്പോഴോ ഉണ്ടാകുന്ന രക്തസ്രാവം, മോണയില്‍ നേരിയ അസ്വസ്ഥതയുണ്ടാക്കുന്ന വേദന, വീര്‍ത്ത മോണ, ഇളകുന്നപല്ലുകള്‍, വായ്നാറ്റം തുടങ്ങിയവയാണ് മോണരോഗത്തിന്റെ ഏറ്റവും സാധാരണമായ ലക്ഷണങ്ങള്‍. ഈ ലക്ഷണങ്ങളില്‍ ഏതെങ്കിലുമുണ്ടെങ്കില്‍, ഉടന്‍ തന്നെ ഒരു ദന്തരോഗവിദഗ്ധനെയോ മോണരോഗ വിദഗ്ധനെയോ (പെരിയോഡന്റിസ്റ്റ്) സമീപിക്കണം.

ചികിത്സാ ഓപ്ഷനുകള്‍
രോഗത്തിന്റെ തീവ്രതയനുസരിച്ച് വ്യത്യസ്ത ചികിത്സകള്‍ ലഭ്യമാണ്. പ്രാരംഭ ഘട്ടത്തില്‍ ശസ്ത്രക്രിയേതര സാങ്കേതിക വിദ്യകള്‍ ഉപയോഗിച്ച് കൈകാര്യം ചെയ്യാന്‍ സാധിക്കും. എന്നാല്‍ രോഗം ഗുരുതരമായാല്‍ ശസ്ത്രക്രിയാ ചികിത്സകള്‍ തന്നെ തിരഞ്ഞെടുക്കേണ്ടി വന്നേക്കാം. ലേസര്‍ മോണ ചികിത്സകള്‍ പോലുള്ള നിരവധി നൂതന ചികിത്സാരീതികള്‍ ഇപ്പോഴുണ്ട്, അത് കൂടുതല്‍ സുഖകരവും പ്രവചനാതീതവുമാണ്. 

മോണരോഗം എങ്ങനെ തടയാം?
ദിവസേന രണ്ടുതവണ ബ്രഷ് ചെയ്യേണ്ടത് അത്യാവശ്യമാണ്. അതിനുപുറമെ, പല്ലുകള്‍ക്കിടയിലുള്ള അഴുക്കുകള്‍ വൃത്തിയാക്കാന്‍ ഡെന്റല്‍ ഫ്‌ലോസ് അല്ലെങ്കില്‍ ഇന്റര്‍ഡെന്റല്‍ ബ്രഷ് അല്ലെങ്കില്‍ വാട്ടര്‍ ഫ്‌ലോസര്‍ ഉപയോഗിക്കാം. ഇത് മോണരോഗം തടയുന്നതില്‍ വളരെ പ്രധാനപ്പെട്ട ഒരു ഘട്ടമാണ്. ആറ് മാസത്തെ ഇടവേളകളില്‍ ദന്തരോഗവിദഗ്ധനെ കണ്ട് പരിശോധിക്കുന്നതും നല്ലതാണ്.

കൂടുതല്‍ ഫീച്ചറുകള്‍ വായിക്കാന്‍ ഗൃഹലക്ഷ്മി വാട്സാപ്പ് ഗ്രൂപ്പില്‍ അംഗമാകൂ:https://mbiurl.in/grihalakshmi

Content Highlights: Healthy gums, the foundation of oral health