അറ്റ്‌ലാന്റിക്കും അമേരിക്കയും വിട്ട് പറന്നെത്തുന്ന നീര്‍പക്ഷികള്‍; മയ്യഴിയുടേയും കടലുണ്ടിയുടേയും ഓമനകള്‍

മനുഷ്യനും പക്ഷികളും തമ്മിലുള്ള സഹജീവനത്തിന്റെ ആത്മതാളം തൊട്ടറിയാന്‍ കേരളാതീരത്ത് വിരുന്നെത്തുന്ന കടല്‍പ്പക്ഷികളുടെ ജീവിതം നിരീക്ഷിച്ചാല്‍മതിയാവും. ഗുരുവായൂരിനടുത്തുള്ള ചാവക്കാട്ടുനിന്നു തുടങ്ങി കടലുണ്ടിയും കാപ്പാടും എലത്തൂരുംമുതല്‍ മയ്യഴിത്തീരംവരെ നീര്‍പക്ഷികളെ തേടി, ഈയടുത്ത മാസങ്ങളില്‍ നടത്തിയ യാത്രയുടെ ചിത്രസാക്ഷ്യമാണ് ഇത്. ചാവക്കാട് തീരത്ത് വെയില്‍നാളങ്ങള്‍ വിരുന്നെത്തുന്നതേയുള്ളൂ. മണല്‍പ്പരപ്പാകെ വലിയ കടല്‍ക്കാക്ക (Great Black backed Gull) കളുടെ മഹാമേളനം. ഏതോ അറിയപ്പെടാത്ത ക്രൗഞ്ചദ്വീപില്‍ എത്തിപ്പെട്ടപോല്‍ ശബ്ദമുഖരിതം. വലിയൊരു കൂട്ടം തീരമണയുന്ന തിരകളെ ഉറ്റുനോക്കിനില്‍ക്കുന്നു. മറ്റൊരു കൂട്ടമാകട്ടെ, തിരയെത്തുമ്പോള്‍ വാനിലൊന്ന് വട്ടംചുറ്റിയശേഷം മറ്റൊരിടം താവളമാക്കുന്നു. കൂട്ടംതെറ്റിയ ചിലര്‍ തിരമുറിച്ചുനീന്തി ജലത്തൊട്ടിലില്‍ അമ്മാനമാടുന്നു.

അപൂര്‍വം ചിലര്‍ തിര പിന്‍വാങ്ങുന്ന നേരംനോക്കി മണല്‍പ്പരപ്പില്‍ ഭക്ഷണം തേടുന്നു. വിശാലമായ സമുദ്രത്തിന്റെ ഏതെല്ലാമോ തീരങ്ങളില്‍നിന്നും ദ്വീപുകളില്‍നിന്നുമായി സുദീര്‍ഘമായ യാത്രാപഥങ്ങള്‍ താണ്ടിയാണ് ഇവ കേരളാതീരത്ത് പതിവായി എത്തുന്നത്. കടല്‍ പ്രക്ഷുബ്ധമാകുമ്പോഴോ, പ്രതികൂല കാലാവസ്ഥയില്‍നിന്ന് രക്ഷനേടാനോ, ഭക്ഷണലഭ്യത ഉറപ്പുവരുത്താനോ, പ്രജനനയോജ്യമായ ഇടംതേടിയോ ആവും പലപ്പോഴും ഇവയുടെ ദേശാടനം.

Content Highlights: malabar coast's avian treasures: rare seabird sightings and conservation concerns