'15 വർഷമായിട്ടും ആ ബന്ധത്തിൽനിന്ന് പുറത്തുകടക്കാതിരുന്നതെന്തെന്ന് ചോദിക്കുന്നവരോട്...'

2025 നവംബറിലാണ് നടി സെലീന ജെയ്റ്റ്‌ലി ഭർത്താവും ഓസ്ട്രിയൻ സ്വദേശിയുമായ പീറ്റർ ഹാഗിനെതിരെ മുംബൈ അന്ധേരിയിലെ ജുഡീഷ്യൽ മജിസ്‌ട്രേറ്റിനുമുന്നാലെ കേസ് കൊടുത്തത്. നഷ്ടപരിഹാരമായി 50 കോടി രൂപ ആവശ്യപ്പെടുകയും ചെയ്തിരുന്നു. കുഞ്ഞുങ്ങളെ തനിക്ക് വിട്ടുതരണമെന്നും അന്നവർ പറഞ്ഞിരുന്നു. പീറ്ററിൽനിന്ന് വൈകാരികവും, ശാരീരികവുമായ പീഡനങ്ങൾ നേരിടേണ്ടിവന്നുവെന്നും സെലീന ആരോപിച്ചു.

2025 ഒക്ടോബറിൽ ഓസ്ട്രിയയിലെ വീട്ടിൽനിന്ന് അയൽക്കാരുടെ സഹായത്തോടെ രക്ഷപ്പെട്ടുവെന്നും അതിനുശേഷമാണ് കേസ് നൽകിയതെന്നും അവർ വെളിപ്പെടുത്തി. 2011-ൽ വിവാഹിതരായ സെലീനയ്ക്കും പീറ്ററിനും മൂന്നുമക്കളാണുള്ളത്. ഓസ്ട്രിയയിൽ വ്യവസായിയും ഹോട്ടൽരംഗത്തെ പ്രമുഖനുമാണ് പീറ്റർ.

ഇപ്പോഴിതാ ഇത്തരം കേസുകളിൽ അതിജീവിച്ചവരോട് (survivors) പലപ്പോഴും പലരും ചോദിക്കാറുള്ള ഒരു കാര്യത്തെക്കുറിച്ച് സെലീന ഇൻസ്റ്റഗ്രാമിൽ കുറിക്കുകയാണ്. ''എന്തുകൊണ്ടാണ് ഇത്ര കാലമെടുത്തത്? എന്തുകൊണ്ട് വീടുവിട്ടില്ല''. തുടർന്ന് അവർ ഇങ്ങനെ എഴുതുന്നു,

''സക്‌സസ്ഫുളായ, വിദ്യാഭ്യാസമുള്ള ഒരാൾ 15 വർഷമായി ഒരു അബ്യൂസീവ് മാര്യേജിൽ തുടരാൻ കാരണമെന്താണ്? ഞാനാ ചോദ്യം എന്നോട് തന്നെ ചോദിച്ചു. ആദ്യ സംഭവത്തിന് ശേഷം ഞാൻ എന്തുകൊണ്ട് ഒഴിഞ്ഞുമാറിയില്ല? അതോ രണ്ടാമത്തെ സംഭവമോ...മൂന്നാമത്തേത്? ഞാൻ അന്ധയായിരുന്നോ? ദുർബലയാണോ? അതോ അതെനിക്ക് ശീലമായതോ? സത്യം ആളുകൾ കരുതുന്നതിലും കഠിനമാണ്. ദുരുപയോഗം അപൂർവ്വമായിട്ടാണ് അക്രമത്തോടെ ആരംഭിക്കുന്നത്. അത് പലപ്പോഴും സ്‌നേഹത്തോടെയാണ് ആരംഭിക്കുന്നത്. തീരാത്ത വാഗ്ദാനങ്ങളുണ്ടാവും. അപ്പോൾ ഒരു ഭാവി കെട്ടിപ്പടുക്കുകയാണെന്ന് നിങ്ങൾ വിശ്വസിക്കുന്നു''.

പക്ഷേ മോശം ദിവസങ്ങൾ മാത്രമല്ല ഉണ്ടായിരുന്നതെന്നും അവർ ഓർക്കുന്നു. ''ചിലപ്പോൾ നല്ല ദിവസങ്ങളുമുണ്ടാവാം. ക്ഷമാപണം. കണ്ണുനീർ. യാഥാർഥ്യമായി തോന്നുന്ന മാറ്റം. പ്രതീക്ഷയും പ്രത്യാശയും ഒരു ലഹരിയാണ്. മാനസികവും വാക്കാലുള്ളതുമായ ദുരുപയോഗം ഒരു മുറിവുകളും അവശേഷിപ്പിക്കില്ല. ആത്മവിശ്വാസം നിശബ്ദമായി ഇല്ലാതാകുന്നു. നിങ്ങൾ പൊരുത്തപ്പെടുന്നു. പിന്നെ അമിതമായി പൊരുത്തപ്പെടുന്നു. പിന്നെ സ്വയം ചോദ്യം ചോദിക്കുന്നു. ആദ്യ തവണ നിങ്ങളെ ഞെട്ടിക്കുന്നു. അഞ്ചാമത്തെത് നിങ്ങളെ ആശയക്കുഴപ്പത്തിലാക്കുന്നു. പത്താമത്തെത് 'നോർമൽ' ആയിത്തീരുന്നു. ഭയം പല ഘട്ടങ്ങളിലായി സംഭവിക്കുന്നു: ഒരു കുടുംബം തകർക്കൽ, കുട്ടികളെ വേദനിപ്പിക്കൽ, സാമ്പത്തിക അസ്ഥിരത, വീണ്ടും ആരംഭിക്കൽ, ഒറ്റയ്ക്കായിരിക്കൽ''.

എന്നിട്ടും താൻ അതിൽനിന്ന് വിട്ടുപോരാത്തതിന് കാരണങ്ങൾ പലതാണെന്ന് സെലീന പറയുന്നു. ''അത് പരിഹരിക്കാൻ കഴിയുമെന്ന് നിങ്ങൾ കരുതുന്നു. കൂടുതൽ സ്‌നേഹിക്കുക. കൂടുതൽ ക്രമീകരിക്കുക. ശാന്തത പാലിക്കുക. കൂടുതൽ ത്യാഗം ചെയ്യുക. പ്രത്യേകിച്ച് വിവാഹം എന്തുവിലകൊടുത്തും പവിത്രമാണെന്ന വിശ്വാസത്തിലാണ് നിങ്ങൾ വളർത്തപ്പെട്ടത്. അപമാനം. നിയന്ത്രണം. ഒറ്റപ്പെടൽ. നിങ്ങളുടെ സ്വന്തം ഓർമ്മയെ സംശയിക്കുന്നു. അതെ, ഞാൻ എല്ലാ രൂപങ്ങളും അനുഭവിച്ചിട്ടുണ്ട്. അപ്പോൾ, 'എന്തുകൊണ്ടാണ് നിങ്ങൾ അതിൽനിന്ന് പുറത്തുകടക്കാത്തത്?' എന്ന് ചോദിക്കുന്നതിനുപകരം, ബുദ്ധിമാനായ പുരുഷന്മാരോടും സ്ത്രീകളോടും വർഷങ്ങളായി നിങ്ങൾ ആ ട്രാപ്പിൽ കുടുങ്ങിക്കിടന്നത് എന്തുകൊണ്ടാണെന്ന് ചോദിക്കുക'', സെലീന കുറിക്കുന്നു.

കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi

Content Highlights: Celina Jaitly filed a legal case against husband Peter Haag seeking 50 crore compensation., The actress alleges years of physical and emotional abuse in her 15-year marriage., She explains the psychological trap that keeps educated and successful women in abusive relationships.