പഴയ ഇരുമ്പ് ശർക്കര ലായനിയിൽ പുളിപ്പിച്ച് മരത്തൊലികളുമായി ചേർത്താണ് കറുപ്പ് നിറം ഉണ്ടാക്കുന്നത്

ഓരോ നിമിഷവും പ്രകൃതിയോട് ചേർന്നുനിൽക്കണമെന്നാണ് ആഗ്രഹിക്കുന്നത്. എന്നെത്തന്നെ അതിനായി പാകപ്പെടുത്തുമ്പോൾ, 'കണ്ണകി' പ്രകൃതിയുടെ ഒരു ബൊട്ടിക് ആയി മാറണമെന്നും വിചാരിക്കുന്നു. സഹജീവികളോടുള്ള സ്‌നേഹവും പരിസ്ഥിതിയോട് കരുതലും കേവലം വാക്കുകളല്ല, മറിച്ച് ജീവിതചര്യയുടെ ഭാഗമാണ്. 'കണ്ണകി'യുടെ തുടക്കം മുതൽ തന്നെ ഓരോ ചുവടിലും മണ്ണറിഞ്ഞു മുന്നേറാൻ ശ്രദ്ധിച്ചിരുന്നു. ഇന്ന് ലോകം നേരിടുന്ന ഏറ്റവും വലിയ വെല്ലുവിളികളിലൊന്ന് മാലിന്യനിർമാർജനമാണ്. നമ്മളാൽ ഈ ഭൂമിക്ക് ഒരു ഭാരവും ഉണ്ടാകരുതെന്ന ഉറച്ച ബോധ്യം നമുക്കുണ്ടാകണം. അജൈവവസ്തുക്കളുടെ ഉപയോഗം പരമാവധി കുറച്ച് പ്രകൃതിയുമായി പൂർണ്ണമായും ഇണങ്ങിച്ചേരുക എന്നത് ഈ കാലഘട്ടത്തിൽ നാമോരോരുത്തരും ജീവിതവ്രതമായിത്തന്നെ ഏറ്റെടുക്കേണ്ടതാണ്. ഒരു സാരി തിരഞ്ഞെടുക്കുമ്പോൾ അത് എങ്ങനെ വിറ്റ് ലാഭമുണ്ടാക്കാം എന്നതിലുപരി, അതിലടങ്ങിയിരിക്കുന്ന കലയെയും പ്രകൃതിയെയുമാണ് ഞാൻ കാണുന്നത്. ഈയിടെ ഒരു സുഹൃത്തിനോട് ഇത് പങ്കുവെച്ചപ്പോൾ, 'എങ്കിൽ പിന്നെ ഇതൊക്കെ വെറുതെ കൊടുത്തു കൂടെ?' എന്ന് പരിഹാസത്തോടെ അദ്ദേഹം ചോദിക്കുകയുണ്ടായി. സമാനമായ ചോദ്യങ്ങൾ ഇനിയും ഉണ്ടായേക്കാം എന്നതുകൊണ്ടാണ് എന്റെ നിലപാട് ഇവിടെ വ്യക്തമാക്കുന്നത്.

പ്രകൃതിദത്ത ചായങ്ങളും (Natural dye) പരുത്തി വസ്ത്രങ്ങളും പരമാവധി ഉൾക്കൊള്ളിച്ചുകൊണ്ട്, പരിസ്ഥിതിക്കും മനുഷ്യനും ഒരുപോലെ ഗുണകരമാവുക എന്ന ലക്ഷ്യത്തോടെയാണ് കണ്ണകിയെ പൂർണ്ണമായും രൂപപ്പെടുത്തിയെടുത്തത്. അങ്ങനെയാണ് പ്രകൃതിയുടെ തനിമയാർന്ന നിറക്കൂട്ടുകൾ എങ്ങനെയാണ് ഉണ്ടാക്കുന്നത് എന്ന് തേടി ഷിമോഗയിലേക്ക് യാത്രതിരിച്ചത്. പ്രകൃതിയുടെ വരദാനങ്ങളും മനുഷ്യന്റെ കഠിനാധ്വാനവും ഒരേ നൂലിൽ കോർത്തുവച്ച മനോഹരമായ ഒരനുഭവമായിരുന്നു ആ യാത്ര.

Content Highlights: Discover the secrets of natural dyes and how they transform fabrics. Journey with us to learn the art and chemistry behind these eco-friendly colors. Explore the making of natural dyes and their sustainable use.