പേരുകേട്ട 'ബ്ലാക്ക് ഓർലോവ്' വജ്രം, മുറിക്കുന്നതിലൂടെ ശാപം ഇല്ലാതാക്കാൻ കഴിയുമെന്ന് കരുതി

'വിവേകബുദ്ധി കഴിഞ്ഞാൽ, ലോകത്തിലെ ഏറ്റവും അപൂർവമായ കാര്യങ്ങൾ മുത്തുകളും വജ്രങ്ങളുമാണ്,' പതിനേഴാം നൂറ്റാണ്ടിലെ ഫ്രഞ്ച് തത്വചിന്തകനായ ജീൻ ഡി ലാ ബ്രൂയറിന്റെ വാക്കുകളാണിത്. ഏറ്റവും അപൂർവമായ രത്‌നങ്ങൾക്ക് ശാപമുണ്ടാകുമെന്നും അവ ഉടമകൾക്ക് മരണവും നാശവും കൊണ്ടുവരുമെന്നും അദ്ദേഹം അറിഞ്ഞിരുന്നില്ല. ചരിത്രം പരിശോധിച്ചാൽ, രത്‌നങ്ങൾ ശപിക്കപ്പെട്ടവയാണോയെന്ന് സംശയം തോന്നാം.

അത്തരത്തിലൊന്നാണ്‌ 'ബ്ലാക്ക് ഓർലോവ്' (Black Orlov) എന്ന വജ്രം. ഉടമകളെ നാശത്തിലേക്കും മരണത്തിലേക്കും നയിക്കുന്നു എന്ന അപഖ്യാതിയുണ്ട് ഇതിന്. വശ്യമായ സൗന്ദര്യത്തിന് പേരുകേട്ട ബ്ലാക്ക് ഓർലോവ് വജ്രം 1800-കളിലാണ് ആദ്യമായി കണ്ടെത്തിയത്. ഗൺമെറ്റൽ ഗ്രേ നിറമുള്ള ഇതിന്റെ ഖനനത്തെയും വ്യാപാരിയെയും കുറിച്ചുള്ള രേഖകൾ അവ്യക്തമാണ്.

ചരിത്രരേഖകൾ പ്രകാരം ഈ വജ്രം ഇന്ത്യയിൽ നിന്ന് കണ്ടെത്തിയതാകാനാണ് സാധ്യത. എന്നാൽ ഇന്ത്യ ഇത്തരത്തിലുള്ള കറുത്ത രത്‌നങ്ങൾ ഉത്പാദിപ്പിക്കുന്നതിൽ അറിയപ്പെടാത്തതിനാൽ പല രത്‌നവിദഗ്ധരും ഇത് അസാധ്യമാണെന്ന് വിശ്വസിക്കുന്നു.  അവ്യക്തമായ ഭൂതകാലമുണ്ടായിട്ടും, ഇതിന്റെ ശാപത്തെക്കുറിച്ചുള്ള കഥകൾ ഇന്നും നിലനിൽക്കുന്നു. 19-ാം നൂറ്റാണ്ടിന്റെ തുടക്കത്തിൽ ഇന്ത്യയിൽ നിന്ന് മോഷ്ടിക്കപ്പെടുമ്പോൾ ഈ രത്‌നത്തിന് 195 കാരറ്റ് തൂക്കമുണ്ടായിരുന്നു. തമിഴ്‌നാട്ടിലെ പുതുച്ചേരിക്ക് അടുത്തുള്ള ഒരു ക്ഷേത്രത്തിലെ ബ്രഹ്‌മാവിന്റെ വിഗ്രഹത്തിന്റെ കണ്ണുകളിലൊന്നായിരുന്നു ഇത്. അതിനാൽ ഇതിനെ 'ബ്രഹ്‌മാവിന്റെ കണ്ണ്' (Eye of Brahma) എന്ന് വിളിച്ചിരുന്നു. എന്നാൽ ക്ഷേത്രത്തിന്റെ പേരും സ്ഥലവും ചരിത്രത്തിൽ അവ്യക്തമായി തുടരുന്നു.

ബ്രഹ്‌മാവിന്റെ കണ്ണ് മോഷ്ടിച്ചതിനെക്കുറിച്ച് രണ്ട് കഥകളുണ്ട്. ഒരു സന്യാസിയാണ് ഇത് മോഷ്ടിച്ചതെന്നും പിന്നീട് അദ്ദേഹം കൊല്ലപ്പെട്ടുവെന്നും ചില തെളിവുകൾ സൂചിപ്പിക്കുന്നു. ഒരു ജെസ്യൂട്ട് വൈദികനാണ് ഇത് മോഷ്ടിച്ചതെന്നാണ് മറ്റൊരു കഥ. അദ്ദേഹത്തിന് എന്ത് സംഭവിച്ചുവെന്ന് ആർക്കും അറിയില്ല. ഐതിഹ്യമനുസരിച്ച്, ഈ രത്‌നത്തെ ബ്രഹ്‌മാവ് ശപിച്ചതാണെന്ന് വിശ്വസിക്കപ്പെടുന്നു. ഇത് കൈവശം വയ്ക്കുന്നവർക്കോ ഇതിനോട് സമ്പർക്കം പുലർത്തുന്നവർക്കോ നിർഭാഗ്യം വരുമെന്ന് ഇന്നും ആളുകൾ വിശ്വസിക്കുന്നു. 1932-ൽ ജെ.ഡബ്ല്യു. പാരിസ് എന്ന വജ്ര വ്യാപാരി ഈ കറുത്ത വജ്രം അമേരിക്കയിലേക്ക് കൊണ്ടുപോയി. ന്യൂയോർക്കിലെ ഒരു അംബരചുംബിയായ കെട്ടിടത്തിന് മുകളിൽ നിന്ന് ചാടി അദ്ദേഹം ആത്മഹത്യ ചെയ്തതായി പറയപ്പെടുന്നു.

ലിയോണില ഗാലിറ്റ്സിൻ-ബരിയറ്റിൻസ്‌കി, നാദിയ വൈജിൻ-ഓർലോവ് എന്നീ രണ്ട് റഷ്യൻ രാജകുമാരിമാർ എങ്ങനെ ഇതിന്റെ ഉടമകളായി എന്നതിനെക്കുറിച്ചും വ്യക്തമായ രേഖകളില്ല. അവർക്ക് ശേഷമാണ് ഈ രത്‌നത്തിന് 'ഓർലോവ് ഡയമണ്ട്' എന്ന പേര് ലഭിച്ചത്. എന്നാൽ 1947-ൽ ഇരുവരും കെട്ടിടത്തിന് മുകളിൽ നിന്ന് ചാടി മരിച്ചതായി റിപ്പോർട്ടുണ്ട്. ശ്രദ്ധേയമായ ഒരു കാര്യം, ഈ രാജകുമാരിമാരുടെ വംശപരമ്പര പരിശോധിച്ചാൽ ഒന്നും കണ്ടെത്താനാവില്ല എന്നതാണ്. അതിനാൽ, ഈ രത്‌നത്തിന്റെ ശാപകഥകൾ മുന്നോട്ട് കൊണ്ടുപോകാൻ മെനഞ്ഞെടുത്ത വെറും കെട്ടുകഥകളാണിവ എന്ന് പല ചരിത്രകാരന്മാരും വാദിക്കുന്നു.

ചാൾസ് വിൻഡ്സൺ എന്ന ധീരനായ വജ്ര വ്യാപാരി ഈ വജ്രം വാങ്ങുക മാത്രമല്ല, 195 കാരറ്റുള്ള ഈ വജ്രത്തെ മൂന്ന് കഷണങ്ങളായി മുറിക്കുകയും ചെയ്തു. രത്‌നം മുറിക്കുന്നതിലൂടെ അതിന്റെ നെഗറ്റീവ് ഊർജ്ജത്തെ വിഭജിക്കാനും ശാപം ഇല്ലാതാക്കാനും കഴിയുമെന്ന് അദ്ദേഹം കരുതി. ഇന്ന് നമ്മൾ മ്യൂസിയങ്ങളിൽ കാണുന്നത് 67.49 കാരറ്റുള്ള കുഷ്യൻ കട്ട് ബ്ലാക്ക് ഓർലോവ് വജ്രമാണ്. ന്യൂയോർക്കിലെ അമേരിക്കൻ മ്യൂസിയം ഓഫ് നാച്ചുറൽ ഹിസ്റ്ററിയിലും ലണ്ടനിലെ നാച്ചുറൽ ഹിസ്റ്ററി മ്യൂസിയത്തിലും ഇത് പ്രദർശിപ്പിച്ചിരുന്നു.

പിന്നീട് ഇത് 108 വജ്രങ്ങൾ പതിപ്പിച്ച ഒരു നെക്ലേസായി മാറ്റി. ബാക്കിയുള്ള രണ്ട് ഭാഗങ്ങൾ എവിടെയാണെന്ന് ആർക്കും അറിയില്ല, ഇത് ചരിത്രകാരന്മാർക്കും വജ്ര പ്രേമികൾക്കും ഇടയിൽ ദുരൂഹത വർദ്ധിപ്പിക്കുന്നു. 2006-ലെ ഓസ്‌കാർ പുരസ്‌കാര ചടങ്ങിൽ ഫെലിസിറ്റി ഹഫ്മാൻ ഈ നെക്ലേസ് ധരിക്കാൻ തീരുമാനിച്ചിരുന്നതായി വാർത്തകളുണ്ടായിരുന്നു. എന്നാൽ അവസാന നിമിഷം അവർ തീരുമാനം മാറ്റി. പകരം ലളിതമായ വജ്ര കമ്മലുകളാണ് അവർ ധരിച്ചത്.

ഹഫ്മാൻ നെക്ലേസ് ധരിക്കേണ്ടെന്ന് തീരുമാനിച്ചതിന് മാസങ്ങൾക്ക് ശേഷം, 2006 ഒക്ടോബറിൽ ക്രിസ്റ്റീസ് ലേലത്തിൽ ഇത് 352,000 ഡോളറിന് (ഏകദേശം 3.1 കോടി രൂപ) വിറ്റുപോയി. രസകരമായ കാര്യം, ഇതിന്റെ മൂല്യം ഏകദേശം 1 ലക്ഷം മുതൽ 2 ലക്ഷം ഡോളർ വരെയാണ് കണക്കാക്കിയിരുന്നത്.

2004 മുതൽ 2006 വരെ വാച്ച് മേക്കേഴ്‌സ് ഡയമണ്ട്‌സ് ആൻഡ് ജ്വല്ലറി പ്രസിഡന്റ് ഡെന്നിസ് പെറ്റിമെസാസ് ആയിരുന്നു ഈ നെക്ലേസിന്റെ ഉടമ. ശാപത്തെക്കുറിച്ച് അദ്ദേഹം പറഞ്ഞത്, 'ബ്ലാക്ക് ഓർലോവ് കൈവശം വെക്കുന്നതിൽ എനിക്ക് ഒരിക്കലും പേടി തോന്നിയിട്ടില്ല' എന്നാണ്. ചിലപ്പോൾ അദ്ദേഹം പറയുന്നത് ശരിയാകാം. വജ്രം മുറിച്ചപ്പോൾ ശാപം മാറിയിട്ടുണ്ടാകാം. 

കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi

Content Highlights: Explore the mysterious and cursed history of the Black Orlov Diamond, a gem shrouded in legend. Was it truly cursed, or just a tale of misfortune?