‘എന്റെ ചിരി ഇപ്പോൾ ട്രെൻഡിങ്ങാണ്’; ട്രോളുകൾക്ക് മറുപടിയുമായി വരുൺ ധവാൻ

ബോളിവുഡ് താരം വരുൺ ധവാന്റെ വൈറൽ 'വൺ-സൈഡ്' ചിരിയും മീമുകളുമാണ് ഇപ്പോൾ ഇന്റർനെറ്റിൽ നിറയെ. ഈ വിഷയത്തിൽ പ്രതികരിക്കുകയാണ് താരമിപ്പോൾ. തന്റെ പുതിയ ചിത്രമായ 'ബോർഡർ 2'-ന്റെ പ്രമോഷന്റെ ഭാഗമായി കർവാർ നേവൽ ബേസിലേക്ക് പോകുന്നതിനിടെയാണ് വരുൺ ഇൻസ്റ്റഗ്രാം ലൈവിൽ വന്നത്. യാത്രയിൽ ഗായകൻ വിശാൽ മിശ്രയും അദ്ദേഹത്തിനൊപ്പം ഉണ്ടായിരുന്നു.

തന്റെ ഒരു വശത്തേക്കുള്ള ചിരി വൈറലാവുകയും മീമുകളായി മാറുകയും ചെയ്തതോടെ, ഇന്റർനെറ്റിനൊപ്പം അത് ആസ്വദിച്ച് ചിരിക്കുകയാണ് വരുൺ. ഗായകൻ വിശാൽ മിശ്രയ്ക്ക് തന്റെ ഈ സിഗ്നേച്ചർ ചിരി എങ്ങനെ ചെയ്യണമെന്ന് പഠിപ്പിച്ചു കൊടുക്കുന്നതായും വീഡിയോയിൽ കാണാം.

ലൈവിൽ ആരാധകരോട് സംസാരിക്കവേ, തന്റെ ചിരിയെക്കുറിച്ചുള്ള ചർച്ചകളെ വരുൺ നേരിട്ട് പരാമർശിച്ചു. വിശാലിനെ നോക്കി അദ്ദേഹം പറഞ്ഞു, "എന്റെ ചിരി ഇപ്പോൾ ട്രെൻഡിങാണെന്ന് എനിക്കറിയാം." പിന്നാലെ തന്റെ ആ വൈറൽ ചിരി വരുത്തിക്കൊണ്ട് വരുൺ പൊട്ടിച്ചിരിച്ചു. വിശാലും ഒപ്പം കൂടി. ഈ ചിരി ഒന്ന് അനുകരിക്കാൻ വരുൺ വിശാലിനോട് ആവശ്യപ്പെട്ടു. "ആദ്യം നന്നായി ചിരിക്കുക, എന്നിട്ട് ഒരു വശത്തെ ചിരി മാത്രം വിടുക," വരുൺ ഉപദേശിച്ചു. "ഏതായാലും എനിക്ക് സന്തോഷമേയുള്ളൂ, എന്റെ കൂടെ ഇന്ന് ഇന്ത്യ മുഴുവൻ ചിരിക്കുകയാണല്ലോ" അദ്ദേഹം പറഞ്ഞു.

നേരത്തെ, 'ബോർഡർ 2'-ലെ ഗാനരംഗത്തെ തന്റെ അഭിനയത്തെക്കുറിച്ച് വന്ന വിമർശനങ്ങൾക്കും വരുൺ മറുപടി നൽകിയിരുന്നു. "നിങ്ങളുടെ അഭിനയത്തെ ആളുകൾ ചോദ്യം ചെയ്യുന്നുണ്ട്, അതിനെക്കുറിച്ച് എന്താണ് പറയാനുള്ളത്?" എന്ന് ചോദിച്ച ആരാധകന്, "ഈ ചോദ്യങ്ങൾ കാരണമാണ് ആ പാട്ട് ഹിറ്റായത്, എല്ലാവരും അത് ആസ്വദിക്കുന്നു, ദൈവാനുഗ്രഹം," എന്നാണ് വരുൺ മറുപടി നൽകിയത്.

അനുരാഗ് സിംഗ് സംവിധാനം ചെയ്യുന്ന 'ബോർഡർ 2'-ൽ സണ്ണി ഡിയോൾ, ദിൽജിത് ദോസഞ്ജ്, അഹാൻ ഷെട്ടി എന്നിവരും പ്രധാന വേഷങ്ങളിൽ എത്തുന്നു. 1997-ൽ ജെ.പി. ദത്ത ഒരുക്കിയ 'ബോർഡർ' എന്ന സൂപ്പർഹിറ്റ് ചിത്രത്തിന്റെ രണ്ടാം ഭാഗമാണിത്. ഭൂഷൺ കുമാർ, കൃഷൻ കുമാർ, ജെ.പി. ദത്ത, നിധി ദത്ത എന്നിവർ ചേർന്നാണ് ചിത്രം നിർമ്മിക്കുന്നത്. ജനുവരി 23-ന് ചിത്രം തിയേറ്ററുകളിലെത്തും.

ജാൻവി കപൂറിനൊപ്പം അഭിനയിച്ച 'സണ്ണി സംസ്കാരി കി തുളസി കുമാരി' എന്ന ചിത്രത്തിലാണ് വരുൺ അവസാനമായി അഭിനയിച്ചത്.

കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi

Content Highlights: Bollywood star Varun Dhawan responds to his trending one-sided laugh, memes, and criticisms for `Border 2`. See his funny reaction and learn more!