‘ഞാൻ ഇന്ന് ഷാരൂഖ് ഖാൻ ആയി നിൽക്കുന്നത് സലിം ഖാൻ കാരണമാണ്’

പ്രശസ്ത തിരക്കഥാകൃത്തും നടൻ സൽമാൻ ഖാന്റെ പിതാവുമായ സലിം ഖാൻ, മസ്തിഷ്ക രക്തസ്രാവത്തെത്തുടർന്ന് മുംബൈയിലെ ലീലാവതി ആശുപത്രിയിൽ ചികിത്സയിലാണ്. ഫെബ്രുവരി 17-നാണ് അദ്ദേഹത്തെ ആശുപത്രിയിൽ പ്രവേശിപ്പിച്ചത്. ശസ്ത്രക്രിയയ്ക്ക് ശേഷം അദ്ദേഹം നിലവിൽ വെന്റിലേറ്ററിലാണ്.

സലിം ഖാൻ ആശുപത്രിയിലായ വാർത്ത പുറത്തുവന്നതോടെ, ഷാരൂഖ് ഖാൻ മുൻപ് നൽകിയ ഒരു അഭിമുഖം വീണ്ടും സോഷ്യൽ മീഡിയയിൽ ശ്രദ്ധ നേടുകയാണ്. സലിം ഖാനോടും കുടുംബത്തോടും തനിക്കുള്ള കടപ്പാടാണ് അദ്ദേഹം, അഭിമുഖത്തിൽ പങ്കുവെക്കുന്നത്.

"ഞാൻ ഇന്ന് ഷാരൂഖ് ഖാൻ ആയി നിൽക്കുന്നത് സലിം ഖാൻ കാരണമാണ്. സിനിമയിൽ അവസരം തേടി ആദ്യമായി മുംബൈയിൽ എത്തിയ കാലത്ത്, സൽമാൻ ഖാന്റെ വീട്ടിൽ നിന്നാണ് ഞാൻ ഭക്ഷണം കഴിച്ചിരുന്നത്. സലിം ഖാൻ ജി എന്നെ ഒരുപാട് പിന്തുണച്ചു. അദ്ദേഹത്തിന്റെ കരുതൽ കാരണമാണ് ഞാൻ ഇന്നത്തെ നിലയിലെത്തിയത്" 2018-ൽ ഐ.എ.എൻ.എസിന് നൽകിയ അഭിമുഖത്തിൽ ഷാരൂഖ് ഓർത്തെടുത്തു.

80-കളുടെ അവസാനത്തിൽ ടെലിവിഷനിലൂടെ അഭിനയം തുടങ്ങിയ ഷാരൂഖ്, 1992-ൽ പുറത്തിറങ്ങിയ 'ദീവാന'യിലൂടെയാണ് ബോളിവുഡിൽ അരങ്ങേറ്റം കുറിച്ചത്. സലിം ഖാന്റെ വീടായ 'ഗാലക്സി അപ്പാർട്ട്മെന്റിലെ' അവരുടെ തുറന്ന മനസ്സിനെക്കുറിച്ച് നടൻ സൂരജ് പാഞ്ചോളിയും മുൻപ് സംസാരിച്ചിട്ടുണ്ട്. "ആ വീടിന്റെ വാതിൽ എപ്പോഴും തുറന്നു കിടക്കും. ആർക്കും എപ്പോൾ വേണമെങ്കിലും അങ്ങോട്ട് ചെല്ലാം. അവിടെ ആരെയും തടയില്ല. നിങ്ങൾക്ക് നേരെ അകത്തേക്ക് കയറാം, ഫ്രിഡ്ജ് തുറന്ന് ഇഷ്ടമുള്ളത് കഴിക്കാം," എന്നാണ് സൂരജ് പറഞ്ഞത്. തുടക്കക്കാരായ നടന്മാരോടും സുഹൃത്തുക്കളോടും സലിം ഖാൻ വളരെ സ്നേഹം കാണിച്ചിരുന്നു.

ആരോഗ്യനില മോശമായതിനെത്തുടർന്ന് സലിം ഖാന്റെ ഭാര്യമാരായ സൽമ ഖാൻ, ഹെലൻ, മകൻ സൽമാൻ ഖാൻ എന്നിവർ ബുധനാഴ്ച ആശുപത്രിയിലെത്തി അദ്ദേഹത്തെ സന്ദർശിച്ചു. രക്തസമ്മർദ്ദം പെട്ടെന്ന് വർദ്ധിച്ചതിനെത്തുടർന്നുണ്ടായ തലകറക്കമാണ് മസ്തിഷ്കത്തിലെ രക്തസ്രാവത്തിന് കാരണമായതെന്ന് റിപ്പോർട്ടുകൾ സൂചിപ്പിക്കുന്നു.

അദ്ദേഹത്തെ ചികിത്സിക്കുന്ന ഡോക്ടർ ജലീൽ പാർക്കർ ബുധനാഴ്ച മാധ്യമങ്ങളോട് പറഞ്ഞത് ഇങ്ങനെയാണ്: "രക്തസ്രാവം വളരെ കുറഞ്ഞ അളവിലായിരുന്നു. ഇന്ന് രാവിലെ ഒരു ചെറിയ ശസ്ത്രക്രിയ വിജയകരമായി പൂർത്തിയാക്കി. അദ്ദേഹത്തിന്റെ ആരോഗ്യനില തൃപ്തികരമാണ്, എങ്കിലും പ്രായം കണക്കിലെടുത്ത് നിരീക്ഷണം ആവശ്യമായതിനാൽ വെന്റിലേറ്ററിൽ തുടരുകയാണ്. നാളെയോടെ വെന്റിലേറ്റർ മാറ്റാൻ കഴിയുമെന്ന് പ്രതീക്ഷിക്കുന്നു."

കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi

Content Highlights: An old interview of Shah Rukh Khan resurfaces, crediting Salim Khan for his career. Learn about SRK`s early struggles and Salim Khan`s support.