ബാൽക്കണിയിൽ നിന്ന് നോക്കിയാൽ അറബിക്കടലിന്റെ മനോഹരമായ ദൃശ്യങ്ങൾ, 30 കോടിയുടെ ആഡംബര വസതി

മൈതാനത്തെ തകർപ്പൻ ബാറ്റിങ്ങ് പോലെ തന്നെ ശാന്തമായ പെരുമാറ്റം കൊണ്ടും ശ്രദ്ധേയനാണ് ഇന്ത്യൻ ക്രിക്കറ്റ് താരം രോഹിത് ശർമ്മ. അന്താരാഷ്ട്ര ക്രിക്കറ്റിൽ നിരവധി റെക്കോർഡുകൾക്ക് ഉടമയായ അദ്ദേഹം ഏകദിന ക്രിക്കറ്റിൽ മൂന്ന് ഇരട്ട സെഞ്ച്വറികൾ (209, 264, പുറത്താകാതെ 208) നേടിയ ഏക താരമാണ്. ശ്രീലങ്കയ്‌ക്കെതിരെ 2014-ൽ നേടിയ 264 റൺസ് ഏകദിനത്തിലെ ഏറ്റവും ഉയർന്ന വ്യക്തിഗത സ്കോർ, ഇന്നും അദ്ദേഹത്തിന് സ്വന്തമായ റെക്കോർഡാണ്.

മുംബൈയിലെ ആഡംബര വസതി

38-കാരനായ രോഹിത് ശർമ്മ, മുംബൈയിലെ വർളിയിലുള്ള ആഡംബര ഫ്ലാറ്റിലാണ് താമസം. അറബിക്കടലിന് അഭിമുഖമായി സ്ഥിതി ചെയ്യുന്ന ഈ വസതിക്ക് അതീവ സുരക്ഷയുമുണ്ട്.

വർളിയിലെ അഹൂജ ടവേഴ്സിന്റെ (Ahuja Towers) 29-ാം നിലയിലാണ് താരം താമസിക്കുന്നത്. ഏകദേശം 6,000 ചതുരശ്ര അടിയിൽ നാല് കിടപ്പുമുറികളുള്ള ഫ്ലാറ്റാണിത്. അവിടെ നിന്ന് നോക്കിയാൽ അറബിക്കടലിന്റെ, 270 ഡിഗ്രി മനോഹരമായ ദൃശ്യം ആസ്വദിക്കാൻ സാധിക്കുംവിധത്തിലാണ് ഇത് പണിതിരിക്കുന്നത്. ഏകദേശം 30 കോടി രൂപ വിലമതിക്കുന്ന ആഡംബര വസതിയാണിത്.

വീടിന്റെ പ്രത്യേകതകൾ

വെള്ളയും ഇളം നിറങ്ങളും ചേർന്ന ന്യൂട്രൽ കളർ പാലറ്റാണ് വീടിനായി രോഹിത്തും ഭാര്യ റിതിക സജ്‌ദേയും തിരഞ്ഞെടുത്തത്. ആധുനിക രീതിയിലുള്ള മരം കൊണ്ടുള്ള ഫർണിച്ചറുകളും കലാസൃഷ്ടികളും വീടിന് മാറ്റുകൂട്ടുന്നു. 13 അടി ഉയരമുള്ള മേൽക്കൂരയാണ് ലിവിങ് റൂമിനെ കൂടുതൽ വിശാലമാക്കുന്നത്.

ഒരു വർക്ക് സ്പേസ്, ലൈബ്രറി, എന്റർടൈൻമെന്റ് ഏരിയ, വാക്ക്-ഇൻ വാർഡ്രോബ് എന്നിവ വീടിനകത്തുണ്ട്. അറബിക്കടലിന്റെ മനോഹരമായ കാഴ്ച്ച നൽകുന്ന വലിയ ബാൽക്കണിയിൽ ഔട്ട്‌ഡോർ സീറ്റിങും ചെടികളും ക്രമീകരിച്ചിട്ടുണ്ട്.

അഹൂജ ടവേഴ്സിലെ ആഡംബരങ്ങൾ

താമസക്കാർക്കായി മിനി തിയേറ്റർ, സ്പാ, നീന്തൽക്കുളം, സ്കൈ കഫേ, ആവശ്യാനുസരണം ലഭ്യമാകുന്ന ഷെഫ് സേവനം തുടങ്ങിയ അത്യാധുനിക സൗകര്യങ്ങൾ ഇവിടെയുണ്ട്.

രോഹിത്തിന്റെ പ്രധാന റെക്കോർഡുകൾ

2019-ലെ ഐസിസി ക്രിക്കറ്റ് ലോകകപ്പിൽ, ഒരു ടൂർണമെന്റിൽ അഞ്ച് സെഞ്ച്വറികൾ നേടുന്ന ആദ്യ താരമായി മാറിയ വ്യക്തിയാണ് അദ്ദേഹം. ക്രിസ് ഗെയിലിനെ മറികടന്ന് അന്താരാഷ്ട്ര ക്രിക്കറ്റിൽ ഏറ്റവും കൂടുതൽ സിക്സറുകൾ നേടുന്ന താരമെന്ന റെക്കോർഡും രോഹിത്തിന്റെ പേരിലാണ്. മുംബൈ ഇന്ത്യൻസിനെ അഞ്ച് തവണ (2013, 2015, 2017, 2019, 2020) ഐപിഎൽ കിരീടത്തിലേക്ക് നയിച്ച ക്യാപ്റ്റനുമായിരുന്നു അദ്ദേഹം.

കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi

Content Highlights: Located in Ahuja Towers, Worli, Mumbai on the 29th floor., Spans 6,000 sq ft with 4 bedrooms and a 270-degree view of the Arabian Sea., Estimated value of the property is 30 crore rupees., Features include a library, personal workspace, entertainment area, and modern neutral decor., Building amenities include a spa, mini-theatre, sky cafe, and private chef services.