കെനിഷ 'ദൈവത്തിന്റെ സമ്മാനം' എന്ന് രവി മോഹൻ; കണ്ണുനിറഞ്ഞ് കെനിഷ

ഗായികയും സുഹൃത്തുമായ കെനിഷ ഫ്രാൻസിസിനെ 'ദൈവത്തിന്റെ സമ്മാനം' എന്നു വിശേഷിപ്പിച്ച് നടൻ രവി മോഹൻ. രവി മോഹൻ സ്റ്റുഡിയോസ് എന്ന തന്റെ നിർമാണക്കമ്പനിയുടെ ലോഞ്ചിങ് ചടങ്ങിൽ സംസാരിക്കുകയായിരുന്നു രവി.

''കെനിഷ ഇല്ലായിരുന്നുവെങ്കിൽ ഈ പരിപാടി സാധ്യമാകുമായിരുന്നില്ല. ഇത്രയധികം ആളുകൾ ഈ പരിപാടിക്ക് എത്തുമെന്ന് എനിക്കറിയില്ലായിരുന്നു. ഒരു മനുഷ്യൻ ജീവിതത്തിൽ കുടുങ്ങിക്കിടക്കുമ്പോൾ, ദൈവം ഏതെങ്കിലും രൂപത്തിൽ ഒരു പരിഹാരം അല്ലെങ്കിൽ സമ്മാനം അയയ്ക്കും. എന്നെ സംബന്ധിച്ചിടത്തോളം ആ സമ്മാനം കെനിഷയാണ്. എന്നെത്തന്നെ മനസ്സിലാക്കാൻ അവൾ സഹായിച്ചു. എല്ലാവരുടെയും ജീവിതത്തിൽ അവളെപ്പോലെ ഒരാൾ ഉണ്ടായിരുന്നെങ്കിൽ എന്ന് ഞാൻ ആഗ്രഹിക്കുന്നു'', രവിയുടെ ഈ വാക്കുകൾ കണ്ണീരോടെയാണ് സദസ്സിലുണ്ടായിരുന്ന കെനിഷ സ്വീകരിച്ചത്.

ഇതുവരെയുണ്ടായ നെഗറ്റീവ് കമന്റുകളൊന്നും തന്നെ ഒരുതരത്തിലും ബാധിച്ചിട്ടില്ലെന്നും രവി പറഞ്ഞു. സംസാരിക്കുന്നതിനിടെ കെനിഷയും രവി മോഹനെ പ്രശംസിച്ചു.

നിർമാണക്കമ്പനിയുടെ പ്രഖ്യാപനത്തിന് മുന്നോടിയായി രവി മോഹനും കെനിഷ ഫ്രാൻസിസും ക്ഷേത്രദർശനം നടത്തിയിരുന്നു. ഈ ചിത്രങ്ങൾ സോഷ്യൽമീഡിയയിൽ വൈറലായി. രവി മോഹൻ ഭാര്യ ആർതിയുമായുള്ള വേർപിരിയൽ പ്രഖ്യാപിച്ചപ്പോൾ തൊട്ട് വിവാദങ്ങളിലിടം പിടിച്ച പേരാണ് കെനിഷയുടേത്.

2009-ലാണ് രവിയും ആർതിയും വിവാഹിതരായത്. 2024-ൽ രവി സോഷ്യൽമീഡിയയിലൂടെ വേർപിരിയൽ പ്രഖ്യാപിച്ചു. തന്റെ അറിവോടെയല്ല ഈ വേർപിരിയലെന്ന് പറഞ്ഞ് ആർതി രംഗത്തെത്തി. തങ്ങളുടെ ബന്ധം വഷളാവാൻ കാരണം കെനിഷയാണെന്ന് ആർതി ആരോപിച്ചു. എന്നാൽ, പ്രശ്‌നങ്ങളുണ്ടായപ്പോൾ തന്നെ രക്ഷിച്ച ലൈഫ്‌ലൈൻ എന്നാണ് കെനിഷയെക്കുറിച്ച് രവി പറഞ്ഞത്.

കൂടുതല്‍ ഫീച്ചറുകള്‍ വായിക്കാന്‍ ഗൃഹലക്ഷ്മി വാട്സാപ്പ് ഗ്രൂപ്പില്‍ അംഗമാകൂ:https://mbiurl.in/grihalakshmi

Content Highlights: Actor Ravi Mohan emotionally thanked singer Kenishaa Francis, calling her `God`s gift` at his studio launch