പഴയീച്ചകൾ ശല്യപ്പെടുത്തുന്നുണ്ടോ? മഴക്കാലത്ത് കൂടുതൽ കരുതൽ വേണം

വീട്ടിലെ പച്ചക്കറികളിലും പഴക്കുട്ടകളിലും പാത്രങ്ങളിലുമെല്ലാം പതുങ്ങിയിരിക്കുന്ന, ഒരനക്കം തട്ടുമ്പോഴേക്കും കൂട്ടമായി പറന്നുവരുന്ന പഴയീച്ചകൾ മഴക്കാലമെത്തുമ്പോൾ കൂടുതൽ ശല്യക്കാരാവാറുണ്ട്. ചക്കയും മാങ്ങയും മറ്റു പഴങ്ങളും ധാരാളമുണ്ടാകുന്ന സമയമായതിനാൽ മഴക്കാലത്ത് പഴയീച്ചകളും പെരുകും. എന്തെങ്കിലും ഭക്ഷണം അടച്ചുവെക്കാൻ വൈകിപ്പോയാൽ ഇവർ കൂട്ടമായെത്തി അതിലിരിക്കുകയും ചെയ്യും.

തൊടിയിലും മറ്റും വീണുകിടക്കുന്ന പഴങ്ങൾ പഴയീച്ചകൾക്ക് പെരുകാൻ അവസരമൊരുക്കാറുണ്ട്. അഴുകിത്തുടങ്ങിയതും പുളിച്ചതുമായ ജൈവവസ്തുക്കൾ ഇവയെ ആകർഷിക്കും. പഴയീച്ചകളെ ഒഴിവാക്കാൻ ആദ്യം ചെയ്യേണ്ടത് അവയ്ക്ക് ഭക്ഷണത്തിനും പ്രജനനത്തിനുമുള്ള സാഹചര്യങ്ങൾ ഇല്ലാതാക്കുകയാണ്. പഴുത്ത പഴങ്ങളും പച്ചക്കറികളും അടുക്കളയിൽ തുറന്നുവെച്ചിട്ടുണ്ടെങ്കിൽ അവ കൃത്യമായി അടച്ചുവെക്കാം.

മറ്റു മാർഗങ്ങൾ

• വേസ്റ്റ് ബിന്നുകൾ വിനാഗിരി കൊണ്ടോ അണുനാശിനി കൊണ്ടോ വൃത്തിയാക്കാം. ഭക്ഷണം പറ്റിപ്പിടിച്ച കുപ്പികൾ, ക്യാനുകൾ, ജ്യൂസ് പാത്രങ്ങൾ എന്നിവയും വൃത്തിയാക്കണം.
• സിങ്ക് ഡ്രെയിനുകൾ വൃത്തിയാക്കാം- പഴയീച്ചകൾ പതുങ്ങിയിരിക്കുന്ന ഇടങ്ങളാണ് സിങ്ക് ഡ്രെയ്നുകൾ. അവ കൃത്യമായി വൃത്തിയാക്കാം. തിളച്ച വെള്ളം, വിനാഗിരി, ബേക്കിങ് സോഡ എന്നിവയുടെ മിശ്രിതം കൊണ്ടിവിടെ വൃത്തിയാക്കാം.
• സ്പോഞ്ചുകളും ഡിഷ്ക്ലോത്തുകളും ദിവസവും മാറ്റുകയോ അണുവിമുക്തമാക്കുകയോ ചെയ്യുക.
• മോപ്പ് ബക്കറ്റുകൾ, നനഞ്ഞ തുണികൾ എന്നിവ ഉണക്കിവെക്കാൻ ശ്രമിക്കാം.
• വീടിനകവും അടുക്കളയിലെ പ്രതലങ്ങളും ഉണങ്ങിയതും വൃത്തിയുള്ളതുമാക്കി സൂക്ഷിക്കുക.
• വീടിനകത്ത് വായുസഞ്ചാരം കൂട്ടാം. വെയിൽ വരുമ്പോൾ ജനാലകൾ തുറന്നിടാം. പറ്റാത്തയിടങ്ങളിൽ ഫാൻ ഉപയോഗിക്കാം.

കെണിയൊരുക്കാം-ഒരു ജാറിൽ ചെറിയ കഷ്ണം പഴുത്ത പഴം വെക്കാം. ജാറിന്റെ മുകൾഭാഗം പ്ലാസ്റ്റിക് റാപ് കൊണ്ട് മൂടി ചെറിയ ദ്വാരങ്ങളിടാം. ഈച്ചകൾ പഴംതിന്നാൽ ഉള്ളിൽ കടക്കുമെങ്കിലും പുറത്തുകടക്കാൻ കഴിയില്ല.

കൂടുതല്‍ ഫീച്ചറുകള്‍ വായിക്കാന്‍ ഗൃഹലക്ഷ്മി വാട്സാപ്പ് ഗ്രൂപ്പില്‍ അംഗമാകൂ:https://mbi.page.link/grihalakshmi