ഷൈനിയുടെയും വിൽസന്റെയും 'ലൗ ട്രാക്ക്'; ഈ സ്‌നേഹക്കൂടിന് പേരിട്ടത് കെ.ആർ.മീര

ചെന്നൈ ചൂളൈമേട്ടിലെ വീട്ടിലെത്തുമ്പോൾ ഒളിമ്പ്യൻ ഷൈനി വിൽസൺ തിരക്കിലായിരുന്നു. കൂടിക്കാഴ്ചയുടെ കാര്യം അറിയിച്ചിരുന്നുവെങ്കിലും ഉമ്മറത്തെത്തി രണ്ടുമൂന്ന് തവണ കോളിങ്‌ബെൽ അമർത്തി കാത്തിരുന്നു. ഒടുവിൽ വീട്ടുവേഷത്തിൽ ഷൈനി വാതിൽ തുറന്നു. ''അയ്യോ ക്ഷമിക്കണം കേട്ടോ... രാവിലെ മുതൽ ജോലിത്തിരക്കിലായിരുന്നു... ഒന്നും വിചാരിക്കരുതേ... സോറി...'' ഷൈനിക്ക് പിന്നാലെ ഭർത്താവ് വിൽസണും 'സോറി' കൊണ്ടായിരുന്നു വരവേറ്റത്.

''കുറച്ചുദിവസമായുള്ള തിരക്കാണ്. വിരമിക്കൽ ചടങ്ങിൽ പങ്കെടുക്കാൻ നാട്ടിൽനിന്ന് ബന്ധുക്കളും സുഹൃത്തുക്കളും വന്നിരുന്നു. ഹോട്ടൽമുറികളും ഗസ്റ്റ്ഹൗസുകളും ബുക്ക് ചെയ്തു. പക്ഷേ, ആർക്കും അങ്ങോട്ടുപോകേണ്ട. ഷൈനിയുടെ കൂടെ മാത്രമേ നിൽക്കൂ. ഉള്ളത് കഴിച്ച് തറയിൽ കിടന്നോളാം എന്നൊക്കെ പറഞ്ഞ് നേരേ ഇങ്ങോട്ടുപോന്നു. രണ്ടുമൂന്ന് ദിവസം അടിച്ചുപൊളിച്ചു. ഇന്നലെയാണ് അവർ മടങ്ങിയത്...'' ഷൈനിയുടെ സംസാരത്തിനിടെ വിൽസൺ തമാശയുടെ ചെറിയൊരു പൂത്തിരി കത്തിച്ചു. ''ഇതുവരെ ഷൈനി ഫുഡ് കോർപ്പറേഷന്റെ മാത്രം ജനറൽ മാനേജരായിരുന്നു. ഇനിയിപ്പോൾ വീടിന്റെയും എന്റെയും ജനറൽ മാനേജരായില്ലേ... സഹിക്കുക തന്നെ....''