ആലിയയേക്കാളും അനന്യ പാണ്ഡേയെക്കാളും കൂടുതൽ പ്രതിഫലം ശ്രദ്ധ വാങ്ങുന്നുണ്ടെന്ന് ശക്തി കപൂർ

ബോളിവുഡ് താരം ശ്രദ്ധാ കപൂർ സിനിമകൾ തിരഞ്ഞെടുക്കുന്നതിൽ വളരെ സെലക്ടീവ് ആണെന്ന് പിതാവും നടനുമായ ശക്തി കപൂർ അടുത്തിടെ വെളിപ്പെടുത്തി. ശ്രദ്ധയ്ക്ക് വേണ്ടത്ര അവസരങ്ങൾ ലഭിക്കുന്നില്ല എന്ന തരത്തിലുള്ള അഭ്യൂഹങ്ങൾക്കിടെയാണ്, ആലിയ ഭട്ടിനേക്കാളും അനന്യ പാണ്ഡേയെക്കാളും കൂടുതൽ പ്രതിഫലം ശ്രദ്ധ വാങ്ങുന്നുണ്ടെന്ന് ശക്തി കപൂർ വ്യക്തമാക്കിയത്.

ആലിയ ഭട്ട്, അനന്യ പാണ്ഡേ എന്നിവരെ അപേക്ഷിച്ച് ശ്രദ്ധയ്ക്ക് അവസരങ്ങൾ കുറവാണെന്ന ചർച്ചകളെക്കുറിച്ച് ഒരു അഭിമുഖത്തിൽ ശക്തി കപൂറിനോട് ചോദിക്കുകയുണ്ടായി.

'അവൾ കുറച്ച് സിനിമകൾ മാത്രമേ ചെയ്യുന്നുള്ളൂ. മികച്ചവ മാത്രമേ തിരഞ്ഞെടുക്കാറുള്ളൂ. പക്ഷേ അവരേക്കാളൊക്കെ കൂടുതൽ പണം അവൾ വാങ്ങുന്നുണ്ട്. വർഷത്തിൽ ഒന്നോ രണ്ടോ സിനിമകൾ മാത്രമേ അവൾ ചെയ്യുന്നുള്ളൂ', 'പവർഫുൾ ഹ്യൂമൻസ്' എന്ന യൂട്യൂബ് ചാനലിന് നൽകിയ അഭിമുഖത്തിൽ ശക്തി കപൂർ പറഞ്ഞു.

അദ്ദേഹം തുടർന്നു, 'അവൾ വളരെ നിർബന്ധബുദ്ധിയുള്ള കൂട്ടത്തിലാണ്. സ്വന്തം മനസ്സ് പറയുന്നത് മാത്രമേ അവൾ കേൾക്കൂ. അവൾക്ക് ചില ചിട്ടകളുണ്ട്, അത് കർശനമായി പാലിക്കുകയും ചെയ്യും. ഞങ്ങൾ തമ്മിൽ നല്ല ബന്ധമാണ്. ചിലപ്പോൾ ഞങ്ങൾ വഴക്കിടും, യാത്രകൾ പ്ലാൻ ചെയ്യും, സിനിമകളെക്കുറിച്ച് ചർച്ച ചെയ്യും. അവളെക്കുറിച്ച് എനിക്ക് വലിയ അഭിമാനമാണ്. അവളുടെ പ്രകടനങ്ങൾ മികച്ചതാണ്, അവൾ ഒരു മികച്ച നടിയാണ്.'

2024-ലെ വൻ വിജയം നേടിയ 'സ്ത്രീ 2'-ന് ശേഷം 2025-ൽ ശ്രദ്ധയുടേതായി സിനിമകളൊന്നും പുറത്തിറങ്ങിയിട്ടില്ല.

ലക്ഷ്മൺ ഉട്ടേക്കർ സംവിധാനം ചെയ്യുന്ന 'ഈത' എന്ന സിനിമയുടെ തിരക്കിലാണിപ്പോൾ ശ്രദ്ധാ കപൂർ. മഹാരാഷ്ട്രയിലെ പ്രശസ്ത ഫോക്ക് ആർട്ടിസ്റ്റ് വിഠാഭായ് ഭാവു മാംഗ് നാരായൺഗാവുങ്കറുടെ ജീവിതത്തെ ആസ്പദമാക്കിയുള്ളതാണ് ഈ ചിത്രം. വിഠാഭായുടെ വിളിപ്പേരായ 'വിഠാ' എന്നതിന്റെ പ്രാദേശിക ഉച്ചാരണമാണ് 'ഈത'. 1950-കൾ മുതൽ 80-കൾ വരെയുള്ള കാലഘട്ടത്തിലെ മഹാരാഷ്ട്രയുടെ സാംസ്‌കാരിക ചരിത്രവും അവരുടെ കലാരൂപവും പ്രോത്സാഹിപ്പിക്കുന്നതിൽ ഈ ബയോപിക് വലിയ പങ്കുവഹിക്കുന്നു. ഈ കഥാപാത്രത്തിനായി ശ്രദ്ധ ഏകദേശം 15 കിലോയോളം ഭാരം കൂട്ടിയതായാണ് റിപ്പോർട്ടുകൾ. കൂടാതെ ലാവണി, ഗാവ്‌ലാൻ തുടങ്ങിയ പരമ്പരാഗത നാടൻ നൃത്തരൂപങ്ങളിലും താരം കഠിനമായ പരിശീലനം നേടുന്നുണ്ട്. ശ്രദ്ധാ കപൂറിന്റെ 'സ്ത്രീ 3' 2027 ഓഗസ്റ്റിൽ റിലീസ് ചെയ്യാനാണ് തീരുമാനിച്ചിരിക്കുന്നത്.

കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi

Content Highlights: Shraddha Kapoor`s father, Shakti Kapoor, reveals her selective film choices and higher remuneration compared to Alia Bhatt & Ananya Panday. Learn more!