ചാന്ദ്നി ബാറിൻ്റെ മൊത്തം ബജറ്റാണ് ഹീറോയിനിലെ കരീനയുടെ കോസ്റ്റ്യൂം ബില്ലെന്ന് മധുർ പറഞ്ഞപ്പോൾ
2001-ത്തിലാണ് മധുർ ഭണ്ഡാർക്കർ തബുവിനെ പ്രധാനകഥാപാത്രമാക്കി ‘ചാന്ദ്നി ബാർ’ എന്ന സിനിമ ചെയ്യുന്നത്. പരിമിതമായ ബജറ്റിലായിരുന്നു നിർമാണം. മുംബൈയിലെ ഡാൻസ് ബാറുകളുടെ ഇരുണ്ട വശം യാഥാർഥ്യബോധത്തോടെ അവതരിപ്പിച്ച ചിത്രം, മികച്ച തിരക്കഥയ്ക്കും അഭിനയത്തിനും പേരുകേട്ടു. തബു അവതരിപ്പിച്ച മുംതാസ് എന്ന കഥാപാത്രം ഇന്ത്യൻ സിനിമയിലെ ഏറ്റവും മികച്ച പ്രകടനങ്ങളിൽ ഒന്നായിട്ടാണ് കണക്കാക്കുന്നത്.
2012-ലാണ് അദ്ദേഹം കരീന കപൂറിനെ നായികയാക്കി ‘ഹീറോയിൻ’ എന്ന ചിത്രം ചെയ്യുന്നത്. ‘ചാന്ദ്നി ബാർ’ എന്ന ചിത്രത്തിൻ്റെ മുഴുവൻ ബജറ്റും ഹീറോയിനിൽ കരീനയുടെ കോസ്റ്റ്യൂം ബജറ്റും തുല്യമാണെന്ന് അദ്ദേഹം ഒരിക്കൽ തമാശയായി കരീനയോടു പറഞ്ഞിരുന്നുവത്രേ. പത്തുവർഷത്തിനിടെ, ബോളിവുഡിൽ പണംചെലവിടുന്നതു സംബന്ധിച്ചു വന്ന മാറ്റത്തെപ്പറ്റി സംസാരിക്കവേയാണ് ഇക്കാര്യം അദ്ദേഹം തുറന്നുപറഞ്ഞത്.
കരീനയെ കേന്ദ്രീകരിച്ചാണ് ഹീറോയിൻ ഒരുക്കിയത്. ഡിസൈനർ വസ്ത്രങ്ങൾ, സ്റ്റൈലിഷ് രൂപങ്ങൾ, ഫാഷൻ ലുക്കുകൾ എന്നിവയെല്ലാം കഥയുടെ അവിഭാജ്യ ഘടകങ്ങളായിരുന്നു. അതുകൊണ്ടുതന്നെ കോസ്റ്റ്യൂമുകൾക്ക് അത്രയേറെ പ്രാധാന്യമുണ്ടായിരുന്നു ചിത്രത്തിൽ.
ചന്ദ്നി ബാർ കുറഞ്ഞ വിഭവങ്ങൾ കൊണ്ട് നാല് ദേശീയ ചലച്ചിത്ര അവാർഡുകളും നിരൂപക പ്രശംസയും നേടി. അതേസമയം ഹീറോയിൻ സ്റ്റൈലിങ്ങിനും ബ്രാൻഡിങ്ങിനും താരപരിവേഷത്തിനും പ്രാധാന്യം നൽകുന്ന ബോളിവുഡിന്റെ മറ്റൊരു വശത്തെ പ്രതിനിധീകരിച്ചു. രണ്ട് ചിത്രങ്ങൾക്കും അവയുടെ സ്ഥാനവും പ്രേക്ഷകരുമുണ്ടായിരുന്നു,
തബുവിനെ മനസ്സിൽ വെച്ചാണ് താൻ ചാന്ദ്നി ബാർ എഴുതിയതെന്ന് സംവിധായകൻ നേരത്തേ പറഞ്ഞിരുന്നു. "ഇത് വളരെ അപകടകരമായിരുന്നു. സിനിമയുടെ തലക്കെട്ടുപോലും ആളുകൾക്ക് പ്രശ്നമുണ്ടായിരുന്നു. പലരും കരുതിയത് ഇത് വിലകുറഞ്ഞ, ബി-ഗ്രേഡ് തലക്കെട്ടാണെന്നാണ്. ഞാൻ ഈ സിനിമയ്ക്കായി ഏകദേശം ആറ് മാസത്തോളം ഗവേഷണം നടത്തി. നിർമാതാക്കളെ സമീപിച്ചപ്പോൾ, സിനിമയിൽ ചില ഐറ്റം നമ്പറുകൾ ചേർക്കാൻ അവർ ആവശ്യപ്പെട്ടു, അതെനിക്ക് താൽപര്യര്യമില്ലായിരുന്നു.
തബുവിന് തിരക്കഥ ഇഷ്ടപ്പെട്ടു. ഞാൻ അവരെ മനസ്സിൽ വെച്ചാണ് കഥ എഴുതിയത്. അവൾ എൻ്റെ ആദ്യത്തെയും അവസാനത്തെയും തിരഞ്ഞെടുപ്പായിരുന്നു. അവൾ സിനിമ നിരസിച്ചിരുന്നെങ്കിൽ എനിക്ക് നിരാശയായേനെ. ആ സമയത്ത് അവൾ വാണിജ്യ സിനിമകളിൽ അഭിനയിക്കുകയാണ്, രണ്ട് കുട്ടികൾക്ക് അമ്മയായി അഭിനയിക്കുക എളുപ്പമായിരുന്നില്ല."-അദ്ദേഹം പറഞ്ഞു.
പേജ് 3, ഫാഷൻ, കോർപ്പറേറ്റ്, ഹീറോയിൻ, കലണ്ടർ ഗേൾസ് എന്നിവ മധുറിന്റെ ചിത്രങ്ങളാണ്.
കൂടുതല് ഫീച്ചറുകള് വായിക്കാന് ഗൃഹലക്ഷ്മി വാട്സാപ്പ് ഗ്രൂപ്പില് അംഗമാകൂ:https://mbi.page.link/grihalakshmi
Content Highlights: Madhur Bhandarkar reveals Chandni Bar`s tiny budget compared to Kareena Kapoor`s Heroine outfits. Explore the making of a National Award-winning film.