പെട്ടെന്ന് കുഴഞ്ഞുവീണ് മരിക്കുന്ന ചെറുപ്പക്കാരുടെ വാർത്തകൾ ഞെട്ടലോടെയാണ് നാം കാണുന്നത്. മുപ്പതുകളുടെ തുടക്കത്തിലുള്ള ഒരാൾക്ക് കൊറോണറി ധമനിയിൽ (ഹൃദയത്തിലെ പ്രധാന രക്തക്കുഴൽ) 90 ശതമാനം ബ്ലോക്ക് ഉണ്ടെന്ന് കേൾക്കുമ്പോൾ അസാധാരണമായി തോന്നാം. എന്നാൽ ചെറുപ്പമാണ് എന്നത് കൊറോണറി ആർട്ടറി രോഗങ്ങളിൽ നിന്ന് ഒരാൾക്ക് പൂർണ്ണ സംരക്ഷണം നൽകുന്നില്ല. സാധാരണ ഹൃദ്രോഗങ്ങൾക്ക് കാണപ്പെടുന്ന ലക്ഷണങ്ങൾ ഒന്നുമില്ലാതെതന്നെ രക്തക്കുഴലുകളിൽ വലിയ ബ്ലോക്കുകൾ ഉണ്ടായേക്കാം.

ഹൃദയത്തിലേക്ക് രക്തം എത്തിക്കുന്ന ധമനികളുടെ ഭിത്തികളിൽ കൊഴുപ്പും കൊളസ്‌ട്രോളും മറ്റ് പദാർഥങ്ങളും അടിഞ്ഞുകൂടുമ്പോഴാണ് കൊറോണറി ആർട്ടറി രോഗം ഉണ്ടാകുന്നത്. ലക്ഷണങ്ങൾ പ്രകടമാകുന്നതിന് വർഷങ്ങൾ മുൻപേ രോഗം ആരംഭിക്കാം. ഇത്തരത്തിൽ യാതൊരുവിധ ലക്ഷണങ്ങളുമില്ലാതെതന്നെ രോഗം വഷളാകുമ്പോഴും, അവർക്ക് സാധാരണ ദൈനംദിന കാര്യങ്ങൾ ചെയ്യാനും കൃത്യമായി വ്യായാമം ചെയ്യാനും കഴിഞ്ഞേക്കാം.

രക്തക്കുഴലിൽ കാര്യമായ ബ്ലോക്ക് ഉള്ള എല്ലാവർക്കും കഠിനമായ നെഞ്ചുവേദന അനുഭവപ്പെടണമെന്നില്ല. ചിലർക്ക് പടികൾ കയറുമ്പോൾ ഉണ്ടാകുന്ന ശ്വാസതടസ്സം, അസാധാരണമായ ക്ഷീണം, വ്യായാമം ചെയ്യാനുള്ള ശേഷിക്കുറവ്, തലകറക്കം, അല്ലെങ്കിൽ നെഞ്ചിലോ പുറത്തോ താടിയെല്ലിലോ വയറിന്റെ മുകൾഭാഗത്തോ അനുഭവപ്പെടുന്ന അസ്വസ്ഥത എന്നിവ മാത്രമായിരിക്കാം ലക്ഷണങ്ങൾ. എന്നാൽ മറ്റു ചിലരിൽ ഹൃദയത്തിലേക്കുള്ള രക്തയോട്ടം പെട്ടെന്ന് കുറയുന്നതുവരെ പ്രകടമായ ലക്ഷണങ്ങൾ ഒന്നും തന്നെ ഉണ്ടായേക്കില്ല.

പാരമ്പര്യം, ഉയർന്ന കൊളസ്‌ട്രോൾ, അമിതവണ്ണം, പ്രമേഹം തുടങ്ങിയ ആരോഗ്യപ്രശ്‌നങ്ങൾ കാരണം കുട്ടികളിലും കൗമാരക്കാരിലും കൊറോണറി ആർട്ടറി സംബന്ധമായ പ്രശ്‌നങ്ങൾ അപൂർവ്വമായി ഉണ്ടാകാം. കളിക്കുമ്പോഴോ കായിക പ്രവർത്തികളിൽ ഏർപ്പെടുമ്പോഴോ അമിതമായ ക്ഷീണം, ശ്വാസതടസ്സം, നെഞ്ചിലെ അസ്വസ്ഥത, തലകറക്കം, ബോധക്ഷയം, ശാരീരിക ക്ഷമത കുറയുക തുടങ്ങിയ ലക്ഷണങ്ങൾ ശ്രദ്ധിക്കാം. വ്യായാമത്തിനിടയിൽ ആവർത്തിച്ച് ഉണ്ടാകുന്ന ഇത്തരം ലക്ഷണങ്ങളെ സ്വാഭാവികമെന്ന് കരുതി അവഗണിക്കരുത്.

ചെറുപ്പത്തിലുണ്ടാകുന്ന ബ്ലോക്കുകൾ, കാരണം
പ്രമേഹം, ഉയർന്ന രക്തസമ്മർദ്ദം, ഉയർന്ന കൊളസ്‌ട്രോൾ, പുകവലി, അമിതവണ്ണം, വ്യായാമമില്ലാത്ത ജീവിതശൈലി, അല്ലെങ്കിൽ കുടുംബത്തിൽ ആർക്കെങ്കിലും ചെറുപ്പത്തിലേ കൊറോണറി ആർട്ടറി രോഗം ഉണ്ടായിരുന്നിരിക്കുക എന്നിവയുള്ള യുവാക്കളിൽ രോഗസാധ്യത ഉണ്ടായേക്കാം. കൊളസ്‌ട്രോളിന്റെ അളവ് അമിതമായി വർധിക്കാൻ കാരണമാകുന്ന ജനിതക ഘടകങ്ങളും വളരെ ചെറിയ പ്രായത്തിൽ തന്നെ കൊറോണറി രോഗത്തിലേക്ക് നയിക്കുന്നു. ഹൃദയത്തിൽ ബ്ലോക്കുകൾ വർധിച്ചു എന്നത് ഹൃദയാഘാതം സംഭവിച്ചു എന്ന അർഥമില്ല.

ചിലരിൽ, രക്തക്കുഴലുകളിലെ ബ്ലോക്കുകൾ ക്രമേണ വർധിക്കുമ്പോൾ, മറ്റുചിലരിൽ കൊളസ്‌ട്രോൾ അടിഞ്ഞുകൂടിയ പാളി പൊട്ടുകയും രക്തം കട്ടപിടിക്കുകയും ചെയ്യുന്നത് മൂലം പെട്ടെന്ന് തടസ്സമുണ്ടാകാം. അതുകൊണ്ട് ഒരു ബ്ലോക്കിന്റെ കാഠിന്യവും ഗൗരവവും വിലയിരുത്തേണ്ടത് ലക്ഷണങ്ങൾ, അപകടസാധ്യത ഘടകങ്ങൾ, ഹൃദയസംബന്ധമായ പരിശോധനകൾ എന്നിവയുടെ അടിസ്ഥാനത്തിലാണ്.

കൂടാതെ, യുവാക്കളിൽ നെഞ്ചിൽ അനുഭവപ്പെടുന്ന എല്ലാ അസ്വസ്ഥതയും ഹൃദ്രോഗമാണെന്ന് കരുതരുത്. പേശിവലിവ്, അസിഡിറ്റി തുടങ്ങിയ മറ്റ് പല കാരണങ്ങൾ കൊണ്ടും സമാനമായ ലക്ഷണങ്ങൾ ഉണ്ടാകാം. അതേസമയം, ചെറുപ്പമാണ് എന്ന കാരണത്താൽ തുടർച്ചയായതോ അസ്വാഭാവികമോ ആയ ലക്ഷണങ്ങളെ അവഗണിക്കുകയും അരുത്. അത് രോഗനിർണ്ണയം വൈകാൻ ഇടയാക്കും.

പരിശോധന എപ്പോൾ
വ്യക്തിയുടെ ലക്ഷണങ്ങളും അപകടസാധ്യതകളും അടിസ്ഥാനമാക്കി ഇസിജി, രക്തപരിശോധനകൾ, എക്കോകാർഡിയോഗ്രാഫി, വ്യായാമ പരിശോധനകൾ, കൊറോണറി ഇമേജിംഗ് എന്നിവയിലൂടെ രോഗം നിർണ്ണയിക്കാം. ആരോഗ്യവാന്മാരായ യുവാക്കൾ സ്ഥിരമായി ഇത്തരം പരിശോധനകൾ നടത്തേണ്ട ആവശ്യമില്ല. എന്നാൽ ആരോഗ്യപ്രശ്‌നങ്ങളോ സംശയകരമായ ലക്ഷണങ്ങളോ ഉള്ളവർ നേരത്തെ തന്നെ പരിശോധനകൾ നടത്തേണ്ടതാണ്.

മംഗളൂരു കെ.എം.സി ഹോസ്പിറ്റലിലെ കൺസൾട്ടന്റ് കാർഡിയോളജിസ്റ്റും വകുപ്പ് മേധാവിയുമാണ് ലേഖകൻ

കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi