'അവർ വിവാഹിതരാണെന്ന് എനിക്ക് തോന്നിയിട്ടേയില്ല': താരദമ്പതികളെക്കുറിച്ച് വിശാൽ ഭരദ്വാജ്

സംവിധായകൻ വിശാൽ ഭരദ്വാജിന്റെ ചലച്ചിത്ര ലോകം എപ്പോഴും വേറിട്ടതാണ്. നെറ്റ്ഫ്ലിക്സിന്റെ പുതിയ റിലീസായ 'ലസ്റ്റ് സ്റ്റോറീസ് 3'-ൽ തികച്ചും വ്യത്യസ്തവും ലളിതവുമായ പ്രമേയവുമായാണ് അദ്ദേഹം എത്തിയിരിക്കുന്നത്. താരദമ്പതികളായ അദിതി റാവു ഹൈദരിയും സിദ്ധാർത്ഥുമാണ് ഇതിൽ കേന്ദ്രകഥാപാത്രങ്ങളെ അവതരിപ്പിച്ചത്. വിവാഹശേഷമുള്ള ഇവരുടെ ഓൺ-സ്ക്രീൻ കെമിസ്ട്രി കാണാൻ ആരാധകരും ഏറെ ആകാംക്ഷയിലായിരുന്നു. 1987-ലെ ഹൈദരാബാദിന്റെ പശ്ചാത്തലത്തിൽ, യാഥാസ്ഥിതിക ചുറ്റുപാടിൽ ജീവിക്കുന്ന സൈറ എന്ന ഉർദു അധ്യാപികയുടെയും അവരുടെ രഹസ്യ ആഗ്രഹങ്ങളുടെയും കഥയാണ് ചിത്രം പറയുന്നത്.

ചിത്രീകരണ അനുഭവത്തെക്കുറിച്ച് ഒരു അഭിമുഖത്തിൽ വിശാൽ പറഞ്ഞതിങ്ങനെ: "സെറ്റിൽ അവർ രണ്ടുപേരും തികച്ചും പ്രൊഫഷണലായിരുന്നു. അവർ വിവാഹിതരാണെന്ന് എനിക്ക് ഒരിക്കലും തോന്നിയിട്ടില്ല. ഷൂട്ടിങ് സമയത്ത് രണ്ടുപേരും വെവ്വേറെ സീറ്റുകളിലാണ് ഇരുന്നിരുന്നത്. അദിതി അവരുടെ കഥാപാത്രത്തിലും സിദ്ധാർത്ഥ് അദ്ദേഹത്തിന്റെ ലോകത്തുമായിരുന്നു. അവരുടെ ആ പ്രൊഫഷണൽ സമീപനം ഏറെ മനോഹരമായിരുന്നു."

തുടക്കത്തിൽ അദിതിയെ മാത്രമാണ് ഈ പ്രോജക്റ്റിലേക്ക് പരിഗണിച്ചിരുന്നത്. എന്നാൽ ഷൂട്ടിങ് തീയതികൾ മാറിയതോടെ, മറ്റ് പ്രോജക്റ്റുകൾ പൂർത്തിയാക്കി മടങ്ങിയെത്തിയ സിദ്ധാർത്ഥിലേക്ക് കഥാപാത്രം എത്തുകയായിരുന്നു.

അടുപ്പമുള്ള രംഗങ്ങൾ ചിത്രീകരിക്കുമ്പോൾ ഉപയോഗിക്കുന്ന ഇന്റിമസി കോർഡിനേറ്റർമാരെക്കുറിച്ചുള്ള തന്റെ മുൻധാരണകൾ മാറിയതിനെക്കുറിച്ചും വിശാൽ തുറന്നുപറഞ്ഞു. ഇന്റിമസി കോർഡിനേറ്റർമാർ സെറ്റിലുണ്ടാകുന്നത് തന്റെ സർഗ്ഗാത്മകതയെ ബാധിക്കുമോ എന്ന് തുടക്കത്തിൽ ഭയന്നിരുന്നുവെങ്കിലും അവരുടെ പ്രവർത്തനം തികച്ചും പ്രൊഫഷണലായിരുന്നുവെന്ന് അദ്ദേഹം വ്യക്തമാക്കി. അഭിനേതാക്കൾക്ക് രംഗങ്ങൾ കൃത്യമായി വിശദീകരിച്ചു നൽകാനും തികച്ചും സുരക്ഷിതമായ അന്തരീക്ഷം ഒരുക്കാനും അവർക്ക് സാധിച്ചു. ഇനി മുതൽ ഇന്റിമേറ്റ് രംഗങ്ങൾ ഉള്ള ചിത്രങ്ങളിൽ കോർഡിനേറ്റർമാരുടെ സഹായമില്ലാതെ പ്രവർത്തിക്കില്ലെന്നും അദ്ദേഹം കൂട്ടിച്ചേർത്തു.

പ്രണയവും കവിതയും സമന്വയിപ്പിക്കുന്ന വിശാൽ ഭരദ്വാജിന്റെ ഈ പുതിയ പരീക്ഷണം പ്രേക്ഷകർക്കിടയിൽ വൻ സ്വീകാര്യതയാണ് നേടുന്നത്.

കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi