കാളിയും ദേവാസുരൻമാരും പിറവിയെടുക്കുന്ന ഗ്രാമത്തിലേക്ക്...

കൗമാരത്തിൽ കാണുന്ന കാഴ്ചകൾക്ക് മിഴിവേറുമല്ലോ! അതുപോലൊരു സ്വപ്‌നകാഴ്ചയാണ് എനിക്കെന്നും കൊൽക്കൊത്ത എന്ന മഹാനഗരം. കൊൽക്കൊത്തയിൽ ആദ്യമായി പോകുന്നതും കൗമാരത്തിലാണ്. ഫുട്‌ബോളിന്റെ മക്കയെന്ന് അറിയപ്പെട്ട ഇവിടെവെച്ച് ഫോർട്ട്‌കൊച്ചിയിലെ സാന്റോസ് എന്ന ഫുട്‌ബോൾ ക്ലബ്ബിന് വേണ്ടി ബൂട്ട് അണിഞ്ഞപ്പോൾ മനസ്സ് സ്വപ്‌നം കണ്ടിരുന്നു. ഒരിയ്ക്കലെങ്കിലും ഇന്ത്യൻ ടീമിന് വേണ്ടി കളിക്കണം. അത് സാധിച്ചില്ലെങ്കിലും ഇന്നുമെന്റെ കണ്ണുകളിൽ നിറഞ്ഞുനിൽക്കുന്നത് അന്ന് കണ്ട കാഴ്ചകളായിരുന്നു.

അന്ന് എന്റെ കൈയിൽ MINOLTA SRT എന്ന ഒരു എസ് എൽ ആർ ക്യാമറ ഉണ്ടായിരുന്നു. അത് ഉപയോഗിച്ച് ഹൗറ പാലത്തിൽനിന്ന് എടുത്ത ഒരുചിത്രം ഇന്നും നിധിപോലെ ഞാൻ സൂക്ഷിച്ചുവെച്ചിട്ടുണ്ട്. കേരള അഡ്മിനിസ്‌ട്രേറ്റിവ് സർവീസ് ഓഫിസർ എന്ന നിലയിൽ ട്രെയ്‌നിങ്ങിന്റെ ഭാഗമായി വീണ്ടും കൊൽക്കൊത്തയിൽ പോകാൻ സാധിക്കുമെന്ന് അറിഞ്ഞപ്പോൾ മനസ്സ് ആ പഴയ കൗമാരഹൃദയം പോലെ തുടിച്ചു. കാർത്തിക മാസത്തിലെ ഒരു പുലർച്ചെയാണ് ഞങ്ങൾ കൊൽക്കൊത്തയിൽ വിമാനം ഇറങ്ങിയത്.

Content Highlights: Exploration of Kumartuli, the historic artisan village in Kolkata. Technical overview of idol construction using Ganga clay and organic materials