രശ്മികയ്ക്കും വിജയ്ക്കും മോഹൻലാലിനെ അറിയില്ലേ? ‘കംപ്ലീറ്റ് ആക്ടർ’ ചോദ്യത്തിൽ ചർച്ചയായി താരങ്ങൾ

തെന്നിന്ത്യൻ സൂപ്പർതാരം മോഹൻലാലിന്റെ വിശേഷണത്തെച്ചൊല്ലിയുള്ള ചോദ്യവും വിജയ് ദേവരകൊണ്ടയുടെ തമാശ നിറഞ്ഞ മറുപടിയും സോഷ്യൽ മീഡിയയിൽ ചർച്ചയാകുന്നു. കരൺ ജോഹർ അവതാരകനായെത്തിയ 'കോഫി വിത്ത് കരൺ' പരിപാടിയിൽ അതിഥികളായി എത്തിയ വിജയ് ദേവരകൊണ്ടയും രശ്മിക മന്ദാനയുമാണ് ഈ ചർച്ചയ്ക്ക് കാരണമായത്. തെന്നിന്ത്യൻ താരങ്ങളെ അവരുടെ ജനപ്രിയ വിശേഷണങ്ങളിലൂടെ തിരിച്ചറിയാനുള്ള ചോദ്യോത്തരവേളയിലെ ഇരുവരുടെയും പ്രതികരണമാണ് ശ്രദ്ധ നേടിയത്.

'ഐക്കൺ സ്റ്റാർ' ആരാണെന്ന ചോദ്യത്തിന് രശ്മിക പറഞ്ഞത് അല്ലു അർജുന്റെ പേരാണ്. 'റോക്കിങ് സ്റ്റാർ' എന്ന വിശേഷണം യാഷിനാണെന്നും താരം തിരിച്ചറിഞ്ഞു. എന്നാൽ, 'കംപ്ലീറ്റ് ആക്ടർ' ആരാണെന്നായിരുന്നു അടുത്ത ചോദ്യം. ഒട്ടും ആലോചിക്കാതെ 'ഞാൻ' എന്നായിരുന്നു വിജയ് ദേവരകൊണ്ടയുടെ തമാശ നിറഞ്ഞ മറുപടി. വിജയ്‌യുടെ മറുപടി കേട്ട് കരൺ ജോഹറും രശ്മികയും ചിരിച്ചു. പിന്നാലെ ഈ വിശേഷണം മലയാളത്തിന്റെ സൂപ്പർതാരം മോഹൻലാലിനെയാണ് സൂചിപ്പിക്കുന്നതെന്ന് കരൺ വ്യക്തമാക്കി. 'മോഹൻലാൽ സാറോ?' എന്നായിരുന്നു ഇരുവരുടെയും പ്രതികരണം.

വിഡിയോ പുറത്തുവന്നതോടെ സാമൂഹികമാധ്യമങ്ങളിൽ സമ്മിശ്ര പ്രതികരണങ്ങളാണ് ഉയരുന്നത്. മോഹൻലാലിന്റെ വിശേഷണം അറിയാത്തതിൽ ചിലർ നിരാശ പ്രകടിപ്പിച്ചപ്പോൾ വിജയ് ദേവരകൊണ്ടയുടെ മറുപടിയെ തമാശയായി കണ്ടവരുമുണ്ട്. 'മോഹൻലാലിനെ എല്ലാവർക്കും അറിയാമായിരിക്കും, പക്ഷേ അദ്ദേഹത്തിന്റെ വിശേഷണം എല്ലാവർക്കും അറിയണമെന്നില്ല' എന്നായിരുന്നു ഒരാളുടെ പ്രതികരണം.

മോഹൻലാലിന്റെ വിശേഷണം അറിയാത്തത് അദ്ദേഹത്തെ അറിയില്ലെന്നതിന് തെളിവല്ലെന്നും ചിലർ ചൂണ്ടിക്കാട്ടി. ഒരു താരത്തിന്റെ വിളിപ്പേരിനെക്കുറിച്ച് അറിവില്ലാത്തതും ആ താരത്തെക്കുറിച്ച് അറിയാത്തതും രണ്ടാണെന്നായിരുന്നു രശ്മികയെ പിന്തുണച്ചവരുടെ വാദം.

അതേസമയം, വിജയ് ദേവരകൊണ്ടയുടെ 'ഞാൻ' എന്ന മറുപടി കേട്ട് രശ്മിക ചിരിച്ചതും ചിലർ ചർച്ചയാക്കി. എന്നാൽ, വിജയ് സ്വയം ട്രോളുകയായിരുന്നുവെന്നും അതിനെ തമാശയായി കാണണമെന്നുമാണ് ആരാധകരിൽ ചിലരുടെ അഭിപ്രായം. ഇന്ത്യൻ സിനിമയിൽ 'കംപ്ലീറ്റ് ആക്ടർ' എന്ന വിശേഷണം മോഹൻലാലിന് മാത്രമല്ല, ചിരഞ്ജീവിയെപ്പോലുള്ള താരങ്ങൾക്കും ചിലർ നൽകാറുണ്ടെന്നും ഒരു വിഭാഗം അഭിപ്രായപ്പെട്ടു.

വിജയ് ദേവരകൊണ്ടയും രശ്മിക മന്ദാനയും ഒന്നിച്ച പുതിയ ചിത്രം 'രണബാലി' സമ്മിശ്ര പ്രതികരണങ്ങളോടെ തിയേറ്ററിൽ മുന്നേറുകയാണ്. സിനിമയുമായി ബന്ധപ്പെട്ട വിശേഷങ്ങൾക്കൊപ്പം ഇരുവരുടെയും വ്യക്തിജീവിതവും വാർത്തകളിൽ നിറയുകയാണ്. അതിനിടെയാണ് 'കോഫി വിത്ത് കരൺ' പരിപാടിയിലെ ഈ നിമിഷവും സാമൂഹികമാധ്യമങ്ങളിൽ ചർച്ചയാകുന്നത്.
കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi