സിനിമാലോകത്തെ നടീനടൻമാരുടെ പ്രായം സംബന്ധിച്ച ഇരട്ടത്താപ്പിനെക്കുറിച്ച് സംസാരിക്കുകയാണ് നടിയായ ഇഷാ കോപ്പികർ. സ്ത്രീകൾക്ക് പ്രായമാകുമ്പോൾ 'പ്രശ്നമായി' കണക്കാക്കപ്പെടുന്നുവെന്നും എന്നാൽ പുരുഷന്മാർക്കാണെങ്കിൽ അതിനെ 'പരിചയസമ്പത്താ'യിട്ടാണ് കണക്കാക്കുന്നതെന്നും (film industry) തന്റെ പുതിയ വീഡിയോയിൽ അവർ പറഞ്ഞു.

"വിചിത്രമല്ലേ? ഒരു പുരുഷന് പ്രായമാകുന്നത് അനുഭവപരിചയമാണെന്നും, സ്ത്രീക്ക് പ്രായമാകുന്നത് പ്രശ്നമാണെന്നും പറയുന്നു. സിനിമകളിൽ, നായകന്മാർ അവരുടെ പ്രായത്തിന്റെ പകുതി പ്രായമുള്ള പെൺകുട്ടികളുമായി പ്രണയിക്കുന്നത് കാണുന്നു. അവർ അവരുടെ നായകന്മാരാകുന്നു. അത് വളരെ സാധാരണമാണ്."

നടി തുടർന്നു, "പക്ഷേ ഒരു സ്ത്രീ സ്റ്റൈലിഷും സ്വന്തം വ്യക്തിത്വം ആഘോഷിക്കുന്നവളുമാണെങ്കിൽ, ‘ഈ പ്രായത്തിൽ, ദയവുചെയ്ത് പ്രായത്തിനൊത്ത് പെരുമാറൂ’വെന്ന് പറയും. കാലത്തിനനുസരിച്ച് ഒരു സ്ത്രീയുടെ പ്രാധാന്യം കുറയുന്നില്ലെന്നതാണ് സത്യം. അവൾ ആഴമുള്ളവളാകുന്നു. ആത്മവിശ്വാസം ഉച്ചത്തിൽ മുഴങ്ങിയേക്കില്ല, പക്ഷേ അത് കൂടുതൽ ശക്തമാകുന്നു. അവളുടെ സൗന്ദര്യം മുഖത്ത് മാത്രമല്ല, ആ യാത്രയിലും കാണാം. ചുളിവുകൾ പ്രായം മാത്രമല്ല കാണിക്കുന്നത്. അത് അവളുടെ പോരാട്ടങ്ങളെക്കൂടിയാണ്. 

നിങ്ങളുടെ അമ്മ, ഭാര്യ, സഹോദരി, മകൾ, പിന്നെ ഒരു ദിവസം നിങ്ങളും. എല്ലാവരും പ്രായമാകും. അതുകൊണ്ട്, പ്രായമാകുന്നത് അപമാനമായി കണക്കാക്കരുത്. എല്ലാ പ്രായത്തിലും സ്ത്രീകളെ ബഹുമാനിക്കുക. അവരുടെ പ്രായം നോക്കരുത്, അവരുടെ യാത്ര നോക്കൂ. അവരുടെ ചർമ്മം നോക്കരുത്, ശക്തി നോക്കൂ. അന്തസ്സിന് എക്സപയറി ഡേറ്റില്ല. ആത്മവിശ്വാസത്തിന് പ്രായമില്ല. ഇതിനെക്കുറിച്ച് ചിന്തിക്കൂ."

2024-ലെ തമിഴ് സയൻസ് ഫിക്ഷൻ ചിത്രമായ അയലാനിലാണ് ഇഷയെ അവസാനമായി ബിഗ്സ്ക്രീനിൽ കണ്ടത്. ശിവകാർത്തികേയൻ നായകനായ ചിത്രത്തിൽ എലിസ എന്ന കഥാപാത്രത്തെയാണ് അവർ അവതരിപ്പിച്ചത്. 

കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi