ശരീരഭാരം കുറയ്ക്കാൻ പട്ടിണി കിടക്കുകയാണോ? ഈ ഭക്ഷണങ്ങൾ നിങ്ങളെ സഹായിക്കും

സാധാരണയായി ശരീരഭാരം കുറയ്ക്കുന്നതിനുള്ള ആദ്യപടി അമിതമായ കലോറി നിയന്ത്രിക്കുകയാണ്. ഇതിന്റെ ഭാഗമായി പഞ്ചസാര, മൈദ, സംസ്കരിച്ച ഭക്ഷണങ്ങൾ എന്നിവ ഒഴിവാക്കുകയാണ് പതിവ്. എന്നാൽ ചില ഭക്ഷണങ്ങൾ ശരീരഭാരം സ്വാഭാവികമായി കുറയ്ക്കാൻ സഹായിക്കുമെന്ന് ഫിറ്റ്‌നസ് കോച്ച് വിൽ സ്റ്റോൺ വ്യക്തമാക്കുന്നു. കൊഴുപ്പ് കുറയ്ക്കാനും മൊത്തത്തിലുള്ള ആരോഗ്യം മെച്ചപ്പെടുത്താനും സഹായിക്കുന്ന നിത്യോപയോഗ ഭക്ഷണസാധനങ്ങളുടെ ഒരു പട്ടിക അദ്ദേഹം എക്സിലൂടെ (X) പങ്കുവെച്ചിരുന്നു.

ഭക്ഷണങ്ങളും അവയുടെ ഗുണങ്ങളും

പോപ്‌കോൺ: കലോറി വളരെ കുറവായതിനാൽ കൂടുതൽ അളവിൽ കഴിക്കാം. കലോറി ‍‍‌ഡയറ്റിനെ ബാധിക്കാതെ തന്നെ വിശപ്പും ആസക്തിയും പെട്ടെന്ന് കുറയ്ക്കാൻ ഇത് സഹായിക്കുന്നു.

മുട്ട: മുട്ടയുടെ മഞ്ഞയും വെള്ളയും ഉൾപ്പെടെ കഴിക്കുക. ഇത് വിശപ്പ് കുറയ്ക്കാനും മെറ്റബോളിസം വർദ്ധിപ്പിക്കാനും സഹായിക്കുന്നു.

ചിക്കൻ ബ്രെസ്റ്റ്: കൊഴുപ്പ് കുറഞ്ഞ പ്രോട്ടീൻ സ്രോതസ്സാണിത്. ദഹനസമയത്ത് തന്നെ കലോറി എരിച്ചുകളയാൻ ഇത് സഹായിക്കും. പേശീനിർമ്മാണത്തിനും വിശപ്പ് നിയന്ത്രിക്കാനും ഇത് ഉത്തമമാണ്.

ബ്രോക്കോളി: നാരുകൾ (fibre) ധാരാളമുള്ള ഇതിൽ കലോറി ഏതാണ്ട് പൂജ്യമാണ്. ഇത് ദഹനത്തിനും വയർ നിറഞ്ഞിരിക്കുന്നതായി തോന്നാനും സഹായിക്കുന്നു.

ബ്ലാക്ക് കോഫി: കൊഴുപ്പ് എരിച്ചുകളയാനും വിശപ്പ് കുറയ്ക്കാനും സഹായിക്കുന്ന ഏറ്റവും മികച്ച മാർഗങ്ങളിലൊന്നാണ് ബ്ലാക്ക് കോഫി.

ഗ്രീക്ക് യോഗർട്ട്: പ്രോട്ടീൻ കൂടുതലുള്ള ഗ്രീക്ക് യോഗർട്ടിന്റെ ദഹനം സാവധാനത്തിലായതുകൊണ്ട് മധുരം കഴിക്കാനുള്ള ആഗ്രഹം നിയന്ത്രിക്കാൻ സാധിക്കുന്നു.

വൈറ്റ് ഫിഷ് (White fish): ഇവയിൽ പ്രോട്ടീൻ കൂടുതലും കലോറി കുറവുമാണ്. പേശികൾക്ക് പോഷണം നൽകുമ്പോൾ തന്നെ കൊഴുപ്പിന്റെ അളവ് കുറയ്ക്കാൻ സഹായിക്കുന്നു.

ആപ്പിൾ: ഇത് ചവച്ച് കഴിക്കേണ്ടതുകൊണ്ട് തന്നെ പെട്ടെന്ന് വയർ നിറഞ്ഞതായി തലച്ചോറിന് സന്ദേശം ലഭിക്കുന്നു. നാരുകൾ ധാരാളമുള്ളതിനാൽ ദഹനത്തിനും നല്ലതാണ്.

ചുവന്ന പഴങ്ങൾ (Red fruits): സ്ട്രോബെറി പോലുള്ള ചുവന്ന പഴങ്ങളിൽ പഞ്ചസാര കുറവാണ്. കലോറി അധികമാവുമെന്ന പേടിയില്ലാതെ തന്നെ ഇവ കഴിക്കാം.

ഓട്‌സ്: സാവധാനം ദഹിക്കുന്ന കാർബോഹൈഡ്രേറ്റ് ആയതുകൊണ്ട് ദീർഘനേരം വിശപ്പില്ലാതെ നിലനിർത്താൻ സഹായിക്കുന്നു. ഇൻസുലിൻ പെട്ടെന്ന് വർദ്ധിക്കുന്നത് തടയാനും ഇവ ഫലപ്രദമാണ്.

കൊഴുപ്പ് കുറയ്ക്കാൻ ശരീരപ്രകൃതത്തിനനുസരിച്ച് വേണം പ്രവർത്തിക്കാൻ എന്ന് വിൽ സ്റ്റോൺ പറയുന്നു.

"ഈ ഭക്ഷണങ്ങൾക്കെല്ലാം ഉയർന്ന തൃപ്തി സൂചിക (Satiety Index) ഉണ്ട്. അമിതമായി കലോറി അകത്തെത്തുന്നതിന് മുൻപേ തന്നെ വിശപ്പ് മാറിയതായി ഇവ തലച്ചോറിന് സന്ദേശം നൽകുന്നു. ഇതോടെ ഭക്ഷണം നിയന്ത്രിക്കുന്നത് ഒരു ശിക്ഷയായി തോന്നാതെ, സ്വാഭാവികമായി സംഭവിക്കുന്നു."

(ശ്രദ്ധിക്കുക: ഈ വിവരങ്ങൾ പൊതുവായ അറിവിലേക്കായി നൽകുന്നതാണ്. ഡോക്ടറുടെയോ ന്യൂട്രീഷ്യനിസ്റ്റിന്റെയോ നിർദ്ദേശത്തിന് പകരമല്ല.)

കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi

Content Highlights: Focuses on high satiety index foods to curb hunger naturally., Lists 10 specific food items including eggs, popcorn, and oats., Emphasizes working with biology rather than starvation., Expert advice from fitness coach Will Stone for 2026 lifestyle goals.