'നായികമാർക്ക് ആയുസ്സ് കുറവ്; പ്രണയബന്ധം, വിവാഹം എന്നിവയിൽ അകപ്പെടാൻ പാടില്ല'

ദക്ഷിണേന്ത്യൻസിനിമകളിലൂടെ കടന്നുവന്ന് ബോളിവുഡ് കീഴടക്കിയ താരമാണ് താപ്‌സി പന്നു. തെലുഗുസിനിമയിലൂടെയാണ് അരങ്ങേറ്റം നടത്തിയത്. മുൾക്ക്, ബദ്‌ലാ, മിഷൻ മംഗൾ, ഥപ്പഡ്, ഹസീൻ ദിൽറുബ, ദൊബാരാ തുടങ്ങിയവയാണ് താപ്‌സിയുടെ പ്രധാനസിനിമകൾ.

സിനിമയിലെ 'പിആർ ഗെയി'മുകളെക്കുറിച്ചുള്ള താപ്‌സിയുടെ അഭിപ്രായങ്ങളിപ്പോൾ ശ്രദ്ധനേടുകയാണ്. പിആർ ഗെയിം മറ്റൊരു തലത്തിലേക്ക് പോയിരിക്കുന്നുവെന്നും, മറ്റാളുകളെ താഴേക്ക് തള്ളിയിടാൻ ആളുകൾ പണം നൽകുന്നുവെന്നും അവർ ആരോപിക്കുന്നു. ഒരു വ്യക്തിയുടെ വിജയം മറ്റൊരാളുടെ പരാജയത്തെ ആശ്രയിച്ചിരിക്കേണ്ടതുണ്ടോ എന്നും താരം ചോദിക്കുന്നു.

''എന്റേതായ കാര്യങ്ങൾ ചെയ്യുന്ന തിരക്കിലായിരുന്നു ഞാൻ. എന്നാൽ കഴിഞ്ഞ രണ്ടുവർഷമായി ഞാൻ കാര്യങ്ങൾ മന്ദഗതിയിലാക്കി. അത് ബോധപൂർവമായ ഒരു ശ്രമമാണ്. ഈ പിആർ ഗെയിം മറ്റൊരു തലത്തിലേക്ക് പോയിട്ടുണ്ടെന്ന് ഞാൻ മനസ്സിലാക്കി. നിങ്ങൾ ഒന്നുകിൽ സ്വയം തള്ളാൻ പണം നൽകുന്നു. അത് പിആർ ചെയ്യുന്നതിന്റെ ഒരു പതിപ്പാണ്. മറ്റൊരാളെ താഴേക്ക് തള്ളിയിടാനും നിങ്ങൾ പണം നൽകുന്നു'', അവർ പറഞ്ഞു.

''എന്നുമുതലാണ് നിങ്ങളുടെ വിജയം മറ്റൊരാളുടെ പരാജയത്തെ ആശ്രയിച്ചിരിക്കുന്നത്? ഒരു ഹിറ്റ് സിനിമയിൽ ഞാൻ മാത്രം ഉണ്ടാകുന്നതിൽ എനിക്ക് യോജിപ്പില്ല, നിങ്ങളുടേതല്ലെങ്കിൽ പോലും വളരെ ശക്തമായ ഒരു ശബ്ദവും ആ സിനിമയിൽ ഉണ്ടായിരിക്കണം'', സൂമിന് നൽകിയ അഭിമുഖത്തിൽ പറയുന്നു.

സിനിമയിലേക്ക് വന്നപ്പോൾ സീനിയേഴ്‌സ് പറഞ്ഞതെല്ലാം ആദ്യം തന്നെ വിശ്വസിച്ചിരുന്നോ എന്ന ചോദ്യത്തിന് താപ്‌സി മറുപടി നൽകിയതിങ്ങനെ, ''ഞാൻ എല്ലാം വിശ്വസിച്ചു. അവരെ വിശ്വസിക്കാതിരിക്കാൻ എനിക്ക് ഒരു കാരണവുമില്ലായിരുന്നു. അവരെല്ലാം മുതിർന്ന ആളുകളായിരുന്നു, കൂടുതൽ പരിചയസമ്പന്നരായ ആളുകളായിരുന്നു, നായികമാർക്ക് 5-6 വർഷം മാത്രമേ ആയുസ്സുള്ളൂ എന്ന് എന്നോട് പറഞ്ഞു. വലിയ താരങ്ങൾക്കൊപ്പം അഭിനയിക്കണം, അവർ നിങ്ങളെക്കാൾ എത്ര പ്രായമുള്ളവരാണെങ്കിലും. എ-ലിസ്റ്റർ ആകാൻ, വലിയ എ-ലിസ്റ്റർ നായകന്മാരുടെ കൂടെ അഭിനയിക്കണം. നിങ്ങളുടെ റോൾ എന്താണെന്നത് പ്രശ്‌നമല്ല''.

തന്റെ വ്യക്തിപരമായ ജീവിതത്തിൽ പോലും അവർ ഉപദേശങ്ങൾ നൽകിയെന്നും താപ്‌സി ഓർക്കുന്നു. ''നായികയായി നിൽക്കണമെങ്കിൽ പ്രണയബന്ധങ്ങളോ മറ്റ് ബന്ധങ്ങളോ പാടില്ലെന്നും അവരെന്നോട് പറഞ്ഞു. കാരണം നിങ്ങൾ ഡേറ്റ് ചെയ്യാൻ തുടങ്ങിയാൽ, പ്രേക്ഷകരുടെ മനസ്സിൽ നിങ്ങളുടെ ആകർഷണീയത കുറയും. ഒരു നായിക അവിവാഹിതയും പ്രണയബന്ധമില്ലാത്തവളുമായി തോന്നിയാൽ മാത്രമേ നായികയാവാൻ കഴിയൂവെന്നും അവർ ഉപദേശിച്ചു. അതുപോലെ നെഗറ്റീവ് കഥാപാത്രങ്ങളെ അവതരിപ്പിക്കരുതെന്നും പറഞ്ഞു''. വൊ ലഡ്കി ഹെ കഹാം, ഗാന്ധാരി, മൾക്ക് 2 എന്നിവയാണ് താപ്‌സിയുടെ പുറത്തിറങ്ങാനിരിക്കുന്ന ചിത്രങ്ങൾ.

കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi

Content Highlights: Taapsee Pannu discusses the manipulative nature of PR games in Bollywood and the short lifespan of actresses, revealing shocking advice she received