‘ജനങ്ങളുടെ മരണം വരെ ആഘോഷമാക്കി; വർഷങ്ങളായി മിഡിൽ ഈസ്റ്റിനെ ബാധിച്ച കാൻസറാണ് ഈ ഭരണകൂടം’

ഇറാനിൽ ജനിച്ച, നിലവിൽ ഇന്ത്യയിൽ താമസിക്കുന്ന നടിയാണ് മന്ദന കരീമി. ഇറാന്‍റെ പരമോന്നത നേതാവ് ആയത്തുള്ള അലി ഖമനേയിയും അദ്ദേഹത്തിന്റെ കുടുംബവും ഞായറാഴ്ച നടന്ന ഇസ്രായേൽ സൈനിക ആക്രമണത്തിൽ കൊല്ലപ്പെട്ടിരുന്നു. ഇതേക്കുറിച്ച് പ്രതികരിക്കുകയാണ് മന്ദന കരീമിയിപ്പോൾ. പതിറ്റാണ്ടുകളായി ഇറാനിലെ ജനങ്ങൾ നേരിടുന്ന അവസ്ഥയെക്കുറിച്ചും ഖമനേയിയുടെ മരണം ജനങ്ങൾ ആഘോഷിക്കുകയാണെന്നും താരം വെളിപ്പെടുത്തി.

"വർഷങ്ങളായി, ഇറാനിലെ ജനങ്ങൾ വെറും കൈകൊണ്ട് പ്രതിഷേധിക്കുകയായിരുന്നു. ഞങ്ങൾക്ക് പലരെയും നഷ്ടപ്പെട്ടു. അമ്മമാരെയും കുട്ടികളെയും നഷ്ടപ്പെട്ടു, സർവകലാശാലകൾ നഷ്ടപ്പെട്ടു - ഈ പട്ടിക നീണ്ടുപോകുന്നു. ആരും മരണത്തെ സന്തോഷത്തോടെ കാണുന്നില്ല. എന്നാൽ ഈ ഭരണകൂടം, അവർ ഞങ്ങളോട് ചെയ്തത്... കഴിഞ്ഞ രണ്ട് മാസങ്ങളിലെ വീഡിയോകൾ നിങ്ങൾ കണ്ടിട്ടുണ്ടാകുമെന്ന് എനിക്കുറപ്പുണ്ട് - ജനുവരി 8, 9 തീയതികളിൽ ആയിരത്തോളം ആളുകളെ കൂട്ടക്കൊല ചെയ്തപ്പോൾ, ഇറാനികൾ തങ്ങളുടെ സ്വന്തം ജനങ്ങളുടെ മരണം ആഘോഷിച്ചു. എന്താണ് സംഭവിച്ചതെന്നാൽ, എന്റെ കുടുംബവും സുഹൃത്തുക്കളും എന്നെ വിളിക്കുമ്പോൾ ചോദിക്കുന്നത്, 'എത്രപേരാണ് മരിച്ചതെന്ന് വിശ്വസിക്കാൻ കഴിയുന്നുണ്ടോ?' എന്നാണ്,"എൻ.ഡി.ടി.വിക്ക് നൽകിയ അഭിമുഖത്തിൽ താരം പറഞ്ഞു.

"ഞങ്ങൾ ഈ വാർത്ത ആഘോഷിക്കാൻ പോകുകയാണ്, കാരണം വർഷങ്ങളായി ഞങ്ങൾ ലോകത്തോട് അപേക്ഷിക്കുകയാണ്, ദയവായി ഞങ്ങളെ സഹായിക്കൂ എന്ന്. ഈ ഭരണകൂടം മിഡിൽ ഈസ്റ്റിലെ ഒരു കാൻസർ കോശമാണ്. അവരുടെ ആക്രമണങ്ങൾ മിഡിൽ ഈസ്റ്റിനുള്ളിലാണ് നടക്കുന്നത്. അതൊന്നും ആസൂത്രിതമല്ല, അവർ റെസ്റ്റോറന്റുകളിലും മറ്റും ആക്രമണം നടത്തുന്നു. ഞങ്ങൾ 48 വർഷത്തിലേറെയായി പോരാടുകയാണ്," അവർ പറഞ്ഞു.

1979 മുതൽ ഇസ്‌ലാമിക് റിപ്പബ്ലിക് ഭരണകൂടമാണ് ഇറാനിൽ നിലവിലുള്ളത്. ഇറാനിലെ ഭരണകൂടത്തെ പിന്തുണച്ച് ഇന്ത്യയിൽ നടക്കുന്ന പ്രതിഷേധങ്ങളിൽ തനിക്ക് നിരാശയുണ്ടെന്ന് മന്ദന പറഞ്ഞു.

അമേരിക്ക-ഇസ്രായേൽ ആക്രമണത്തിന് മറുപടിയായി, ഇസ്‌ലാമിക് റിപ്പബ്ലിക് മേഖലയിലെ നിരവധി അറബ് രാജ്യങ്ങളെ ലക്ഷ്യമാക്കി ഡ്രോണുകളും മിസൈലുകളും ഉപയോഗിച്ച് പ്രത്യാക്രമണം നടത്തി. ഖമനേയിയുടെ മരണത്തെത്തുടർന്ന് ഇറാൻ 40 ദിവസത്തെ ദുഃഖാചരണം നടത്തുകയാണ്. 

'റോയ്' എന്ന ചിത്രത്തിൽ മന്ദന അതിഥി വേഷത്തിൽ അഭിനയിച്ചിട്ടുണ്ട്. 'ഭാഗ് ജോണി', 'മെയിൻ ഔർ ചാൾസ്', 'ക്യാ കൂൾ ഹേം ഹം 3' എന്നീ ചിത്രങ്ങളിലും അവർ അഭിനയിച്ചു. ബിഗ് ബോസ് 9, ലോക്ക്-അപ്പ് തുടങ്ങിയ റിയാലിറ്റി ടിവി ഷോകളിലെ മത്സരാർത്ഥിയായിരുന്നു അവർ. 'ഇഷ്ഖ്‌ബാസ്' എന്ന പരമ്പരയിലും താരം അഭിനയിച്ചിട്ടുണ്ട്.

കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi

Content Highlights: Actress Mandana Karimi's strong reaction to the reported death of Iran's Supreme Leader., Describes the Iranian regime as a 'cancer' in the Middle East., States that the people of Iran are celebrating the news after years of oppression., Highlights the decades-long struggle against the Islamic Republic since 1979., Expresses disappointment over pro-regime protests happening in India.