സ്റ്റെതസ്കോപ്പിനു പകരം ചെസ്സ്ബോർഡ്; വനിതാ ചെസ്സ് ലോകകപ്പ് കിരീടമണിഞ്ഞ ദിവ്യ ദേശ്മുഖിന്റെ ജീവിതത്തിലൂടെ
ജോർജിയയിലെ ബാത്തുമി, ഫിഡെ വനിതാ ചെസ്സ് ലോകകപ്പ് കിരീടത്തിനായി രണ്ട് ഇന്ത്യൻ പെൺകുട്ടികൾ നേർക്കുനേർ. ഒരുവശത്ത് മുൻ വനിതാ ഗ്രാൻഡ്മാസ്റ്ററും പരിചയസമ്പന്നയുമായ കൊനേരു ഹംപി. മറുവശത്ത് അവരുടെ പകുതി മാത്രം പ്രായമുള്ള ദിവ്യ ദേശ്മുഖ്. പിന്നീട് നടന്നത് ചരിത്രം. കൊനേരു ഹംപിയെ ആവേശകരമായ ടൈബ്രേക്ക് ഫൈനലിൽ പരാജയപ്പെടുത്തി ഫിഡെ ലോക വനിതാ ചെസ്സ് ലോകകപ്പ് കിരീടം ആ 19 കാരി പിടിച്ചെടുത്തു. വനിതാ ചെസ്സിലെ ഏറ്റവും കൊതിപ്പിക്കുന്ന കിരീടങ്ങളിലൊന്നാണ് ഇന്ന് അവളുടെ കൈയിൽ.
2005 ഡിസംബർ 9-ന് നാഗ്പൂരിൽ ഡോ. ജിതേന്ദ്രയുടെയും ഡോ. നമ്രത ദേശ്മുഖിന്റെയും മകളായാണ് ദിവ്യ ജനിക്കുന്നത്. മെഡിക്കൽ രംഗത്ത് പ്രവർത്തിക്കുന്ന മാതാപിതാക്കളുടെ സ്റ്റെതസ്കോപ്പല്ല, മറിച്ച് ചെസ്സ്ബോർഡാണ് കുട്ടിയായ ദിവ്യയെ ആകർഷിച്ചത്. നാലാം വയസ്സിൽ ദിവ്യ ഈ കളി സ്വയം തിരഞ്ഞെടുത്തു. പത്താം വയസ്സിൽ തന്നെ ഏജ്-ഗ്രൂപ്പ് ലോക ടൂർണമെന്റുകളിൽ ഇന്ത്യയെ പ്രതിനിധീകരിക്കാൻ അവൾ യാത്രകൾ തുടങ്ങി. അതേസമയം പഠനത്തെ അവൾ ഒരിക്കലും പിന്നോട്ട് മാറ്റിയില്ല. ഭവൻസ് ഭഗവൻദാസ് പുരോഹിത് വിദ്യാ മന്ദിറിൽ പഠിക്കുമ്പോൾ ഒരു ചെസ്സ് ബോർഡിലെ കരുക്കളെപ്പോലെ പരീക്ഷകളും ടൂർണമെന്റുകളും ദിവ്യ ഒരുമിച്ച് കൊണ്ടുപോയി. വിദ്യാഭ്യാസത്തെയും ചെസ്സിനെയും എതിരാളികളായി കാണാതെ സഖ്യകക്ഷികളായി കണ്ട് രണ്ടും ഒരുമിച്ച് കൊണ്ടുപോകാനുള്ള ദിവ്യയുടെ മനോഗതമാണ് അവളെ വ്യത്യസ്തയാക്കുന്നത്. അധ്യാപകരും സഹപാഠികളും അവളെ ഓർക്കുന്നത് ഒരു ചെസ്സ് താരം എന്ന നിലയിൽ മാത്രമല്ല, പഠനം ഒഴിവാക്കാൻ തന്റെ കഴിവ് ഒരിക്കലും ഒരു ഒഴിവുകഴിവായി ഉപയോഗിക്കാത്ത ശ്രദ്ധാലുവും ജിജ്ഞാസുവുമായ ഒരു വിദ്യാർത്ഥിനി എന്ന നിലയിലാണ്. പന്ത്രണ്ടാം ക്ലാസ് ബോർഡ് പരീക്ഷയിൽ മികച്ച വിജയം നേടിയ ശേഷം അവൾ വിദൂര വിദ്യാഭ്യാസം തിരഞ്ഞെടുത്തു. നിലവിൽ, സ്പോർട്സ് സൈക്കോളജി, പെർഫോമൻസ് സയൻസ്, ചെസ്സിലെ ഡാറ്റാ അനലിറ്റിക്സ് എന്നിവയാണ് പഠിക്കുന്നത്. ഈ വിഷയങ്ങൾ തന്റെ കളിയും മാനസികാവസ്ഥയും മെച്ചപ്പെടുത്തുമെന്ന് അവൾ വിശ്വസിക്കുന്നു.
2021ലാണ് ദിവ്യ വനിതാ ചെസ് ഇന്റർനാഷനൽ മാസ്റ്റർ ആകുന്നത്. അതിനു മുൻപ് 2020ൽ നടന്ന ചെസ് ഒളിംപ്യാഡിൽ സ്വർണം നേടിയ ഇന്ത്യൻ ടീമംഗമായിരുന്നു. 2022ൽ വനിതാ ദേശീയ കിരീടം. 2024ൽ ലോക ജൂനിയർ (അണ്ടർ-20) വനിതാ ചെസ് ചാമ്പ്യനായതോടെയാണ് ദിവ്യയുടെ പ്രശസ്തി കൂടുതൽ ഉയരുന്നത്. ഒറ്റ മത്സരത്തിൽ പോലും തോൽക്കാതെ 11ൽ 10 പോയിന്റും നേടിയാണ് ജേതാവായത്. 2023-ൽ ഏഷ്യൻ കോണ്ടിനെന്റൽ വനിതാ ചാമ്പ്യൻഷിപ്പ് നേടിയിരുന്നു. ടാറ്റ സ്റ്റീൽ വനിതാ റാപ്പിഡ് ചെസ് 2023ൽ ഏറ്റവും താഴ്ന്ന സീഡും പകരക്കാരിയും ആയി ഇടംനേടിയിട്ടും നിലവിലെ ലോക ചാമ്പ്യൻ ജുവെൻജുനേക്കാൾ മുന്നിലായി ഫിനിഷ് ചെയ്ത് ഏവരേയും ഞെട്ടിച്ചു. ഇന്ത്യയുടെ മൊത്തത്തിൽ 88-ാമതും വനിതകളിൽ നാലാമതുമായ ഗ്രാൻഡ്മാസ്റ്റർ കിരീടമാണ് ദിവ്യയ്ക്ക് ലഭിച്ചത്.
കൂടുതല് ഫീച്ചറുകള് വായിക്കാന് ഗൃഹലക്ഷ്മി വാട്സാപ്പ് ഗ്രൂപ്പില് അംഗമാകൂ:https://mbi.page.link/grihalakshmi
Content Highlights: 19-year-old Indian chess prodigy Divya Deshmukh triumphs over Koneru Humpy to win the FIDE Women`s World Cup. Learn about her inspiring journey.